മലയാളി (തുള്ളൽ പാട്ട് താളം )

പണ്ടൊരു ജോത്സ്യൻ കവടിയുരുട്ടി
പത്തിൽ പത്തു പൊരുത്തം ചൊല്ലി
പതിയും, പത്നിയും രണ്ടു കിടക്കയിൽ
പരുവം കിട്ട്യാ ജോൽസ്യന് കോളാ....!

മനമോടാത്ത കുമാർഗ്ഗവുമില്ല
കുമാർഗ്ഗമൊഴിഞ്ഞൊരു ചിത്തവുമില്ല
ഉദരനിമിത്തം ബഹുകൃതവേഷം
ഉള്ളതു പറയാം, ചിരി തൂകരുതേ...

നാളുകൾ നോക്കിയെടുക്കും ബന്ധം
നാരികളെത്ര വലഞ്ഞു കഷ്ടം
നാടുകളെത്ര തിരഞ്ഞെന്നാലും
നാട്ടാചാരം ഇങ്ങനെയുണ്ടോ..?

ചൊവ്വാദോഷം ചാർത്തി മുടിച്ചൊരു
ചൊവ്വാകാത്ത മനങ്ങളിതെത്ര....?
ചൊവ്വയിൽ പോയൂണു കഴിക്കാൻ
ചൊവ്വായിട്ടും, മാറ്റവുമില്ല.

പ്രായാധിക്യം പഴമ മൊഴിഞ്ഞാൽ
പ്രായം ചിന്തിച്ചതു തളളീടാം
പാന്റും, കോട്ടും ഇട്ട വസൂരികളീ-
പ്രകാരം ഇതെന്തൊരു കഷ്ടം..?

വേറൊരു കൂട്ടം നാട്ടിൽ മുഴുവൻ
വേദിയിലോതും ആദർശങ്ങൾ
വേളിക്കൊപ്പം രാത്രിയിലെത്തും
വേലി പൊളിച്ചും ജോൽസ്യന്നരികിൽ

പല്ലി ചിലച്ചാൽ, കാക്ക കരഞ്ഞാൽ
പൂച്ചകൾ വട്ടം ചാടി മറഞ്ഞാൽ
പിന്നൊരു പുകിലാണന്നൊരു ദിനവും
പൊയ്പ്പോയെന്നൊരു പരിവേദനവും

ആരെങ്കിലുമൊരു നൻമ പറഞ്ഞാൽ
അമ്മയൊരോട്ടമടുപ്പിൻ മൂട്ടിൽ
അൽപം മുളക് കറക്കിയൊരേറ്
"അയ്യോ "അവളുടെ കരിനാക്കാണേ"

ഒന്നാം തീയതി കേറാനായിട്ട്
ഒറ്റയൊരുത്തനും വീട്ടിൽ വരില്ല
ഒറ്റയൊരേറാ ബൈക്കിൽ നിന്നും
ഓർമ്മപ്പേടിയിൽ പത്രക്കാരൻ

ചില്ലിക്കടവും ചോദിച്ചതിരിൽ
ചൊവ്വാഴ്ച്ച കടക്കില്ലാരും
ചില്ലറ പോലും നൽകില്ലച്ഛൻ
ചൊവ്വല്ലത്രേ... ചൊവ്വാഴ്ച്ച..?

മലയാളിക്കിതു പുതുമയുമല്ല
മാതൃകയത്രേ ഗോഡ്സോൺ കൺട്രി...?
മകുടിയിലൂതും മധുരമനോഹര-
മാനസഗീതം, എന്തൊരു ഭംഗി..?

ഈക്കുളമാകെ തവളകളേപ്പോൽ
ഈ വിധമിങ്ങനെ ചിന്തിക്കുമ്പോൾ
ഇറങ്ങണം രാഹുവിൻ കാലം മുന്നേ
ഇന്നൊരു യാത്ര, പിന്നെക്കാണാം...!

© രാജേഷ്.ഡി..✍️