അമ്മയ്ക്കായി

ഇത്രനാളൊറ്റയ്ക്കിരുന്നൊരീയമ്മയ്ക്ക്‌
കൂട്ടിരിക്കാനുള്ള കാലമിനി.
അമ്മ നിന്നൊപ്പമായ്‌ എത്തുമീ കാലത്ത്‌
തിരികെപ്പിടിക്കു നിൻ ബാല്ല്യകാലം.

അമ്മ നിനക്കായ്‌ കുറുക്കിയൊരിങ്കിനി
നേദിക്കു നീ നിൻ നിവേദ്യമായി.
അമ്മ നിനക്കായുരുട്ടിയുരുളകൾ
ഇനി നിന്റെയൂഴം തിരിച്ചു നൽകാൻ.

പിച്ച നടത്തിയൊരമ്മ തൻ വിരലുകൾ
ഇനി നിന്റെ കൈകളിൽ ഭദ്രമാക്കൂ.
അമ്മതൻ കാലടി പതറാതിരിക്കുവാൻ
അമ്മയ്ക്കു നീയിനി അമ്മയാകൂ.

എന്നും വഴിക്കണ്ണുമായി നിൻ വരവിനായ്‌
കാത്തു തളർന്നൊരീ അമ്മയ്ക്കിനി,
അണുനേരമിടവേളയില്ലാതെ നീയിനി
കൂട്ടായിരിക്കുവാൻ മുടിവെടുക്കൂ.

മുരളീകൃഷ്ണൻ