അറയ്ക്കലങ്ങാടിയിലെ വിശേഷങ്ങൾ-രണ്ട് ഗുണ്ട് നാണു

ഉത്സവ പിറ്റേന്ന് രാവിലെ. 
അമ്പലത്തിന് പിറകിൽ വെടിക്കെട്ട് നടന്ന പാടം.
പൊട്ടാതെ കിടക്കുന്ന ഓലപ്പടക്കം തേടി നടക്കുന്ന കുട്ടികൾ.
പെട്ടെന്ന് ഗംഭീര പൊട്ടിത്തെറിയുടെ ശബ്ദവും ഒപ്പം ഒരു അലർച്ചയും കേട്ടു. ആളുകൾ ഓടിക്കൂടി.
വീട് അടുത്തായതിനാൽ സുൽത്താനും ഓടിയെത്തി.
അപ്പോൾ കണ്ട കാഴ്ച ഹൃദയ ഭേദകമായിരുന്നു. കുമാരേട്ടന്റെ മോൻ നാരായണൻ കുട്ടി രക്തത്തിൽ കിടന്നു പിടയുന്നു. കാലിന്റെ തുടയിൽ നിന്ന് വലിയൊരു കഷ്ണം മാംസം അടർന്നു പോയിരിക്കുന്നു. രക്തം ധാരധാരയായി ഒഴുകുന്നു.
അലറി വിളിച്ചു കരയുകയാണ് നാരായണൻ കുട്ടി
"എന്താ പറ്റ്യേത് നാരായണൻ കുട്ട്യേ?"...ഓടിക്കൂടിയവർ ചോദിച്ചു.
"ഞാൻ ഗുണ്ട്"....എന്ന് പറഞ്ഞപ്പോഴേക്കും അവന്‌ ബോധം നഷ്ടപ്പെട്ടു.
"നാരായണൻ കുട്ടിയേട്ടന് പൊട്ടാത്ത ഒരു ഗുണ്ട് കിട്ടി, അത് മൂപ്പര് വരമ്പിന്റെ പൊത്തില് വച്ച് പൊട്ടിച്ചതാ"..... കണ്ടു നിന്ന ഒരു കുട്ടി പറഞ്ഞു.
ആളുകൾ താങ്ങിയെടുത്ത് നാരായണൻ കുട്ടിയെ തിരൂർ താലൂക്കാശുപത്രിയിൽ പ്രവേശിപ്പിച്ചു. ഒരു മാസം അവിടെ കിടന്നു. മുറിവെല്ലാം ഉണങ്ങി.
ആശുപത്രിയിൽ നിന്ന് പേര് വെട്ടി നാട്ടിലെത്തിയപ്പോൾ നാരായണൻ കുട്ടിയെന്ന അവന്റെ പഴയ പേര് നാട്ടുകാർ വെട്ടിക്കളഞ്ഞിരുന്നു. പകരം, "ഗുണ്ട് നാണു" എന്നാക്കി പേര്.
അന്ന് തൊട്ടു ഇന്ന് വരെയും നാട്ടിൽ അയാൾ "ഗുണ്ട് നാണു"വായി തുടരുന്നു. ഇനിയുള്ള കാലവും തഥൈവ.
.........തൊട്ടിയിൽ.......