കണ്ണുനീർ നനവുള്ളൊരു ഉമ്മ

''ഒരു ഉമ്മ താടി ....''

'പോ ചെക്കാ ...ഇരുന്നു ജോലിയെടുക്കു ...'

''ജോലി ചെയ്യാൻ ഒരു ഉണ്മേഷൊക്കെ വേണ്ടേ ...നീയൊരു ഉമ്മ താ....''

'ഇല്ല ...'

''ന്നാ പോ വച്ചിട്ട് ....''

'അയ്യോടാ ...അപ്പഴേക്കും പിണങ്ങിയോ ന്റെ ചെക്കൻ ...'

''നീ പോയെ .....''

'അപ്പൊ ഉമ്മ വേണ്ടേ .....'

''തരുവോ ....''

'ഉം ...'

''ന്നാ താ .....''

'ഉമ്മ ....'

''അയ്യേ ഇതെന്തുമ്മ ...നല്ല ചക്കര ഉമ്മ താ ..ചുണ്ടിൽ ...''

'അയ്യേ പോടാ ...ഞാൻ പോവാ പണി ണ്ടു ...'

..........................................................................

ഓഫീസിലെ കറങ്ങുന്ന കസേരയിലമർന്നിരുന്നു ഓൺലൈൻ കാമുകിയോട് കൊഞ്ചുകയായിരുന്നു ഞാൻ .ചുണ്ടിൽ ഉമ്മ ചോദിച്ചപ്പോഴേക്കും അവൾ വച്ചിട്ട്പോയി . അങ്ങിനെ ഫോൺ മേശപ്പുറത്തു വച്ച് ജോലി തുടരാനായി ഞാൻ കമ്പ്യൂട്ടർ കീബോര്ഡിലേക്കു വിരലുകളമർത്തി ....

അപ്പോഴതാ വീണ്ടും ഫോണിൽ ഒരു മെസ്സേജ് വന്നു ചിലയ്ക്കുന്നു ,ഞാൻ ഫോണെടുത്തു നോക്കി ചേട്ടത്തിയാണ് ഇന്നലെ രാത്രിയിലും ചേട്ടത്തി മെസ്സേജ് അയച്ചിരുന്നു.പക്ഷെ അവളോട് കൊഞ്ചുന്നതിനിടയിൽ ഞാനതു ശ്രദ്ധിച്ചിരുന്നില്ല .

എന്തായാലും മെസ്സേജ് തുറന്നു നോക്കാമെന്ന ചിന്തയിൽ ഞാൻ ലോക്ക് മാറ്റി നോക്കി .മെസ്സേജ് കണ്ടതും ഞാനാകെ തകർന്നുപോയി.പെട്ടെന്ന് എന്റെ മനസ്സിൽ മിന്നിമാഞ്ഞ വികാരങ്ങൾ എന്താണെന്നു പറഞ്ഞറിയിക്കാൻ കഴിയുന്നില്ല.

"' കിച്ചു അമ്മയുടെ പിറന്നാളാണ് ട്ടോ നാളെ ,മറക്കാതെ വിഷ് ചെയ്യണേ "'

''കിച്ചു ഇന്ന് അമ്മയുടെ പിറന്നാളാണെന്നു ഞാൻ പറഞ്ഞതല്ലേ ...ന്താ അമ്മയെ വിളിക്കാത്തെ?''

ഇപ്പോൾ ന്റെ മനസ്സിൽ ശരിക്കും എന്താണ് ? കുറ്റബോധമാണോ അതോ ....

ഇന്നുവരെ നേരിട്ട് കണ്ടിട്ടില്ലാത്ത ,അവളുടെ പിറന്നാൾ ഞാൻ ഓർത്തുവച്ചിരുന്നു ,കൃത്യം പന്ത്രണ്ടു മണിക്ക് അവളെ വിളിച്ചു ആശംസിച്ചു ,ഉമ്മകൾ കൊടുത്തു സമ്മാനങ്ങൾ വാങ്ങാനായി കാശയച്ചുകൊടുത്തു ...പക്ഷെ അമ്മയുടെ പിറന്നാൾ ഞാൻ മറന്നിരിക്കുന്നു ..നാട്ടിലെ സമയം വച്ചിപ്പോൾ അവിടെ ഉച്ചയായുണ്ട്, ന്താ പ്പോ അമ്മയോട് പറയുക ...

എന്തായാലും വിളിക്കതന്നെ...ഞാൻ ഫോണെടുത്തു അമ്മയുടെ നമ്പർ ഡയൽ ചെയ്തു , റിങ് ണ്ടു .....

''''ഹെല്ലോ...''''

''ഹാ അമ്മെ ,ഞാനാ ....പിറന്നാൾ ആശംസകൾ ട്ടോ ...''

''''അയ്യൂ ...ന്റെ പൊന്നുമോൻ എങ്ങിനറിഞ്ഞു ,ശ്ശൊ ഓർത്തുവച്ചിരുന്നോ ന്റെ കണ്ണൻ .....''''

ആ വാക്കുകളിലെ സന്തോഷം അത് ന്റെ കണ്ണുകളെ ഈറനണയിക്കാൻ തുടങ്ങിയിരുന്നു ..പക്ഷെ അമ്മയോട് കള്ളം പറയാൻ തോന്നിയില്ല ...

''അമ്മെ ..അത് ....ചേട്ടത്തി മെസ്സേജ് ഇട്ടിരുന്നു ...ഇപ്പഴാ കണ്ടത് ...''

''''ആഹാ ...അവള് മെസ്സേജ് ഇട്ടോ ...ന്നാലും ന്റെ മോൻ വിളിച്ചല്ലോ ..അമ്മയ്ക്ക് ഒത്തിരി സന്തോഷായി ...അമ്മേടെ ചക്കരക്കുട്ടനാ ഉമ്മ ...... ന്റെ മോൻ വല്ലതും കഴിച്ചോ ? ''''

''ഉവ്വ് , കാലത്തു കഴിച്ചിരുന്നു ......പിറന്നാളായിട്ട് ആഘോഷമൊന്നൂലെ അമ്മെ?''

''''കുഴീലോട്ടു കാലും നീട്ടിയിരിക്കുന്ന 'അമ്മ എന്താഘോഷിക്കാനാ മോൻകുട്ടാ ...'''' 'അമ്മ അങ്ങനെയാണ് സ്വന്തം കാര്യങ്ങളിൽ ആ പാവം ഒരിക്കലും സന്തോഷിച്ചു ഞാൻ കണ്ടിട്ടില്ല ...

''ന്നാലും ...?''

'''''അമ്മ കാലത്തു അമ്പലത്തിൽ പോയി അർച്ചന നടത്തി , പായസം കഴിപ്പിച്ചു ..പിന്നെ ദേ ഊണ് കാലമാകുന്നു ,പ്രത്യേകിച്ചൊന്നുമില്ല ...ഇത്തിരി പരിപ്പും പപ്പടോം ....''''

''ഇത്തിരി പായസം വച്ചൂടാരുന്നോ ?''

''''ഓ ...കാലത്തു അമ്പലത്തിൽ ന്നു കൊണ്ടുവന്നിരുന്നല്ലോ പിന്നെന്തിനാ..അല്ലേലും ഇവിടെ വച്ചാലും ,പാല്പായസ്സാണെൽ മാത്രം നിന്റെ ചേട്ടത്തി കഴിക്കും ,അമ്മയ്ക്ക് പിന്നെ ഇത്തിരി മതിയെ, അച്ഛനാണേൽ ഒന്ന് തൊട്ടു നാവിൽ വക്കും പിന്നെന്തിനാ വെറുതെ.... ''''

''''വെറുതെയാ കിച്ചു മക്കളുമാര് അടുത്തില്ലാത്തോണ്ട് ആഘോഷമൊന്നും വേണ്ടെന്നു അച്ഛനെ പറഞ്ഞു ചട്ടം കെട്ടിയതാ''''... ചേട്ടത്തി അടുത്ത്നിന്ന് വിളിച്ചു പറയുന്നത് നിക്ക്
കേൾക്കാമായിരുന്നു .....

''ആണോ അമ്മെ ,,,? ഞങ്ങൾ അടുത്തില്ലെങ്കിലെന്താ അച്ഛനും ചേട്ടത്തിയും ണ്ടല്ലോ ...''''

ഒരു മൗനം മാത്രമായിരുന്നു മറുപടി'......

''ഉം ...ന്താ അമ്മയ്ക്ക് പിറന്നാൾ സമ്മാനം വേണ്ടത് ?''

''''അമ്മയ്ക്കൊന്നും വേണ്ട കുട്ടാ ...ന്റെ മോൻ വിളിച്ചത് തന്നെ വലിയ സന്തോഷം ..ആ ശബ്ദം കേട്ടല്ലോ ...അതില്കൂടുതലെന്താ ....''''

''ഉം ....പിന്നെ വേറെന്തൊക്കെയാ അമ്മെ വിശേഷങ്ങൾ ...''

''''വിശേഷങ്ങളായിട്ടൊന്നൂല മക്കളെ ...ഇനീപ്പോ ഊണ് കഴിക്കണം അച്ഛൻ വരാറായി ,പിന്നെ നാളെ നിന്റെ ചേട്ടത്തി അവളുടെ വീട്ടിലോട്ടു പോവും ..അച്ഛൻ വരുന്നവരെ 'അമ്മ ഒറ്റയ്ക്കിരിക്കേണ്ടിവരും ...ഇതൊക്കെത്തന്നെ ...''''

''ഹ്മ്മ് .....ന്നാൽ ശരി അമ്മെ ...ഞാൻ വയ്ക്കട്ടെ ...ജോലി ണ്ടു ...''

അത് പറയും മുന്നേ ന്റെ ഹൃദയത്തിൽ നിന്നും എന്തോ ഒരു വികാരം ഒരു തീപോലെ ഞരമ്പുകളിൽകൂടെ ചുണ്ടിലെത്തി നിന്നിരുന്നു പക്ഷെ കാമുകിക്ക് ഉമ്മകൾ വാരിക്കോരി കൊടുത്ത ന്റെ അപകർഷതാബോധമാകാം ചുണ്ടിൽ വരെ എത്തിയ ആ ഉമ്മ ഞാൻ വേണ്ടെന്നു വച്ചു....

''''ന്നാൽ ശരി മക്കളെ പൈസ കളയണ്ട ......''''

''ഉം ....''

''''കണ്ണാ ...''''

''ന്തോ ....''

''''അമ്മയ്ക്കൊരു ഉമ്മ താടാ കുട്ടാ ......''''

സ്തബ്ദനായിപ്പോയി ഞാൻ , തകർന്നു പോയി , എന്നോട് തന്നെ പുച്ഛവും ദേഷ്യവും അമർഷവും തോന്നിയ നിമിഷം ,മാതൃഹൃദയം അറിയാതെ പോയവനെന്നു സ്വയം സഹതപിച്ചുപോയ നിമിഷം ......

നിറഞ്ഞ കണ്ണുകൾ ഇറുക്കി അടച്ചു ആ അമ്പോറ്റി മുഖം മനസ്സിലങ്ങിനെ വിരിയിച്ചെടുത്തു ആ നെറ്റിയിൽ ന്റെ ചുണ്ടുകളമർത്തി ന്റെ അമ്മക്കിളിയെ ഞാൻ ചുംബിച്ചു, കണ്ണുനീർ നനവുള്ളൊരു ഉമ്മ ..........
ഫോണിലൂടെ ഞാൻ കേട്ട ചെറിയൊരു തേങ്ങൽ , അതെനിക്ക് മനസ്സിലാക്കി തന്നിരുന്നു ആ ഒരു ചുംബനത്തിനു എത്രമാത്രം വിലയുണ്ടായിരുന്നെന്നു ....എത്രമാത്രം അർത്ഥങ്ങളുണ്ടായിരുന്നെന്നു ....

ഫോൺ വച്ച ശേഷം ആ കറങ്ങുന്ന കസേരയിലേക്ക് ഒരു ദീഘനിശ്വാസത്തോടെ ഞാനൊന്നു ചാരിയിരുന്നു. ന്റെ കണ്ണുനീരിന്റെ കുത്തൊഴുക്കിനെ തടയാൻ കൺപീലികൾ നന്നേ പാടുപെടുന്നുണ്ടായിരുന്നു ........

അപ്പോഴും ന്റെ ഫോൺ ചിലച്ചുകൊണ്ടേയിരുന്നു
....

കിരൺ കൃഷ്ണൻ....