സമയം രാത്രി 8 മണി..... ഓടിത്തളര്ന്ന ജേതാവിനെപ്പോലെ , പ്ലാറ്റ് ഫോമിലേക്ക് ...കിതച്ചു കൊണ്ട് , മലബാര് എക്സ്പ്രസ് എത്തി....! പലരും പലപല കംപാര്ട്ട്മെന്റിലായി കയറി ... കൂട്ടത്തില് ഞാനും ....!!
കിതപ്പാറും മുമ്പേ...വീണ്ടും കുതിച്ചു തുടങ്ങി....! വിജനമായ വഴിത്താരയിലൂടെ , ഇഴഞ്ഞും പതുങ്ങിയും...ട്രെയിന് ഓടിക്കൊണ്ടിരുന്നു . പുറത്ത് നിലാവെളിച്ചം പാല്പ്പുഞ്ചിരി തൂകി നില്ക്കുന്നു . മുരണ്ടും പിരണ്ടും , കുതിച്ചും കിതച്ചും ട്രെയിന് പൊയ്ക്കൊണ്ടിരുന്നു. മിന്നാമിനുങ്ങുകളെ ഓര്മ്മിപ്പിക്കത്തക്ക വിധം , ഇരുട്ടില് നിരനിരയായും വരിവരിയായും അങ്ങുമിങ്ങും ഇലക്ട്രിക് വിളക്കുകള് പ്രകാശിക്കുന്നു.
വിണ്ണില് ,മിന്നല് പിണറുകള്.... ഭൂമിയെ തുളച്ച് ആഴത്തിലേക്ക് ഇറങ്ങാന് വെമ്പുന്ന , വമ്പന് മരത്തിന്റെ വേരുപോലെ..... മിന്നല് പിണറുകള് ചാലിട്ടൊഴുകി വരുന്നു .
ടി.ടി.ആര് ഇടയ്ക്കിടയ്ക്ക് ടിക്കറ്റ് പരിശോധനയ്ക്കായി കമ്പാര്ട്ടുമെന്റില് , അങ്ങോളമിങ്ങോളം സഞ്ചരിക്കുന്നു. ഇടയ്ക്ക് ഉറങ്ങി കിടക്കുന്നവരെ വിളിച്ചുണര്ത്തുന്നു. ടിക്കറ്റ് പരിശോധിക്കുന്നു.... സുരക്ഷാ ഉദ്യോഗസ്ഥര് ഉലാത്തുന്നുണ്ട്. ഉറക്കം വരാതിരിക്കുവാനോ അതോ.... കളളന്മാരോ കാപാലികന്മാരോ ഉണ്ടോ എന്ന് പരിശോധിക്കുവാനാണോ ? ആവോ.... ദൈവത്തിനറിയാം.
പുറത്ത് മഴയുടെ നനുത്ത സ്പര്ശം ! യാത്രക്കാര് സുഖനിദ്രയിലാണ്. എന്തേ ഞാന് മാത്രം ഉറങ്ങാത്തത് ? നിദ്രാ ദേവി എന്നെ അനുഗ്രഹിക്കാത്തതോ അതോ ഞാന് ആട്ടിപ്പായിച്ചതോ ? ഞാന് ആട്ടിപ്പായിച്ചതാകാനേ വഴിയുളളൂ....!!
വീടും... നഗരവും .... പക്ഷികളും.... വൃക്ഷലതാദികളും മയക്കത്തിലാണ്...! എന്റെ സഹയാത്രികരും സുഖനിദ്രയിലാണ്. എന്തെല്ലാം കിനാവുകളാവും അവരൊക്കെ ഇപ്പോള് കാണുന്നുണ്ടാവുക ? ഒാരോരുത്തരുടേയും ഉറക്കത്തിന്റെ ഒാരോരോ രീതികള്....! ഏത് ദുഷ്ടനായാലും ക്രൂരനായാലും ഉറങ്ങുമ്പോള് പഞ്ചപാവം...!!
കാവല് മാടങ്ങളിലെ കാവല്ക്കാര് , വണ്ടി കടന്നു പോകുമ്പോള്..., ടോര്ച്ച് തെളിച്ചു കാണിക്കുന്നു. താന് ഉറങ്ങിയിട്ടില്ല എന്ന് ബോധ്യപ്പെടുത്താനാണോ.... അതോ മുമ്പോട്ടുളള പ്രയാണത്തിന് തടസ്സമൊന്നുമില്ല , ധൈര്യമായി പൊക്കോളൂ എന്നാണോ ?
ഒരു ചൂട് കാപ്പി കിട്ടിയിരുന്നെങ്കില്... എന്ന് ഞാന് ആത്മാര്ത്ഥമായും ആഗ്രഹിച്ചു. ഇടയ്ക്ക് ഒരു സ്റ്റേഷനില് വണ്ടി നിര്ത്തിയപ്പോള് കുറേപ്പേര് ഇരുന്ന് കാപ്പി കുടിക്കുന്നത് കണ്ടതു കൊണ്ടാണോ എനിയ്ക്കിപ്പോള് ഈ ആഗ്രഹം തോന്നിയത് ? ഏയ്... അല്ല. ഒരിയ്ക്കലും അല്ല . ഒരു കാപ്പി കിട്ടിയിരുന്നെങ്കില്.....!!
നദിയോ... കായലോ...? അറിയാന് കഴിയുന്നില്ല. എങ്കിലും ഓളപ്പരപ്പില് , നിലാവെളിച്ചം നീന്തിത്തുടിക്കുന്നത് കാണാന് ചേലുണ്ട് . കെട്ടു വളളങ്ങളോ ചങ്ങാടമോ.... അതോ മണല് മാഫിയയോ....എന്തുമാകട്ടെ... അവയിങ്ങനെ വെളളത്തിലൂടെ ഒഴുകി പോവുകയാണ് .
രാത്രി , ഇത്രയും മനോഹരിയാണോ...? പകലിന് ഒരു സൗന്ദര്യം.... രാത്രിക്ക് അതിലേറെ സൗന്ദര്യം....! ഇരുട്ടിനെ കീറി മുറിച്ചു കൊണ്ട് , കാട്ടിലൂടെ മലമ്പാതയിലൂടെ എന്റെ സഞ്ചാരം തുടര്ന്നു....
കണ്പോളകള്ക്ക് കനം വെച്ച് തുടങ്ങി ....പോ....പോ ഉറക്കമേ.... ഞാന് കാണട്ടെ... ഈ രാത്രി . ഈ രാത്രിയുടെ സൗന്ദര്യവും സൗരഭ്യവും ഞാന് ആവോളം അനുഭവിക്കട്ടെ... അമ്പിളിക്കുട്ടന് , എന്റെ കൂടെ.. ട്രയിനിന്റെ ഒപ്പം ഓടുകയാണ്. അല്ല പറക്കുകയാണ് . എനിയ്ക്ക് കൂട്ടു വരികയാണോ...? ഓടിയോടി ക്ഷീണിച്ചിട്ടുണ്ടാകും. പാവം... താഴേക്കിറങ്ങി വന്നെങ്കില്.... ആവോളം വെളളം കൊടുക്കാമായിരുന്നു . പുറത്ത് മിന്നലിന്റെ ശക്തി ഏറിയും കുറഞ്ഞും വന്നു .
തീപ്പെട്ടിക്കൂടുകള് ഒന്നിനു മുകളില് ഒന്നായി അടുക്കി വെച്ചതുപോലെ , കൂറ്റന് ഫ്ലാറ്റുകള്...! ഒരു ചെറിയ ചലനം മതി.... എല്ലാം നിലംപരിശാവാന്...!
സ്റ്റേഷനുകളിലെ ഒഴിഞ്ഞ സിമന്റു ബെഞ്ചുകളില് , അവിടവിടെയായി ഓരോരുത്തര് കിടന്നുറങ്ങുന്നു . രാത്രി വൈകി വരുന്ന തീവണ്ടികളില് പോകാനുളളവര് ആണോ ? അതോ.... തല ചായ്ക്കാന് , സ്ഥിരമായും സ്വന്തമായും ഒരിടം ഇല്ലാത്തതു കൊണ്ട് തല ചായ്ക്കാന് മാത്രം എത്തുന്നവരോ ?
വിശപ്പിന്റേയും ഉറക്കത്തിന്റേയും മുമ്പില് മനുഷ്യര് നിസ്സഹായരായി പോകുന്ന കാഴ്ചകള്....! പണക്കാരനെന്നോ പാവപ്പെട്ടവനെന്നോ ഉളള വക ഭേദം ഇല്ലാതെ പ്ലാറ്റ് ഫോമില് കിടന്ന് ഉറങ്ങുന്ന യാത്രക്കാര്....!!
എന്തുമാകട്ടെ..... സുഖമായി ഉറങ്ങട്ടെ....! ഉറങ്ങി , നല്ല പ്രഭാതത്തിലേക്ക് എത്തട്ടെ....!!
????!!!!?????!!!!!????!!!!!?????!!!!!! ആമി
No comments
Post a Comment
ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക