ഒന്നിനും മായ്ക്കാനാകാതെ.... (ചെറു അനുഭവ കഥ)

നെറ്റിൽ സ്വതന്ത്രദിന സന്ദേശങ്ങൾ വാരി ചൊരിയുന്ന ഇടയിലാണ് കുഞ്ഞൂട്ടന്റെ വിളിക്കേട്ടത്.
ഉണ്ണ്യാാമ്മാാ... 
അവൻ ദേശീയ പതാകയും പിടിച്ച് എന്നെ കാണിക്കാൻ ഓടി വരികയാണ്. സ്കൂളിലെ സ്വാതന്ത്രദിനാഘോഷത്തിൽ പങ്കെടുത്ത് വരികയായിരുന്നു. പെട്ടെന്നാണ് അത് സംഭവിച്ചത്. ഒരു കല്ലിൽ തട്ടി അവൻ എന്നെ നോക്കിയുള്ള വിളിക്കിടയിൽ വീണിരുന്നു.
ഞാൻ ഫോണും പിടിച്ച് അവനെ വാരിയെടുക്കാൻ ഓടിയടുത്തു.
കാൽ മുട്ടും കൈമുട്ടും പൊട്ടി ചോര ഒലിക്കുന്നുണ്ടായിരുന്നു. ഞാൻ പെട്ടെന്ന് അവനെ എഴുന്നേൽപ്പിക്കുമ്പോൾ, കൈയ്യിലെ പതാക നോക്കി അവൻ പറഞ്ഞു;
നെഞ്ചോട് മുറുകെ പിടിച്ചത് കൊണ്ട്.. മാമാ.. പതാകയ്ക്ക് ഒന്നും പറ്റിയില്ല...
സത്യത്തിൽ, ആനേരം അവനെ നോക്കി സല്യൂട്ട് ചെയ്യാൻ തോന്നി എനിക്ക്.
അതെ നമുക്ക് കുഞ്ഞുങ്ങളിൽ നിന്ന് രാജ്യ സ്നേഹം വളർത്താൻ ശ്രമിക്കാം. കാരണം, വലിയ കല്ലിൽ എഴുതിയാൽ തിരുത്താൻ എളുപ്പമാണ് ചെറിയ കല്ലിൽ എഴുതിയാൽ ഉറച്ചിരിക്കും, മായ്ച്ചു കളയാൻ പറ്റാത്ത വിധം.

ഉണ്ണി കാഞ്ഞങ്ങാട്