മണിച്ചിത്രത്താഴും തെക്കിനിയിലെ പാട്ടും പിന്നെ ഓർക്കസ്ട്രയും - Part 2

പരമ്പരയുടെ ഒന്നാം ഭാഗത്തിന് നിങ്ങൾ തന്ന പിന്തുണക്കു ആദ്യമേ നന്ദി പറഞ്ഞുകൊണ്ട് ഇന്നത്തെ പോസ്റ്റിലേക്ക് വരാം .ആദ്യപോസ്റ്റിൽ നമ്മൾ ചർച്ച ചെയ്ത തെക്കിനിയിൽ നിന്ന് കേൾക്കുന്ന " ഒരു മുറൈ വന്ത് പാറായോ " പാട്ടിനെ പറ്റിയുള്ള സംശയങ്ങൾക്കാണ് ഇന്ന് നമ്മൾ ഉത്തരം തേടുന്നത് .

ഈ ഇടയ്ക്കു ഒരു സുഹൃത്ത് ചോദിച്ച സംശയം ഗംഗ തെക്കിനിയിൽ നിന്ന് പാടുമ്പോൾ എന്തുകൊണ്ട് സണ്ണിക്ക് മാത്രം അത് കേൾക്കാൻ ആകുന്നു എന്നാണു .

ഇതിന്റെ ഉത്തരം സണ്ണി ചാര് കസ്സേരയിൽ കിടക്കുന്നതു നടുത്തളത്തിൽ ആണ് .മറ്റുള്ളവർ ഉറങ്ങുന്നത് മുറിക്കുള്ളിലും .അങ്ങനെ വരുമ്പോൾ സ്വാഭാവികമായും ഗംഗ ചിലങ്ക അണിഞ്ഞു പുറത്തേക്കു പോകുമ്പോൾ അതിന്റെ ശബ്ദം സണ്ണിക്ക് കേൾക്കാം .മാത്രവുമല്ല ആ പാട്ടു ആദ്യം സണ്ണി കേൾക്കുന്നത് വളരെ ചെറിയ ശബ്ദത്തിൽ ആണ് അത് സണ്ണി പിന്നീട് തെക്കിനിക്കടുത്തേക്കു പോകുമ്പോൾ മാത്രമാണ് വ്യക്തമായി കേൾക്കുന്നതെന്നു കാണാം

അടുത്ത സംശയം ചോദിച്ചത് ഗംഗ മുറി തുറക്കുമ്പോൾ എന്തുകൊണ്ട് ശബ്ദം കേട്ട് നകുലനോ മറ്റു ആൾകാരോ എഴുന്നേൽക്കുന്നില്ല അല്ലെങ്കിൽ അറിയുന്നില്ല കൂടാതെ നമ്മളുടെ വീട്ടിലാണെങ്കിൽ എന്തെങ്കിലും ശബ്ദം കേട്ടാൽ നമ്മൾ എഴുന്നേൽക്കില്ലേ എന്നാണു.

ഇതിന്റെ ഉത്തരം മാടമ്പള്ളി ഒരു വലിയ തറവാടാണ് അവിടെ ധാരാളം മുറികളും ഒന്നിൽ കൂടുതൽ നടുവരാന്തകളും ഇടനാഴികളും ഉള്ളത് .അപ്പോൾ ശബ്ദം കേൾക്കാനുള്ള സാധ്യത കുറവാണ് .പിന്നെ തമാശയാണെങ്കിലും ഒരു കാര്യമുള്ളത് അങ്ങനെ രാത്രിയിൽ ശബ്ദം ഉണ്ടായാൽ ഉടനെ ആൾക്കാർ ഉണർന്നിരുന്നെങ്കിൽ ഇവിടെ പല മോഷണവും ഒളിച്ചോട്ടവും മറ്റുപലതും എപ്പോഴേ നിന്നേനെ :)

ഇനി ഇതിന്റെ വാസ്തുശാസ്ത്രപരമായ വിശദീകരണം നോക്കാം അതായത് സണ്ണി കിടക്കുന്ന സ്ഥലം നടുത്തളം ആണെന്ന് പറഞ്ഞിരുന്നല്ലോ സാധാരണ
തെക്കിനിയിലേക്കു ഒരാൾക്ക് പോകണമെങ്കിൽ പ്രേത്യേകിച്ചും താഴെ നിന്ന് പോകണമെങ്കിൽ നടുമുറ്റം കഴിഞ്ഞാണ് അല്ലെങ്കിൽ അതിനടുത്തു കൂടിയാണ് പോകേണ്ടിവരിക .അപ്പോൾ സ്വാഭാവികമായും അവിടെ മയങ്ങുന്ന സണ്ണി ഗംഗയുടെ ചിലങ്കയുടെ ശബ്ദം കേൾക്കുകയും അങ്ങോട്ടേക്ക് നോക്കുകയും ചെയ്യും .

അടുത്തതായി ഉള്ള സംശയം മാടമ്പള്ളി പഴയതറവാടായതുകൊണ്ടും തെക്കിനി മുകളിലെ നിലയിൽ ആയതുകൊണ്ടും ഗംഗ ഭ്രാന്തമായി ചിലങ്കയിട്ടുകൊണ്ടു നൃത്തം ചെയ്യുമ്പോൾ ഉള്ള ശബ്ദം അല്ലെങ്കിൽ മുഴക്കം താഴെ ഉള്ളവർക്കും കേൾക്കാൻ കഴിയില്ലേ എന്നതായിരുന്നു .

ഇതിനുള്ള ഉത്തരം പഴയ തറവാടുകളിൽ വാസ്തുശാസ്ത്ര പ്രകാരം തെക്കിനി ഉയരത്തിൽ നിർമിക്കുന്നതും കെട്ടി അടക്കപ്പെട്ടിട്ടുള്ളതാണ് . അതിനാൽ തന്നെ വായു സഞ്ചാരം കുറവായിരിക്കും അവിടെ ഇത് മനസ്സിലാക്കാൻ അല്ലിയെ ഗംഗ മുകളിലെ മുറിയിൽ പൂട്ടിയിടുന്ന രംഗം ശ്രദ്ധിച്ചാൽ മതി. അപ്പോൾ അവിടെയെത്തുന്ന നകുലൻ സണ്ണിയോട് പറയുന്നുണ്ട് "അയ്യോ ഈ മുറിയിൽ ശ്വാസം കിട്ടില്ല എന്ന്" . ഈ ഒരു കാരണം കൊണ്ട് തന്നെ അവിടെയുണ്ടാകുന്ന ശബ്ദം അധികം വെളിയിൽ വരില്ല .

കൂടാതെ തെക്കിനിയിൽ മുകളിലോ താഴെയോ താമസം പാടില്ല എന്നാണ് ശാസ്ത്രം . അതിനു മറ്റു കെട്ടുകൾ ആണ് ഉപയോഗിക്കുന്നത് .ഇത് മനസ്സിലാക്കാൻ തമ്പി ഗംഗയെ തെക്കിനി ഭാഗത്തേക്ക് പോകുന്നത് വിലക്കുന്ന രംഗം ശ്രദ്ധിച്ചാൽ മതി .അതുകൊണ്ടുതന്നെ മാടമ്പള്ളി പോലൊരു വലിയ തറവാട്ടിൽ തെക്കിനിയിലെ മുഴക്കമോ ശബ്ദമോ അങ്ങനെയൊന്നും മറ്റു കെട്ടുകളിൽ കേൾക്കാനാകില്ല പ്രത്യേകിച്ചും വാതിലുകളും ജനാലകളും അടച്ചിരിക്കുമ്പോൾ .എന്നാൽ സണ്ണി കിടക്കുന്ന സ്ഥലം നടുത്തളം ആണ് തറവാടിന്റെ മധ്യഭാഗത്തു അപ്പോൾ അവിടെ മയങ്ങുന്ന സണ്ണിക്ക് ഈ ശബ്ദം ചെറിയ രീതിയിൽ എങ്കിലും കേൾക്കാൻ കഴിയും .അതുകൊണ്ടാണല്ലോ വളരെ പതുങ്ങിയ ശബ്ദത്തിൽ കേട്ട പാട്ടു സണ്ണി തെക്കിനിക്കടുത്തെത്തുമ്പോൾ ഉച്ചത്തിൽ കേൾക്കുന്നത്. ഇപ്പോൾ ആ സംശയം തീർന്നെന്നു വിചാരിക്കുന്നു :)

അടുത്തതായി ചോദിച്ച സംശയം സണ്ണി നാഗവല്ലിയുടെ പാട്ടുകേട്ട് തെക്കിനിയി എത്തുമ്പോൾ ആരാണ് അവിടെ മൃദഗം ഓർക്കസ്ട്ര വായിക്കുന്നത് എന്നാണ് :)

ഇതൊരു കാര്യമില്ലാത്ത ചോദ്യമായെ കണക്കിൽ എടുക്കാൻ കഴിയൂ കാരണം അത് സംവിധായകന്റെ ഇഷ്ടമല്ലേ പാട്ടിൽ ഓർക്കസ്ട്ര വേണമോ എന്നത് :). കൂടാതെ ഇങ്ങനെ ലോജിക് നോക്കാൻ ആണെങ്കിൽ സിനിമ സംഗീതം തന്നെ ഒരു തമാശയായി കാണാം. ഇനി ഇതിന്റെ ലോജിക് കൂടി വേണമെങ്കിൽ നമ്മൾക്ക് ചിത്രത്തിൽ നിന്ന് തന്നെ കണ്ടെടുക്കാനാവുന്നതാണ് .

അതറിയാൻ നമ്മൾക്ക് പടം ഒന്ന് റീവൈൻഡ് ചെയ്യാം . നമ്മൾ ഇപ്പോൾ പ്ലേയ് ചെയ്യുന്നത് ഗംഗ ആദ്യമായി തെക്കിനി തുറക്കുന്ന രംഗമാണ് . ഇവിടെ ഗംഗ തെക്കിനിയിലെ കൗതുക കാഴ്ചകൾ വീക്ഷിക്കുമ്പോൾ നാഗവല്ലിയുടെ മുറി കാണുന്ന സമയം ബാക്ക്ഗ്രൗണ്ടിൽ "ഒരു മുറൈ വന്ത് പാറായോ " എന്ന ഗാനം കേൾക്കുന്നത് ശ്രദ്ധിക്കുക . ഇതിനെ വേണമെങ്കിൽ നമ്മൾക്ക് ഗംഗക്കുണ്ടാകുന്ന സൈക്കിക് വൈബ്രേഷന്റെ ഭാഗമായ ഒരു Auditory Hallucination ( നമ്മളുടെ പഞ്ചേന്ദ്രിയങ്ങളും ബ്രയ്‌നുമായി ഉള്ള ആശയവിനിമയത്തിൽ ഉണ്ടാവുന്ന ഏറ്റക്കുറച്ചിലുകൾ കാരണം അവർ അനുഭവിക്കുന്നതായ കേൾക്കുന്നതായ കാര്യങ്ങൾ മറ്റൊരു തരത്തിൽ അനുഭവപ്പെടുന്നത് ) ആയി കാണാം .കാരണം നാഗവല്ലിയെ കുറിച്ചുള്ള കഥകൾ കേട്ടാണ് അവൾ തെക്കിനിയിലേക്കു വരുന്നത് തന്നെ അപ്പോൾ അവൾക്കു നാഗവല്ലിയോട് ഒരു സിമ്പതി തോന്നിത്തുടങ്ങുകയും അത് അവളുടെ മനോനിലയെ ചെറുതായി ബാധിക്കുകയും ചെയ്യുന്നുണ്ടാവാം.
ഈ ഒരു ഓഡിറ്റോറി ഹാലൂസിനേഷൻ ഗംഗ തെക്കിനിയിൽ വച്ച് പാട്ടുപാടി നൃത്തം ചെയ്യുമ്പോളും ഉണ്ടാവുന്നുണ്ടാകാം . കാരണം തെക്കിനിയിൽ ഒരു മൃദഗം വച്ചിരിക്കുന്നത് നിങ്ങളിൽ പലരുടെയും ശ്രദ്ധയിൽ പെട്ടിട്ടുണ്ടാവാം. ചിലപ്പോൾ അത് കാണുമ്പോൾ അതിന്റെ ശബ്ദം അവൾക്കു കേൾക്കുന്നത് പോലെ തോന്നിയിരിക്കാം അതാവും അങ്ങനെ ഒരു ഓർക്കസ്ട്ര അവിടെ വരാൻ കാരണം.

ഇനി സണ്ണിയുടെ വ്യൂ പോയിന്റിൽ ഇതൊന്നും വരില്ല എന്ന് പറഞ്ഞാൽ അതിനുള്ള ഉത്തരം ഈ സീനിൽ തെക്കിനിയിൽ ഉള്ള ആളുടെ മാനസികാവസ്ഥ കൂടി കാണിക്കാൻ ആവാം അങ്ങനെ ചെയ്തത്. പിന്നീട് ഇതിനുള്ള ഒരു ന്യായീകരണമായി തെക്കിനിയിലെ പാട്ടിന്റെ മറ്റൊരു വേർഷൻ ആയ ക്ലൈമാക്സ് നൃത്ത സമയത്തെ "ഒരു മുറൈ വന്ത് പാർത്തായ" പാട്ടിനിടക്ക് നാഗവല്ലി സദസിൽ പഴയ ആൾക്കാരുടെ മുൻപിൽ സന്തോഷകരമായി തന്റെ മേളക്കാരോടൊപ്പം നൃത്തം ചെയ്യുന്നതായി ഉള്ള ഒരു രംഗം ഉണ്ട്. യഥാർത്ഥത്തിൽ ഗംഗ ഒരു Visual & Auditory Hallucination ലേക്ക് പോയതായി ആണ് ആ സീനിൽ കാണിച്ചിരിക്കുന്നത് .

ഇപ്പോൾ തെക്കിനിയിൽ നാഗവല്ലിയോടൊപ്പം ഓർക്കസ്ട്ര വായിക്കുന്നത് വേറാരും അല്ലെന്നും അത് ഗംഗയുടെ താളം തെറ്റിയ മാനസികനിലയാണെന്നും ഏവർക്കും മനസ്സിൽ ആയി എന്ന് കരുതുന്നു .

ഇങ്ങനെ ധാരാളം കാര്യങ്ങൾ ചിത്രത്തിൽ നിന്ന് നമ്മൾക്ക് കണ്ടെടുക്കാൻ കഴിയും.അതിലെക്കുള്ള അന്വേഷണം ആണീ പരമ്പര.അവസാനിപ്പിക്കുന്നതിനുമുന്പു വീടിന്റെ ശാസ്ത്രപരമായ കാര്യങ്ങൾ പറഞ്ഞു തന്ന മാഷ് ജ്യോതിലാൽ ജോർജ് തോട്ടത്തിലിനോടുള്ള നന്ദി ഇവിടെ രേഖപ്പെടുത്തുന്നു.

ആദ്യ ഭാഗത്തിന്റെ ലിങ്ക് : https://www.facebook.com/groups/nallezhuth/permalink/1592238127525335/

തുടരും ...

After Tomorrow same time