എന്താല്ലെ!!

കാശില്ലാത്തൊരു കാലം മുന്നെ കണ്ടകശനിയായ് തീർന്നല്ലൊ.
കാശില്ലാതിരുകാലിൽ മൂളി -
പ്പാട്ടും പാടി നടന്നല്ലൊ.
കണ്ടവരൊക്കെ കുണ്ടാമണ്ടി
തട്ടിക്കൂട്ടി നടന്നല്ലൊ.
കുണ്ഡിതനായൊരു മണ്ടൻ ഞാനും
പിണ്ഡംപോലെയായല്ലൊ.

പണ്ടാരോ, പറഞ്ഞൊരു കതിരിൽ പതിരില്ലാതെയായല്ലൊ.
പണ്ടാരം പായ്യാരം കൊണ്ട് പണ്ടാരടങ്ങിപ്പോയല്ലൊ.

ആണ്ടവൻ പണ്ടേ കണ്ടത് കാര്യം
കാര്യം പോലെയായല്ലൊ.
ആണ്ടിൽ ആണ്ടിരു ചാണിൽ വയറിൽ ബിരിയാണിക്കൊതി മൂത്തല്ലൊ'.

ത്ധണ്ടാമഴയും പിന്നേ മടിയും
പണിയും ഇല്ലാതായല്ലൊ
പണവും നോക്കി - നോക്കിയിരുന്നു
ഞാനും പിണമായ് പോയല്ലൊ.

അണ്ടനും മുണ്ടനും കുണ്ടന്മാരും
വണ്ടിയും കൊണ്ട് പറന്നല്ലൊ
വിണ്ടേമണ്ടി പ്പെണ്ണൊരു കൂട്ടറും
കൂട്ടം കൊണ്ട് നടന്നല്ലൊ.

കഷ്ടക പുഷ്ടക എന്ന് പറഞ്ഞ്
ബംഗാളികളുടെ കൂട്ടങ്ങൾ
കണ്ടിടമെല്ലാം കയറിപ്പറ്റി
കാശും വാങ്ങിപ്പോകുന്നു.

കണ്ടാൽ മൊഞ്ചൻ ആയൊരു കുണ്ടൻ
ആണൊരു മണ്ടൻ ചേലിത് കണ്ടാൽ
പണ്ടേ മടിയിത് പണിയത് ചെയ്യാൻ
പെണ്ണും കെട്ടിക്കഴിഞ്ഞാൽ പിന്നെ
തോണ്ടൽ തന്നെ കാശിന് ശരണം
കാലം പോണൊരു പോക്കത് കണ്ടോ

കാശില്ലാത്തൊരു കാലം മുന്നെ
കണ്ടകശനിയായ് തീർന്നല്ലൊ....

ഹുസൈൻ എം കെ