ഭ്രാന്തുകൾ

ഭ്രാന്തുണ്ടെനിക്ക് പണ്ടേ..
പലരുടെ വാക്കിലും...

മാഷിന്റെ മാവിന്റെ ഉച്ചിയിൽ കേറി
വിമാനം തൊടാൻനിന്ന ബാല്യത്തിൽ
അമ്മയുടെ സാക്ഷ്യപ്പെടുത്തൽ
'ഈ പെണ്ണിന് ഭ്രാന്തുണ്ട് !'

ഇരുഹൃദയങ്ങളിൽ പറയാതൊളിപ്പിച്ച പ്രണയം
ജീവിതത്തിലേക്കു ക്ഷണിച്ചപ്പോൾ -
അച്ഛന്റെ നിറകണ്ണു മനസ്സിലോർത്ത്
തള്ളിക്കളയവെ
കൂട്ടുകാരുടെ വാക്കിലും
'നിനക്കു ഭ്രാന്താണ്!'

കൗമാരത്തിന്റെ വിലക്കുകൾക്കപ്പുറം
യൗവ്വനത്തിൽ താലിയുടെ ശക്തിയിൽ
സ്വാതന്ത്ര്യത്തിന്റെ ആകാശം താണ്ടവെ ..
നിറഞ്ഞ പൊട്ടിച്ചിരികൾ
ഇടയ്ക്കിടെ നക്ഷത്രമാവുമ്പോൾ
പ്രിയതമന്റെ സംശയം
' ഇവൾക്കു ഭ്രാന്തുണ്ടോ?'

സന്നിജ്വരം മൂത്ത്..
വാർദ്ധക്യത്തിന്റെ തടവറയിലിന്ന്
ബന്ധനാവസ്ഥയിൽ..
അബോധത്തിന്റെ തടവു ചാടി
ഇടയ്ക്കെത്തുന്ന വെളിവിൽ
മക്കൾക്കായ് കേഴുന്ന മാതൃമനം കണ്ട് ..
ദൈവവും പറയുന്നുണ്ടാവാം
'അവൾക്കു ഭ്രാന്താണ് !'

---------------------------------------ജിഷഅനിൽ
മോങ്ങം