ഞാൻ വിശുദ്ധൻ

ഞാൻ വിശുദ്ധൻ
ഞാൻ മാത്രം വിശുദ്ധൻ
അതിവിശുദ്ധൻ 
നിങ്ങളെല്ലാം അശുദ്ധർ
തൊടരുതെന്നെ നിങ്ങൾ
അശുദ്ധമാക്കരുതെന്നെ
ഞാനാണ് ശരി
ഞാൻ മാത്രം ശരി
നിങ്ങളെല്ലാം തെറ്റുകാർ
ഞാൻ മാത്രം വിശുദ്ധൻ
നിങ്ങളെല്ലാം പാപികൾ.

ഞാൻ വിശുദ്ധൻ
അതിവിശുദ്ധൻ
ചുങ്കക്കാരനും വേശ്യയും -
എനിക്കറപ്പും അശുദ്ധിയും.
സമറിയക്കാരനെനിക്ക് -
തൊട്ടുകൂടാത്തവൻ.
വേദത്തിന്നുപമകളെനിക്കു -
പഴങ്കഥകൾ.
മഗ്ദലനവും സക്കായി -
യുമെനിക്ക് കൊടുംപാപികൾ.

ഞാൻ വിശുദ്ധൻ
അതിവിശുദ്ധൻ
ഒരു കഴുകനുമാണുഞാൻ.
ദൂരക്കാഴ്ചയുള്ള കഴുകൻ
കൂർത്ത ചുണ്ടുള്ളവൻ
ബലിഷ്ഠമാം കാലുള്ളവൻ
എന്റെ ലക്ഷ്യം ദൂരെയുള്ള -
ളിഞ്ഞ ശവങ്ങൾ.
കൊത്തിക്കീറിപ്പശിയടക്കും ഞാൻ
എന്നാലും ഞാൻ വിശുദ്ധൻ.

ഞാൻ വിശുദ്ധൻ
അതിവിശുദ്ധൻ
നല്ലൊരു വാൽസ്യായനുമാണുഞാൻ.
നിന്റെ നാരികളെനിക്കുള്ളത്
നിന്റെ കന്യകളെനിക്കുള്ളത്
വിധവകളെ നിഷ്ക്കരുണം ഭോഗിക്കു -
മെങ്കിലുമവരുടെ വീടുകൾ വിഴു -
ങ്ങുന്ന ഞാൻ വിശുദ്ധൻ.

ഞാൻ വിശുദ്ധൻ
അതിവിശുദ്ധൻ
ചിലപ്പോളന്ധനുമാണുഞാൻ
ഒട്ടിയ വയറുകൾ കാണുകില്ല
അന്യദുഃഖങ്ങളും കാണുകില്ല
തെരുവുകളുമെനിക്ക് കാണുകില്ല
എന്നയല്പക്കവും കാണുകില്ല
കണ്ണീരുമെനിക്ക് കാണുകില്ല.

ഞാൻ വിശുദ്ധൻ
അതിവിശുദ്ധൻ
ചിലപ്പോൾ ചെകിടനുമാണുഞാൻ
രോധനങ്ങളെനിക്ക് കേൾക്കുകില്ല
ആർത്തനാദങ്ങളും കേൾക്കുകില്ലാ -
ത്ത ഞാൻ വിശുദ്ധൻ.

ഞാൻ വിശുദ്ധൻ
അതിവിശുദ്ധൻ
ന്യായാധിപനുമാണുഞാൻ
വിധിക്കും നിഷ്ക്കരുണം,
നിങ്ങളെ ഞാൻ
ദയയില്ലെനിക്ക്.
എന്റെ കണ്ണുകൾ ചോപ്പുനിറം
എന്റെ ശരികൾ, ശരികൾ
ശിക്ഷിക്കും നിങ്ങളെ ഞാൻ -
എതിർവാദമുയർത്തിയാൽ.
എന്റെ ശരികൾ, എന്റെ ശരികളായ -
ഞാൻ വിശുദ്ധൻ.
=================================

(സമൂഹത്തിലെ വിശുദ്ധർക്ക് വേണ്ടി സമർപ്പിക്കുന്നു )

ബിനു കല്ലറക്കൽ.