കൂട്ട് കുടുംബം

ചെന്നൈയിലെ അടച്ചിട്ട ഫ്ലാറ്റ് മുറികളിൽ ഇരിക്കുമ്പോൾ ഞാൻ ഏറ്റവും കൂടുതൽ മിസ് ചെയുന്നത് നാട്ടിലെ എന്റെ വീടിനെയാണ്.വീടെന്നു പറഞ്ഞ അതൊരു കൂട്ട് കുടുംബം ആണ്.ബഹളങ്ങളിൽ മുങ്ങിയ വീട് പല സൈസ് ബഹളങ്ങൾ. അയൽ വീടുകളിൽ ഒക്കെ താമസിക്കുന്നത് ബന്ധുക്കൾ തന്നെ,വീടുകളെ തമ്മിൽ വേ൪ തിരിക്കാൻ മതിലും വേലിയും ഒന്നൂല്ല.
ചെറുപ്പത്തിലൊക്കെ വല്യ സങ്കടാരുന്നു വീട്ടിൽ ആളുംബഹളവും ഒഴിഞ്ഞ നേരം കാണില്ല. രഹസ്യം എന്നൊന്നില്ല എല്ലാം എല്ലാവര്ക്കും അറിയാം, ഒരാൾ എത്ര മണിക്ക് എഴുന്നേറ്റു, എപ്പോ കുളിച്ചു, എത്ര ദോശ തിന്നു തുടങ്ങി എല്ലാവരുടെയും എല്ലാ കാര്യങ്ങളും എല്ലാവര്ക്കും അറിയാം. പക്ഷെ എന്ത് കാര്യത്തിന് എപ്പോ വിളിച്ചാലും ഓടി വരാൻ ആൾക്കാർ കാണും.

വൈകുംനേരങ്ങളിൽ എല്ലാ വീട്ടിലെയും വനിതാരത്നങ്ങൾ ഒരുമിച്ചു കൂടും. ഓരോരുത്തർക്കും ഓരോ കഥകൾ പറയാൻ ഉണ്ടാകും. അമ്മായിഅമ്മ മരുമകൾ പോര്, പുതിയ സാരി,സ്വർണം ഇത്യാദി എണ്ണിയാൽ ഒടുങ്ങാത്രത്ര വിശേഷങ്ങൾ അവർക്കു പങ്കു വെയ്ക്കുവാൻ കാണും . ചെറിയമ്മ കല്യാണം കഴിഞ്ഞ ഉടനെ ചെറിയച്ഛന്റെ കൂടെ ഗുരുവായൂർ പോയതും, ഒരു സാരീ വാങ്ങിപ്പിക്കാൻ ഒരു ദിവസം മുഴുവൻ വല്യച്ചനോട് വലിയമ്മ മിണ്ടാതിരുന്നതും ഒക്കെയായി എത്ര എത്ര ഒക്കെ കഥകൾ .
ഈ വർത്തമാനങ്ങൾ കേൾക്കാൻ എങ്ങാനും അവർ സംസാരിക്കുന്നിടത്തു പോയ അപ്പൊ ഓടിച്ചു വിടും, ഇതൊന്നും ചെറിയ കുട്ടികൾ കേൾക്കണ്ടാന്നു പറഞ്ഞു. അതുകൊണ്ട് പാത്തും പതുങ്ങിയും അവരുടെ വർത്തമാനം കേൾക്കാൻ എനിക്ക് പെരുത്തിഷ്ടമായിരുന്നു.
അന്നും പതിവ് പോലെ വനിതാരത്നങ്ങൾ സഭ കൂടിയിരിക്കുകയാണ്,അവരുടെ സംസാരം കേൾക്കാൻ ഒരു ടെസ്റ്റു ബുക്കും കയ്യിൽ തുറന്നു പിടിച്ചു രണ്ടു ചെവിയും അവരുടെ വർത്തമാനം കേൾക്കുന്നതിന് മാത്രം ഡെഡിക്കേറ്റ് ചെയ്തു ഞാനങ്ങനെ ഇരിക്കുവാണ്.അപ്പോഴാണ് ഒരു വനിതാരത്നത്തിന്റെ ശ്രദ്ധ അടുത്ത വീട്ടിലെ ഒരു ചേച്ചിയിൽ പതിഞ്ഞത്.
വനിതാരതനം 1: അപ്പുറത്തെ ആ കൊച്ചിന്റെ പ്രസവം ഈ മാസം ആണുല്ലേ, ആൺകുട്ടി ആരിക്കും സംശയം വേണ്ട
വനിതാരതനം 2 : അതെ അതെ വയറു കണ്ടാലേ അറിയാം ആൺ കുട്ടി തന്നെ
സഭയിലെ എല്ലാ അംഗങ്ങളും ശെരി വെച്ചു.
പിന്നെ വയറു കണ്ട ഉടനെ അങ്ങ് മനസിലാവല്ലേ കുട്ടി ആണോ പെണ്ണോ എന്ന് ശുദ്ധ അസംബന്ധം. അതൊക്കെ ഡോക്ടറിന് സ്കാൻ ചെയ്തു നോക്കിയാല് മനസ്സിലാവൂ, ഇന്ത്യയിൽ സ്കാനിങ്ങിലൂടെ ആണോ പെണ്ണൊന്നു അറിയുന്നതേ കുറ്റകരമാ, തലേന്ന് സുവോളജി ക്ലാസ്സിൽ റീപ്രൊഡക്ഷൻ ചാപ്ടറിൽ പഠിച്ചതൊക്കെ വെച്ചു ഞാനൊരലക്കലാക്കി. അങ്ങനെ പറഞ്ഞു പറഞ്ഞു ഞാനു൦ അവരും ഒടുക്കത്തെ അടി

വനിതാരതനം 1 : മോളെ ആ വയറു കണ്ടിട്ട് ഞങ്ങൾ പറയുവാ കുട്ടി ആണ് തന്നെ പന്തയം വെച്ചോ
അങ്ങനെ ഈ ഗർഭ കേസുകളിൽ ഒരു മുന്പരിചയവും ഇല്ലാത്ത ഞാൻ 1 ഉം 2 ഉം പിള്ളേരെ നല്ല സ്റ്റൈൽ ആയി പെറ്റ അവരോട് പന്തയം വെച്ചു. 2 ആഴ്ച കഴിഞ്ഞു ഞാൻ ഒരു ബുക്കും വായിച്ചു പുറത്തു സിറ്ഔട്ടിൽ ഇരിക്കാണ്,അപ്പൊ അതാ വരാണ് വനിതാരതനം 1 " മോളെ അഞ്ചു അപ്പുറത്തെ ആ കൊച്ചു പ്രസവിച്ചുട്ടോ ആൺകുട്ടിയാ,ഞങ്ങൾ അന്നേ പറഞ്ഞില്ലേ അത് ആൺകുട്ടീ ആവുമെന്ന്" ഞാൻ ഒന്ന് ഞെട്ടി വനിതരത്‍നത്തിന്റെ കണ്ണിലേക്ക് സൂക്ഷിച്ചു നോക്കി ഇനി ഇവരുടെ കണ്ണുകളിൽ വല്ല യന്ത്രവും ഫിറ്റ് ചെയ്തിട്ടുണ്ടോ ?
By Anjali Kini