ബലിച്ചോറ്.. (കവിത)

ആഗ്രഹങ്ങൾ പൂർത്തീകരിക്കാതെ മരിച്ചു
പോയോരിത്തിരി കിനാക്കളുണ്ടെൻ്റെയുള്ളിൽ
ചീഞ്ഞളിയും മുൻപേ മണ്ണിട്ട് മൂടിയവ.. 
മരിച്ചിട്ടേഴു തികഞ്ഞില്ല, ഉയർത്തെഴുന്നേറ്റൂ
പ്രേതാത്മാക്കളുടെ രൂപത്തിൽ..
ഉറക്കം നഷ്ടപ്പെട്ട രാത്രികളെയെനിക്ക്
സമ്മാനിച്ച കറുത്ത രൂപങ്ങൾ..
കൊത്തി വലിച്ചാർത്തലയ്ക്കുന്ന
ഭീകര സത്വങ്ങൾ...
ഇനി വരുന്നൊരു കർക്കിടകവാവിൽ
നൽകണമൊരു പിടി ചോറ്...
നനഞ്ഞ കൈകളെ കൊട്ടിയുറക്കെ കരയുമ്പോ,
ആർത്തിയോടുണ്ണുന്ന ബലികാക്കകളെ
ആത്മസംതൃപ്തിയാൽ നോക്കി നിൽക്കേണം...
ശാന്തിയടയട്ടെ.... മോക്ഷമില്ലാതലയുന്ന ,
പാതിയിലുപേക്ഷിക്കപ്പെട്ട പരേതാത്മാക്കൾ....

ദേവിക. ഒ. ബി