തുടക്കം (കവിത)

സ്വർണം തേനിൽ മുക്കി തൊടുവിച്ചു കഴിഞ്ഞു
അരിയിൽ ഹരിയെന്നെഴുതിക്കഴിഞ്ഞു
ഇനി നമുക്ക് തുഴയാൻ വിടാം, 
ജീവിതത്തെ,
തെളിഞ്ഞ ജലാശയത്തിൽ
തുഴഞ്ഞങ്ങനെ
കരയെത്തുവോളം കാത്തു നിൽക്കാം.
ജാതി ചുഴിയിൽ പെടാം മത മത്സ്യങ്ങളിൽ പെടാം
മരവിച്ചുനിൽക്കും കൂർത്ത പാഴ്മരം കാണാം
തുഴയുക ഇഴയുക അറിയുക അലിഞ്ഞങ്ങനെ
കരയെത്തുവോളം കാത്തുനിൽകാം.
അലയാണ് ജീവിതം താഴ്ന്നുപൊങ്ങാം
പലതായ കൈവരികൾ വന്നു ചേരാം
വരയ്ക്കുക ചമയ്ക്കുക നനഞ്ഞൊരീ കൈകളാൽ
മറുകര എത്തുവോളം ഞാൻ കാത്തുനിൽക്കാം
ചിലപ്പോൾ , വരച്ച വരകൾക്കു തെളിച്ചമില്ലെങ്കിലും
വരയ്ക്കണം അലകളായ് തിരിച്ചു വരും വരെ
തെളിഞ്ഞ ജലാശയത്തിൽ തുഴഞ്ഞങ്ങനെ
കരയെത്തുവോളം കാത്തു നിൽക്കാം.

ഉണ്ണി കാഞ്ഞങ്ങാട്