റിക്വസ്റ്റ്‌

നിന്റെ എഴുത്ത്‌ വായിച്ചു.. നീ ഞമ്മളെ നാട്ടുകാരൻ തന്നെയാണോന്നൊരു ഡൗട്ട്‌.. ഇന്റെ നാടെവിടാ ??

ഇത്‌ ചോയിക്കാനാണോ റിക്വസ്റ്റ്‌ അയച്ചെ ??

ഇത്‌ ചോയിക്കാൻ മാത്രല്ല.. തലശ്ശേരി ഭാഷേലുള്ള എഴുത്ത്‌ കണ്ടപ്പോ അയച്ചതാ.. അത്‌ മാത്രല്ല ഇന്നെ ഞാൻ എവിടെയോ കണ്ടിട്ടുണ്ട്‌..

ഇങ്ങളെ സ്തലമേതാ ??

ഞാൻ തലശ്ശേരി പന്തക്കൽ.. ഇഞ്ഞോ ??

ഞാൻ തലശ്ശേരി പാനൂർ

ചുമ്മാതല്ല ... ഞാൻ പറഞ്ഞില്ലെ ഇന്നെ ഞാൻ എവിടെയോ കണ്ടിട്ടുണ്ടെന്ന് ..

അല്ല ഇപ്പോ ഒരേ നാട്ടുകാരായിട്ടെന്താ .. എന്നെ കാണാനാണോ ??

കാണാലോ.. എന്തേ പറ്റൂല്ലേ ??

പറ്റൂല്ലല്ലോ.. ഞാനിപ്പോ ദുബായിലാ

ഭാഗ്യം.. രക്ഷപെട്ട്‌.. ഇഞ്ഞ്‌ പാനൂർ തന്നെയാണോ ??

അങനെ ചോയിച്ചാൽ പാനൂർ ചമ്പാട്‌ എന്ന നാട്ടിലാ..രക്ഷപ്പെട്ടെന്ന് പറയാൻ ഞാൻ ഇങ്ങളെ കാണാനൊന്നും വരുന്നില്ലല്ലോ..

ഇഞ്ഞെന്തിനാടാ പിന്നെ കള്ളം പറഞ്ഞെ ??

പൊന്ന് പെങളേ.. സത്യത്തിൽ എന്താ ഉദ്ധേശം .. ആളെ വിട്ട്‌ തല്ലാനാണേൽ ആദ്യം എന്തിനാന്ന് കൂടി അറിയണം.. ചുമ്മ തല്ല് കൊള്ളാനൊന്നും എന്നെ കിട്ടൂല്ല

ഹി ഹി മാഷേ.. ഞാൻ എന്തിനാ ഇയാളെ തല്ലണേ.. ഞാനിന്നാ ഇയാൾടെ സ്റ്റോറി വായിച്ചെ.. വായിച്ചപ്പോ എന്റെ നാട്ടിലാണെന്ന് തോന്നി.. നിന്നോട്‌ കമന്റിൽ മിണ്ടി.. നീ റിക്വസ്റ്റ്‌ അയച്ചപ്പോ ഞാൻ അസപ്റ്റ്‌ ചെയ്തു..പിന്നെ ഏടെയോ കണ്ടത്‌ പോലെയും ഒരു ഫീൽ സോ വന്നു ചോദിച്ച്‌ സംശയം തീർക്കാൻ അത്രേ ഉള്ളൂ..

ഓഹ്‌ ഇപ്പോളാ ഒന്ന് ശ്വാസം വിട്ടെ.. അപ്പോ പറ മുത്തേ എന്താ അറിയണ്ടേ ??

ചേച്ചി വിളിയൊക്കെ പോയി ഇപ്പോ മോളേന്നോ ??

അയ്യോ സോറി.. അറിയാണ്ട്‌ ആയിപ്പോയതാ.. ചേച്ചി ചോയിക്ക്‌

ചേച്ചി വിളി മാണ്ട പേരു വിളിച്ചാ മതി ഇഞ്ഞ്‌

അങ്ങനെയേൽ അങ്ങനെ.. അപ്പോ പറ.. ഇങ്ങളെവിടെയായിട്ട്‌ ബരും ??

ഇനിക്ക്‌ ചമ്പാട്ടുള്ള കുമാരൻ മാഷേ അറിയോ ??

അറിയാലോ .. മാഷിന്റെ ??

മാഷിന്റെ മരുമകളാ ഞാൻ..

ഏത്‌ കുമാരൻ മാഷിന്റെ ??

പിന്നെന്തിനാടാ നീ അറിയാന്ന് പറഞ്ഞെ ??

അത്‌ പിന്നെ എനിക്ക്‌ രണ്ട്‌ കുമാരൻ മാഷെ അറിയാം .. അതിലേതേലും ആവുമല്ലോ..

അതിപ്പോ എങ്ങനെയാ പറയാ.. ഇനിക്ക്‌ രാജാട്ടന്റെ കട അറിയോ ??

ചേച്ചി ലിസൺ റ്റു മീ.. ഇങ്ങൾ ഏത്‌ വഴിക്കെന്ന് പറഞ്ഞാലെ എനിക്കറിയാൻ പറ്റൂ.. എനിക്ക്‌ രാജാട്ടന്റെ കട 4 എണ്ണം അറിയാം അതോണ്ടാ

ഹി ഹി എന്നാ ഇനിക്ക്‌ ചമ്പാട്ടിന്ന് മില്ലിലേക്കുള്ള റോഡറിയാവോ .. ആ വഴിക്ക്‌ പോയാൽ കളരിപ്പറമ്പ്‌ എത്തും.. അവിടുന്ന് കുറച്ച്‌ മുന്നോട്ട്‌ പോയാൽ ഉള്ള ഒരു കട ഇല്ലേ അ രാജാട്ടന്റെ കട... അറിയോ ??

അറിയോന്നോ ഒരു കാലത്ത്‌ ഞാനവിടെ തന്നെ ആയിരുന്നില്ലെ.. എന്റെ കുറേ ചങ്ങായിമാരുണ്ട്‌ ആടെയൊക്കെ.. അവിടെ എവിടാ ഇങ്ങളു ??

അവിടെ അടുത്തന്നെയാ ..ബാലാട്ടന്റെ വീട്ടിന്റെ ബേക്കിൽ

ഇങ്ങക്കീ കിളവന്മാരെ മാത്രേ അറിയോ ??
ബാലേട്ടൻ , രാജേട്ടൻ, കുമാരേട്ടൻ എന്തുന്നാപ്പാ ഇത്‌

ഹി ഹി.. നാട്ടിലറിയപെടുന്ന ആൾക്കാരെയല്ലേ പറയാൻ പറ്റൂ.. അതൊണ്ടാടാ ..

എനിക്കറീല്ല.. പിന്നെ അറിയാം രാജാട്ടന്റെ കട കഴിഞ്ഞ്‌ ഒരു ഹമ്പ്‌ ഉണ്ട്‌.. അവിടുന്ന് ഇടത്തോട്ടൊരു റൊഡുണ്ട്‌.. അവിടുള്ളൊരു പെണ്ണിനെ അറിയാം.. അമ്മൂട്ടി എന്നാ വിളിക്കാനു..

അതെന്താ ഇനിക്ക്‌ ഓളെ മാത്രം അറിയുന്നെ ??

അതൊക്കെ അറിയാം ചേച്ചി.. മറക്കാൻ പറ്റൂല്ലേ അതൊന്നും

അതെന്താടാ ഇന്റെ ലവ്വർ എങ്ങാനും ആയിരുന്നോ ??

ഹേയ്‌ അല്ലേ.. ആ പെണ്ണു കാരണം ഞാനൊരുപാട്‌ അനുഭവിച്ചതാ ചേച്ചീ..

എന്താ ഉണ്ടായെ ഒന്ന് പറയെടാ

കുറേ കൊല്ലം മുന്നെ ഉണ്ടായതാ.... അതായത്‌ കണ്ണിൽ കണ്ട പെൺപിള്ളാരെയൊക്കെ വായിനോക്കി നടക്കണ സമയം.. ഒരു ബൈക്കുണ്ടാരുന്നു അന്ന്.. അതിന്റെ പിറകിൽ ചങ്ങായിമാരെയും കൊണ്ട്‌ സ്കൂളിനു മുന്നിൽ പോവും.. സ്കൂളിന്റെ മുന്നിന്ന് കസർത്ത്‌ കാണിക്കും.. അങനെയൊക്കെ..

ആഹ്‌ എന്നിട്ട്‌ ??

എന്നിട്ടെന്താ .. ഈ അമ്മൂട്ടിയെ എന്റെ ചങ്ങായി വളക്കാൻ നടക്കുന്നുണ്ടാരുന്നു....ഒടുക്കത്തെ മൊഞ്ജാ പെണ്ണിനു.. അതും നമ്പൂരി കുട്ടി.. പച്ചക്കറി മാത്രേ തിന്നൂ.. അതോണ്ട്‌ തന്നെ കിടു മൊഞ്ജ്‌.. എന്റെ ചങ്ങായി ആണേൽ എന്താ പറയാ ചേച്ചീ.. ഒരുമായിരി എന്തോ പോലത്തെ കറുപ്പ്‌

അതെന്തുന്നാടാ എന്തൊ പോലത്തെ കറുപ്പ്‌ ??

അയിനിപ്പോ പേരു കണ്ട് പിടിച്ചിട്ടില്ല.. ഓന്റെ ഫോട്ടോ കിട്ടുവാണേൽ കാണിച്ചേരാ .. എന്നിട്ട്‌ ഇങ്ങളൊരു പേരിട്ടോ ഓക്കെ

പോടാ.. എന്നിട്ട്‌ ബാക്കി പറ ഇഞ്ഞ്‌

‌ ഓളു വീഴൂല്ലാന്ന് ഞാൻ കുറേ പ്രാവശ്യം ഓനോട്‌ പറഞ്ഞതാ.. ഓനാണേൽ ഓളെ മാത്രം മതീന്നും ..ഓളെ ഏടുന്ന് കണ്ടാലും ഓൻ ഐ ലവ്‌ യൂ പറയും.. ഓളു പോടാ പട്ടീന്നും വിളിക്കും... അത്രയ്ക്ക്‌ മനപ്പൊരുത്തം ആയിരുന്നു അവർ തതമ്മിൽ.....ലാസ്റ്റ്‌ ഓൻ ഓൾക്കൊരു ലെറ്റർ കൊടുക്കാൻ തീരുമാനിച്ചു.. ഓളുടെ വീട്ടിലേക്ക്‌ പോന്ന വഴിയിൽ വെച്ച്‌ കൊടുക്കാൻ പ്ലാനിട്ടു..

ഓൾടെ വീടേട്യാ ??

ഞമ്മളെ മനേക്കര ബസ്‌ ഷെൽട്ടറിന്റെ അടുത്തുന്ന് അമ്പലത്തിലേക്ക്‌ പോകുന്നിടത്ത്‌ ഒരു ഇടവഴിയില്ലേ .. ഇടത്തോട്ട്‌ .. അറിയോ ??

ആഹ്‌ അറിയാ

ആഹ്‌ .. ആ വഴീക്കൂടെയാ ഈ പെണ്ണു പോവുന്നെ.. ഓൾടെ വീട്ടിലേക്കുള്ള ഷോർട്ടാണത്‌‌.. പുലിവാലാകുമെന്ന് പേടിച്ച്‌ ഞാൻ ഒഴിവാകാൻ നോക്കി...അപ്പോ ഓന്റെ വക സെന്റി.. ഇന്റെ വീട്ടിലെ കിണറ്റിൽ പൂച്ച വീണപ്പോ ഞാനല്ലേ എടുത്തന്നെ എന്നൊക്കെ പറഞ്ഞ്‌ ഭൂലോക സെന്റി.. ഞാൻ വീണില്ല.. ലാസ്റ്റ്‌ ചങായി പറഞ്ഞു ഓന്റെ കൂടെ പോയാൽ ഒരു പഫ്സും ലൈമും മാങ്ങി തരുന്ന്.. അതിൽ ഞാൻ വീണു.... ഞമ്മൾ അമ്മൂട്ടി ഓളെ വീട്ടിലേക്കുള്ള വഴിയിലേക്ക്‌ കേറിയപ്പോ ബൈക്കെടുത്ത്‌ പോയി.. ഓളെ അടുത്ത്‌ എത്തിയപ്പോ ചങ്ങായി ഇറങ്ങി.. ഞാൻ മുന്നൊട്ടുള്ള വളവിൽ കൊണ്ടു പോയി ബൈക്ക്‌ നിർത്തി അവരെയും കാത്ത്‌ നിന്നു.. 2 മിനിറ്റ്‌ കഴിഞ്ഞപ്പോ ഒരു നിലവിളി.. ചിക്കൻ പഫ്സ്‌ മാങ്ങണോ മുട്ട പഫ്സ്‌ വാങ്ങണോ എന്നു ആലോചിച്ച്‌ നിക്കാരുന്നു ഞാനപ്പോ.. ഞാൻ ബൈക്ക്‌ സ്റ്റാന്റിലിട്ട്‌ ഓടി ചെന്ന് നോക്കി.. ചങ്ങായീനെ കാണുന്നില്ല.. പെണ്ണാണേൽ നിലത്തിരുന്ന് ഉറക്കെ നിലവിളിക്കുന്ന്.. അതും നെഞ്ഞത്ത്‌ കൈവെച്ചിട്ട്‌.. ഞാനാദ്യം കരുതിയത്‌ ചങ്ങായി മാല പൊട്ടി‌ച്ച്‌ ഓടിയെന്നാ പിന്നെയാ തിരിഞെ
ചങായി ഓളെ നെഞ്ഞത്ത്‌ കേറി പിടിച്ചെയാന്ന്

അയ്യേ.. നെഞ്ഞത്തോ...അത്‌ ഇഞ്ഞെങ്ങനെയാ അറിഞ്ഞെ ??

അത്‌ ലാസ്റ്റ്‌ പറയാ.. തോക്കിൽ കേറി വെടി വെക്കണ്ട കേട്ടിനല്ലോ...

ഇനിക്ക്‌ ഞാൻ തരാടാ.. മോൻ ബാക്കി പറ

ഹ ഹ.. അമ്മൂട്ടി ഇരുന്ന് കരയുന്ന്.. ചോയിച്ചിട്ടണേൽ മിണ്ടുന്നൂല്ല..എന്താ ചെയ്യണ്ടേന്ന് അന്തംവിട്ട്‌ നിക്കുമ്പോ അതാ കിടങ്ങിന്റെ മോളിൽ ഒരു അമ്മച്ചി.. അമ്മച്ചി കാണുന്നത്‌ എന്നെയും നിലത്തിരുന്ന് കരയണ അമ്മൂട്ടിയേയും... കിഴക്കേലെ ശ്രീജേന്റെ മോളെയിതാ ഒരുത്തൻ എടങ്ങാറാക്കുന്നേന്ന് ഒരൊറ്റ നിലവിളി.. ആ പറച്ചിൽ കേട്ടപ്പോ ഞാൻ തന്നെയാണോ കേറിപ്പിടിച്ചേന്ന് എനിക്ക്‌ പോലും തോന്നിപ്പോയി.. അമ്മായിരി വിളിയേനു

നിനക്കങ്ങനെ തന്നെ വേണമെടാ.. എന്നിട്ട്‌ ??

എന്നിട്ടെന്താ ആരൊക്കെയോ കിടങ്ങ്‌ തുള്ളി വന്നത്‌ ഓർമ്മ ഉണ്ട്‌.. അടിച്ച്‌ പരിപ്പിളക്കി കളഞ്‌ എന്റെ

ആന്തിനാടാ ഇഞ്ഞല്ല്ല്ലൊ അയിനു പെണ്ണിനെ എടങ്ങാറാക്കിയെ .. ഇന്റെ ചങ്ങായി അല്ലെ ??

അതെനിക്ക്‌ പറയാൻ സമയം കിട്ടണ്ടേ.. ഞാനാദ്യം വിചാരിച്ചത്‌ സ്വപ്നം കാണുന്നതാണെന്നാ.. കുറേ പേരു ചേർന്ന് അടിക്കുമ്പോ ആദ്യം വേദനിക്കുല്ല.. കാരണം ആദ്യം ഞമ്മൾ വിചാരിക്കും സ്വപ്നമാണെന്ന്.. സ്വപ്നല്ലേ കൊണ്ടോട്ടേന്ന് വിചാരിക്കും.. പിന്നെയാ വേദന വരുന്നെ.. പിന്നെ ഒച്ചത്തിൽ നിലവിളിക്കലേ രക്ഷയുള്ളൂ.. അടിക്കാൻ വരുന്നോർക്ക്‌ ദയ എന്ന സാധനം ഉണ്ടേൽ ആ നിലവിളി കേക്കുമ്പോ നിർത്തും

ഹി ഹി.. അല്ല അപ്പോ ആ പെണ്ണിനു പറഞ്ഞൂടേനോ ??

ബെസ്റ്റ്‌.. കുറേ ആളൊക്കെ ഓടി വരുന്നെ കണ്ടപ്പോ തന്നെ ആ കൊച്ചിന്റെ ബോധം പോയിനു പോലും

ഹ ഹ പാവം നീ.. എന്നിട്ട്‌ എന്തായി ??

എന്നിട്ടോ..എന്നെ അടിച്ചോണ്ട്‌ നിക്കുമ്പോ ഓളെയും എടുത്ത്‌ ആരൊക്കെയോ പാനൂർ ഹോസ്പിറ്റലിലേക്ക്‌ കൊണ്ടോയിനു.. അവിടെത്തി ബോധം വന്നപ്പോ പെണ്ണു കാര്യം പറഞ്ഞു.. അവിടുള്ളോർ എന്നെ തല്ലി ക്ഷീണിച്ച്‌ നിക്കണവന്മാരെ വിളിച്ച്‌ കാര്യം പറഞ്ഞു.. ഞാൻ നിരപരാധിയാണു എന്ന്..

അന്ന് നിനക്ക്‌ ഒരുപാട്‌ അടി കൊണ്ടോ??

പിന്നേ.. കിട്ടിയോന്നോ.. ആദ്യത്തെ അടിയൊക്കെ സ്വപ്നത്തിൽ തീർത്തു.. പിന്നെ ഉള്ളത്‌ വേദനിച്ചപ്പോ നിലവിളിച്ചു.. എന്നിട്ടും അടി നിർത്താഞ്ഞപ്പോ ബോധം പോയ പോലെ കിടന്ന് നോക്കി.. അന്നേരാ ആരോ പറയുന്നെ കേട്ടെ ..ആളു മാറി എന്ന്.. അതൊടെ അടി നിർത്തി..

നിന്നെ എന്നിട്ട്‌ എന്താക്കി ??

ആട തന്നെ ഒരു കുയ്യും കുയിച്ച്‌ മണ്ണിട്ട്‌ മൂടി ഹല്ല പിന്നെ

ഹിഹി ചൂടാവല്ല ടാ എന്നിട്ടെന്തായീന്ന് അറിയാനുള്ള ലത്‌ കൊണ്ടല്ലേ

അയിന്റെ ഇടേലു കൂടി എതോ ഒരു തെണ്ടി എന്റെ ഇക്കാക്കാനെ വിളിച്ച്‌ ഞാൻ ഏതോ പെണ്ണിനെ മാനഭംഗപ്പെടുത്തീന്ന് വിളിച്ച്‌ പറയേം ചെയ്തിനു.. ഇക്കാക്ക വരുമ്പോ ഞാൻ മോന്തയൊക്കെ വീർത്ത്‌ ലാലെട്ടനെ പോലെ ഇരിക്കുന്ന്.....ഇക്കാക്കന്റെ വകയും കിട്ടി ഒന്ന്.. അപ്പോ എന്നെ അടിച്ചവരിൽ ഒരുത്തൻ പറഞ്ഞ്‌.. ഓനല്ല ഓന്റെ ചങ്ങായി ഒരുത്തിയെ ഇടങ്ങാറാക്കിയതാന്ന്.. പിന്നെ ഇക്കാക്കയുടെ വക ഒരു ഷോ ആയിരുന്ന്...... എന്നെ തല്ലിയവരെ നോക്കി എന്തൊക്കെയോ കുറേ ഡയലോഗ്‌.. ഒറ്റയ്ക്ക്‌ ബൈക്കിൽ പോവുമ്പോ ഒരു ലിഫ്റ്റ്‌ പോലും തരാത്ത എന്റെ ഇക്കയുടെ സ്നേഹം അന്നാണു ഞാൻ കണ്ടെ.. ചേച്ചിക്കറിയോ എന്നെ ഒരു മരത്തിൽ കെട്ടിയിടാൻ വരെ പ്ലാൻ ഉണ്ടാരുന്നു.... കയർ വാങ്ങാൻ പോയോൻ തിരിച്ച്‌ വരുമ്പോളേക്ക്‌ അടി നിർത്തിയെ കൊണ്ടാ കൈച്ചലായെ..

എന്തോന്നിത്‌ ചുമ്മാഅങ്ങ്‌ അടിക്കലണോ ഇനിക്ക്‌ കേസ്‌ കൊടുത്തൂടേനോ തല്ലിയോർക്കെതിരെ ??

ബെസ്റ്റ്‌.. എന്നിട്ട്‌ വേണം അയിന്റെ പേരിൽ പിന്നേം അടി കൊള്ളാൻ.. കോമഡി അതൊന്നുമല.. എന്നെ തല്ലിയവരിൽ ഒരുത്തൻ സ്വന്തം ഏട്ടന്റെ ഭാര്യേനെ പൊക്കി കൊണ്ട്‌ പോയി കെട്ടിയവൻ.. വേറെ ഒരുത്തൻ കല്ല്യാണം കയിഞ്ഞ ഒരു മുസ്ലീം പെണ്ണിനെ പൊക്കി കൊണ്ട്‌ വന്ന് കെട്ടിയവൻ

ഹ ഹ അത്‌ ടോപ്പായിക്ക്‌.. എന്നിട്ട്‌ ലാസ്റ്റ്‌ എന്തായി ??

എന്നിട്ടെന്താ എന്നെ തലശ്ശേരി ഇന്ദിരാ ഗാന്തി ഹോസ്പിറ്റലിൽ അഡ്മിറ്റ്‌ ആക്കി.. കേസു കൊടുക്കണ്ടാന്ന് പാർട്ടി നേതാക്കൾ ഇക്കാനോട്‌ പറഞ്ഞിനു പോലും.. ഹോസ്പിറ്റൽ ചിലവ്‌ പാർട്ടി കൊടുത്തു.. എനിക്കാണേൽ തല്ല് കൊണ്ട വേദനയും.. ഒരു പീഡനക്കാരൻ എന്ന പേരും.. കൊല്ലങ്ങളെടുത്തു ആ പേരു പോവാൻ..

അപ്പോ ഇന്റെ ആ ചങ്ങായിനെ പൊക്കീല്ലെ ??

ഓൻ അന്നു ഓടിയ ഓട്ടം സ്ട്രൈറ്റ്‌ ഓന്റെ വീട്ടിലേക്ക്‌ ... ദെൻ ഡ്രസ്സൊക്കെ എടുത്ത്‌ കോയമ്പത്തൂരേക്ക്‌ പോയി.. പിന്നെ 3 കൊല്ലം കയിഞിട്ടാ വന്നെ.. എന്നെ 6 മാസയപ്പോ ഗൾഫിലേക്കും കേറ്റി വിട്ടു..ഇപ്പോ ഇവിടിങ്ങനെ നാടും ആലോചിച്ച്‌ കഴിയുന്ന്..

ഓഹ്‌ .. എന്തായാലും മറക്കാനാവാത്ത ഒരു ദുസ്സ്വപ്നം ആയിരുന്നല്ലെ.. കൊള്ളാം

ദുസ്വപ്നം ഒന്നൂല്ല.. ഓർമ്മിക്കാനൊക്കെ എന്തേലും മാണ്ടേ.. ഹി ഹി

അപ്പോ ശരി ചങ്ങാതീ.. പിന്നെ വരാം.. ചോറു തിന്നില്ല.. ഇന്റെ ബഡായിയും കേട്ടിരുന്ന് പോയി.. പിന്നെ വരാം

ഹ ഹ ഹ ബഡായി ഒന്നുമല്ലായെ.. പിന്നെ ചാറ്റാൻ വരുവാണേൽ പറയണേ .. കെട്ടിയോളും ഈ ഐഡി യൂസാക്കണിണ്ട്‌ ... അതോണ്ടാ

അപ്പോ എനിക്കെങ്ങനെ തിരിയും ഇഞ്ഞാണോ ഇന്റെ കെട്ടിയോളണോ ന്നു ??

അതിപ്പോ ചാറ്റാൻ വരുമ്പോ അമ്മൂട്ടിയാണോ എന്ന് ചോയിച്ചാ മതി.. അമ്മൂട്ടിയാണേൽ അതേന്ന് പറയും .. ഞാനാണേൽ ഞാനാണെന്ന് തന്നെ പറയും

ദൈവമെ അപ്പോ നീ ആ പെണ്ണിനെയാണോ കെട്ടിയെ ??

അല്ലാണ്ട്‌ പിന്നെ.. അന്നത്രത്തോളം അടി വാങ്ങിച്ച്‌ കൂട്ടീട്ട്‌ .. ഓളെ വേറെ ഒരുത്തനു കൊടുക്കാനോ.. അത്‌ ഇച്ചിരി പുളിക്കും.. ഒരു പെണ്ണിനു വേണ്ടി ജീവിതത്തിൽ ആകെ കൊണ്ട അടിയാണത്‌ ...

നീ ഭീകരനല്ലടാ.. കൊടും ഭീകരനാ.. എന്നാലും നീയെങ്ങനെ പെണ്ണിനെ കട്ടോണ്ട്‌ പോയെ ??

അതൊക്കെ വല്യൊരു സംഭവമായിരുന്നു ചേച്ചിയേ..ഇപ്പോ പോയി ചോറു തിന്ന് ട്ടാ .. പിന്നൊരിക്കൽ പറഞ്ഞേരാ

✍🏼 Namsi Jaan