പ്രണയം കണ്ടു ഞാൻ

നിൻ നീലമിഴികളിൽ പ്രണയം കണ്ടു ഞാൻ
ആനന്ദബാഷ്പം പൊഴിക്കേ.
സുഖദമാം നിർവൃതി കനത്ത ശ്വാസമായ്
നെഞ്ചകക്കൂടൊന്നൊഴിഞ്ഞു.

മധുരസ്വപ്നങ്ങൾതൻ മഞ്ചലിലേറി നാം
തീക്കനൽക്കാടൊന്നു താണ്ടവേ
സുസ്മിതസന്ധ്യതൻ നേർത്തരേണുക്കളാൽ
മാനസം പ്രണയാർദ്രമായി.

ഉത്സവപ്പുലരിപോൽ മൌനമേളങ്ങളാൽ
നാമിന്ന് കോരിത്തരിക്കവേ
അനന്യസ്നേഹമൗനസ്മൃതികളാൽ
പ്രണയക്കാറ്റു ചുംബിക്കവേ

കുസുമദളങ്ങൾതൻ മഴയിൽ നനഞ്ഞു നാം
കൈകോർത്തു നൃത്തം ചവിട്ടവേ
യക്ഷകിന്നരഗന്ധർവ്വസംഗീതമങ്ങെങ്ങുമൊഴുകിപ്പരക്കവേ

വിണ്ണിലെ താരകൾ മിന്നിക്കുണുങ്ങി ഹാ
നമ്മുടെ നാമം രചിക്കേ,
ഹന്ത! അനുപമവശ്യ ഗന്ധങ്ങളാൽ
പാരിത് സ്വർലോകമായി.

By: 

രമേഷ് കേശവത്ത്‎