വാട്സാപ്പ്

ഹായ്....
രാവിലെ വാട്സാപ്പ് തുറന്നപ്പോ അപരിചിതമായ നമ്പറിൽ നിന്നാണ്...

ഇതാരാപ്പ ഇവിടെ ഹോയ് വിട്ടേ...

നെറ്റ്സ്ലേ യായത് കൊണ്ട് ഫോട്ടോ നോക്കാൻ കുറച്ച് മിനക്കെട്ടു...

എവിടെയോ നല്ല പരിചയമുള്ള മുഖം... കുറെ നേരം ആലോചിച്ചാണ് ആളെ പിടി കിട്ടിയത്

ഫസൽ...

വെളുത്ത് കൊല്ലുന്നനെ ഇരുന്നവൻ തടിച്ച് കുട്ടപ്പനായിട്ടുണ്ട് .... അതാണ് മനസ്സിലാവാൻ സമയമെടുത്തത്...

കൂടെ പഠിച്ചവനാണ്...
പണ്ടെന്റെ ഓട്ടോഗ്രാഫിൽ കടൽ തീരത്തെ മണൽ തരികളെ എന്നെങ്കിലും ആരെങ്കിലും എണ്ണി തീർന്നാൽ അന്ന് ഞാൻ നിന്നെ മറന്നോളാമെന്ന് എഴുതിയവനാ....

പക്ഷേ ഒരിക്കൽ പോലും സൗഹൃദത്തിനപ്പുറം ഒരിഷ്ടം അവൻ കാണിച്ചിട്ടില്ല....

ഏഴ് വർഷത്തിന് ശേഷം ആണ് ഒരു ഹായ്...

തിരിച്ചും ഒരു ഹോയ് അങ്ങ് വിട്ടു...

സെക്കന്റുകൾക്കുള്ളിൽ റിപ്ലെ വന്നു,സുഖമാണോ? ഹസ്ബന്റും മോനുമൊക്കെ സുഖമല്ലേ...

അതേല്ലോ...???

നിനക്ക് സുഖമാണോ???

സുഖം...

പിന്നെ കുറെ വിശേഷങ്ങൾ....

കൂട്ടുകാർ നാട്ടുകാർ തുടങ്ങി ലോകകപ്പ് വരെ ചർച്ച ചെയ്തു...

ചാറ്റ് അവസാനിപ്പിച്ചപ്പോഴാണ് അവന്റെ ഫാമിലിയെ പറ്റി ഒന്നും ചോദിച്ചില്ലല്ലോ എന്ന തോന്നൽ മനസ്സിലുദിച്ചത്...

കല്യാണം കഴിച്ചതും മോനുണ്ടായതുമൊക്കെ മറ്റു കൂട്ടുകാരിൽ നിന്നറിഞ്ഞിരുന്നു....

ലവൻ ഓൺലൈനിൽ നിന്ന് പോയെങ്കിലും ഞാൻ എന്റെ ചോദ്യം ചോയ്ച്ചു....

നിന്റെ ഫാമിലി????? നേരത്തെ ചോയ്ക്കാൻ മറന്ന് പോയതാ...

ഒരു ഒന്നര മണിക്കൂറിന് ശേഷം റിപ്ലെ വന്നു...

ഫാമിലിയെ കുറിച്ചോർത്തപ്പഴാ ഞാൻ ഇന്ന് നിന്നെ ഓർത്തത്...

ങ്ങേ ...?
ഞാൻ കണ്ണു തുറിച്ചൊരു സ്മൈലിയിൽ ഒതുക്കി...

ലവൻ വീണ്ടും: ജാതി മതം ഒക്കെ നോക്കി വീട്ടുകാരും നാട്ടുകാരും ബന്ധുക്കളുമൊക്കെ എന്ത് വിചാരിക്കും എന്ന ചിന്തയിൽ എന്റെ വികാര വിചാരങ്ങളെ ഞാൻ മനസ്സിലൊതുക്കി, മനസ്സിൽ തോന്നിയ ഇഷ്ടത്തെ സ്വയം കുഴി വെട്ടി കുഴിച്ച് മൂടി.... വീട്ടുകാരുടെ ഇഷ്ടപ്രകാരം കെട്ടി ഒരു കുട്ടീം ആയി.... പക്ഷേ പല വിധ കാരണങ്ങളാൽ ഒത്തുപോവാൻ പറ്റീല്ല.... ഇപ്പോ രണ്ടും രണ്ട് വഴിക്കായി...

മ്മ് ... ഞാൻ രണ്ട് മൂന്ന് Mmmm വിട്ടു...

ലവൻ വീണ്ടും: ചില ഇഷ്ടങ്ങൾ ജീവിതത്തിലെ വലിയ നഷ്ടങ്ങളായിരിക്കും അല്ലേ...?

മ് മ് ആണോ?? ചെലപ്പ ആയിരിക്കൂല്ലേ....

ഓർക്കുന്തോറും സൗന്ദര്യം കൂടി വരുന്ന ചില ഓർമ്മകൾ.. ചിലരുടെ നോട്ടം നടത്തം സൗഹൃദം അങ്ങനെ എന്തൊക്കെയോ..... എല്ലാം നഷ്ടങ്ങളായിരുന്നു...

എന്റെ ജീവിതത്തിലെ വലിയ രണ്ടിഷ്ടങ്ങളെ ഒരിക്കലും നഷ്ടപ്പെടുത്താനാഗ്രഹിക്കാത്തോണ്ട് മറ്റുള്ളവരുടെ നഷ്ടങ്ങളിൽ അമിത സങ്കടം രേഖപ്പെടുത്താൻ നിൽക്കാതെ ഒരു മൂന്നാലു ഇളം സ്മൈലിയിൽ മ്മള് മറുപടി യങ്ങ്ഒതുക്കി...

അപ്പോ പറഞ്ഞ് വന്നത് ഇതാണ്... ആർക്കെങ്കിലും ആരോടെങ്കിലും ഇഷ്ടം തോന്നുന്നെങ്കിൽ ഇപ്പോത്തങ്ങട് പറയാ....

പിന്നെ ചിരീം നടത്തോം വർത്താനോം ഒക്കെ ഓർത്തോർത്ത് കിട്ടിയ ജീവിതം കളഞ്ഞ് കുളിക്കാതിരിക്കാല്ലോ... അതോണ്ടാ....

Rinna Jojan