പഠിക്കാത്തവരുടെ ശ്രദ്ധയ്ക്ക്.

വർഷങ്ങൾക്ക് മുമ്പ് പത്താം ക്ലാസ്സിലെ യാത്രയപ്പ് ദിനം.
ഓരോ മാഷുമാരും ടീച്ചർമാരും ക്ലാസ്സിൽ വന്ന് കുട്ടികളോട് വളരെ വിഷമത്തിൽ യാത്ര പറയുകയും നല്ല ഉപദേശങ്ങൾ തരുകയും ചെയ്തത് ചില നേരങ്ങളിൽ ഓർക്കാറുണ്ട്.

നിങ്ങളെ തല്ലിയിട്ടുണ്ടെങ്കിൽ അത് നിങ്ങളുടെ ഭാവിയ്ക്ക് വേണ്ടിയാണെന്നും ഒരിക്കലും ശിക്ഷിക്കണമെന്ന ആഗ്രഹം കൊണ്ടല്ല എന്നും പറഞ്ഞ് സ്നേഹപൂർവ്വം യാത്രയാക്കിയ അദ്ധ്യാപകർ ആണ് ഏറെയും.
ക്ലാസ്സിലെ ഒന്നുങ്കിൽ നല്ല കുട്ടിയാകുക അല്ലെങ്കിൽ ചീത്ത കുട്ടിയാകുകയും ചെയ്താൽ ഒരിക്കലും ടീച്ചർമാർ അവരെ മറക്കാറില്ലന്നും മീഡിയം കുട്ടികളെ കുറച്ച് കഴിഞ്ഞാൽ പേര് ഓർക്കുക പ്രയാസമാണെന്നും അതിനാൽ ഞങ്ങളെ നിങ്ങൾ എന്നു കണ്ടാലും ചിരിച്ച് സംസാരിക്കാൻ വരണം എന്നും പറഞ്ഞിട്ടുള്ളത് സ്നേഹപൂർവ്വം ഓർക്കുന്നു.

ഇതിനിടയിലാണ് ഏറ്റവും രസികനായ ഒരദ്ധ്യാപകന്റെ അവതരണം നിങ്ങളോട് സൂചിപ്പിക്കുന്നത്.
എന്തും തമാശ രൂപേണയാണ് ആൾ പറഞ്ഞ് തരാറുള്ളത്.
അത് കൊണ്ട് ബോറഡിക്കാതെ സമയം പോകും.
മാഷും പതിവുപോലെ അന്ന് ക്ലാസ്സിൽ വന്നു.
എല്ലാ ദിവസത്തേയും പോലെ ചിരിച്ച് വരാതെ അല്പം വിഷമം മുഖത്ത് കാട്ടിയായിരുന്നു വരവ്. കുട്ടികൾക്കും ആകെ പ്രയാസമായി. വേദനിപ്പിച്ചിട്ടുണ്ടെങ്കിൽ ക്ഷമ ചോദിക്കുകയും ചെയ്തതിനു ശേഷം കുറച്ച് നല്ല ഉപദേശങ്ങൾ.

നല്ല മാർക്കിൽ പഠിച്ച് SSLC പാസ്സായാൽ കോളേജിൽ എളുപ്പം സീറ്റ് ലഭിക്കും.
സീറ്റിന് ആരുടേയും ശുപാർശ ആവശ്യമായി വരുകയില്ല.
ഇഷ്പ്പെട്ട ഗ്രൂപ്പും ലഭിക്കും.
അതിനാൽ കഴിവുള്ള എല്ലാവരും ഫസ്റ്റ് ക്ലാസ്സിൽ തന്നെ പാസാകണം.
അല്ലെങ്കിൽ 300 മാർക്കെങ്കിലും വാങ്ങി സെക്കന്റ് ക്ലാസ്സ് .
(അന്ന് 600ൽ ആണ് SSLC)
മാഷ് തുടർന്നു......

ഇനി അഥവാ 210 ഓ അതിലും കുറവ് മാർക്ക് നേടിയാലും പേടിക്കേണ്ട.
അവർക്കും കിട്ടും ഇതേ SSLC ബുക്ക്.
പക്ഷെ ആ ബുക്കിന് വേറെ ചില പ്രത്യേക ഉപയോഗം ആണ് വരിക എന്നു മാത്രം.

ഇതും പറഞ്ഞ് മാഷ് പറഞ്ഞു....
അത്തരക്കാർ ഞാൻ പറയുന്നത് ഇനി ശ്രദ്ധിച്ച് കേൾക്കണം.

കയ്യിലുള്ള നോട്ടുബുക്കിലെ ഒരു പേജ് മാഷ് എടുത്തു.
ഏകദേശം ഈ വലുപ്പം ഉണ്ടാകും SSLCബുക്ക്.
ഒരു 16 പേജ് അഥവാ ചട്ട മാറ്റിയാൽ 8 ഷീറ്റ് ഉണ്ടാകും എന്നർഥം. മനസ്സിലായോ?

കുട്ടികൾ വലിയ ആകാംഷയിൽ ആയിരുന്നു.
മാഷ് എന്തോ വലിയൊരു കാര്യം നമ്മുക്ക് വേണ്ടി പറയാൻ പോകുന്ന പ്രതീതി
.
ഇനി അവർ ഇത് നടു മടക്കണം. അപ്പോ 8 എന്നത് 16 ഷീറ്റ് ആയി.
മനസ്സിലായോ?

എല്ലാവരും ഉവ്വ് എന്നർത്ഥത്തിൽ തലയാട്ടി.

ഇനി നിങ്ങൾ കയ്യിലുള്ള പേനാക്കത്തി ഉപയോഗിച്ച് ശ്രദ്ധിച്ച് 16 ഷീറ്റ് ആയി കട്ട് ചെയ്യണം.

കാര്യം തമാശയിലേക്കാണ് പോകുന്നത് എന്ന് അപ്പോഴാണ് കുറെയെണ്ണത്തിന് ഓടിയത്.

അതിനു ശേഷമുള്ള കാര്യവും വളരെ ശ്രദ്ധിക്കണം.
ഒരടി നീളത്തിൽ ഒരു ടെലിഫോൺ കമ്പി ഫ്ലയർ ഉപയോഗിച്ച് കട്ട് ചെയ്യണം.
എന്നിട്ട് S ആകൃതിയിൽ വളക്കുക. അപ്പോ ഒരു ഹുക്കിന്റെ ഉപയോഗം ഈ കമ്പി കഷ്ണം കൊണ്ട് നടക്കും.

മാഷിന്റെ മുഖത്തും നിറഞ്ഞ പുഞ്ചിരിയായി തുടങ്ങി.
അതിനു ശേഷം ഈ 16 ഷീറ്റും ഈ ഹുക്കിൽ കോർത്ത് ടോയ്ലറ്റിന്റെ
കോണിൽ തൂക്കിയിട്ടാൽ വിമാനത്തിലെ പോലെ വെള്ളത്തിനു പകരം ഉപയോഗിക്കാം.

എല്ലാവരും പൊരിഞ്ഞ ചിരി. വളരെ പ്രതീക്ഷയോടെ കേട്ടിരുന്നിട്ട് മാർക്ക് കുറയുന്നവർക്ക് ഉള്ള SSLC ബുക്കിന്റെ ഉപയോഗം അവതരണം വളരെ രസിപ്പിച്ചു.

ഈ ബിറ്റ് മാഷിന്റെ സൂപ്പർ ഹിറ്റ് ആയതു കൊണ്ടാകാം ഈ അടുത്ത് മാഷിനെ ഒരു ഹോട്ടലിൽ വച്ച് കണ്ടപ്പോൾ വിശേഷങ്ങൾ പറഞ്ഞതിനടയിൽ ഒരു കുസൃതി ചോദ്യം.

SSLC ബുക്ക് ഉപയോഗിച്ച് കഴിഞ്ഞോ?

By, ഷാജു തൃശ്ശോക്കാരൻ
12/01/2018