സ്ഥാനാർത്ഥി നിർണ്ണയം

എണ്ണിയത്
തുന്നിക്കെട്ടിയ
മുറിവ് പാടുകളായിരുന്നു.

ഒന്നാമൻ കാണിച്ചത്
ഏഴ് മുറിവ് പാടുകളായിരുന്നു.
രണ്ടാമൻ ഒമ്പത്
മൂന്നാമൻ പതിനൊന്ന്
നാലാമൻ പതിനാല് .

ഓരോ മുറിവ് പാടുകൾക്കും
പോയന്റ്
വ്യത്യസ്തമായിരുന്നു .
തലയിലേതിന്
മൂന്ന് പോയന്റ്
കഴുത്തിലേതിന്
രണ്ട് പോയന്റ്
മുതുകിലേതിന്
ഒരു പോയന്റ്.

മുപ്പത്തിരണ്ട്
പോയന്റുകളുമായ്
ഒന്നാമതെത്തിയിട്ടും
മുഹമ്മദ് കൃഷ്ണയെന്ന
യുവ നേതാവ്
പേരിലെ
വ്യക്തതയില്ലായ്മയാൽ
അയോഗ്യനാക്കപ്പെട്ട്
പുറത്തേക്ക് നടക്കുന്നു.

വ്യക്തമായ പേരുമായ്
'സ്രാങ്ക് ' സ്ഥാനാർത്ഥിയാവുന്നു

വിശന്ന് കരഞ്ഞവന്റെ
കണ്ണീര് കണ്ട്
ഹൃദയം മുറിഞ്ഞവൻ
തുന്നിക്കെട്ടാത്ത
മുറിവുകളുമായ്,
ഒരു പൊട്ടൻ ചിരിയും
ചിരിച്ച്,
മൂകമിരുപ്പുണ്ടായിരുന്നു
പിൻബഞ്ചുകളിലെവിടെയോ

ലാലു,

സ്രാങ്ക് - പുറമേ ബഹുമാനിക്കപ്പെടുന്ന ക്വട്ടേഷൻ, മയക്കുമരുന്ന് മാഫിയ തലവൻ, പുതുപ്പണക്കാരൻ