ദൈവത്തിനോട്...

ദൈവമേ,
നീ പറഞ്ഞോ
നിന്റെ ശ്രീകോവിലിൻ
പുറംചുവരുകൾക്ക്
ഏതു ലോഹം
പൊതിയണമെന്ന്
തിളങ്ങുന്ന മാർബിൾ
പ്രതലത്തിൽ ചവിട്ടി നീ
യാത്ര ചെയ്യാറില്ലയെങ്കിലും
ദൈവമേ... നീ പറഞ്ഞോ
ഈ പ്രദക്ഷിണവഴികൾക്ക്
തിളക്കമേകി
പ്രൗഡി കാട്ടണമെന്ന്
വിണ്ണിനിന്നുമ്മ കൊടുക്കാൻ
വെമ്പും മിനാരങ്ങളെന്തിനിന്ന്
പെരുമ കാട്ടാൻ
നീയോതിക്കൊടുത്തതോ
ഈ കടത്തിണ്ണയിൽ
ഒരു പത്രത്താളതിൽ
ചൂളിച്ചുരുങ്ങിയുറങ്ങി
തണുത്തുണരും
ആലംബഹീനർക്കൊരു
കൂരയെന്തേ നീ കൊടുത്തില്ല
നിൻ സേവകരെന്നു
നടിപ്പവർക്കെന്തു നീ
ബോധമിന്നും കൊടുത്തില്ല

ദൈവമേ... നീ പറഞ്ഞോ
കോടികൾ കൊന്നു
നിനക്കായ് വാർക്കും
സൗധങ്ങൾക്കിടയിൽ നിന്നും
മേനി നോവാതുരുക്കി -
യൊരിത്തിരി - യൊത്തിരി
പൊന്ന് ധരിക്കുവാൻ...

എച്ചിൽക്കൂനകൾ തേടിയലയും
നായകൾക്കൊപ്പം
ദുർഗന്ധമിന്നും പങ്കിട്ട് ഭക്ഷിക്കുമാ
കാഴ്ചകളറിയില്ലയെന്നു നടിക്കും
നിന്റെ ദാസരെ
നീയൊന്നു തിരുത്തുക !
മണ്ണിലും വിണ്ണിലും
തൂണിലും തുരുമ്പിലും വാഴും
നിനക്കെന്തിനീ സൗധങ്ങൾ
ദൈവമേ... നിനക്കെന്തിനീ
ആഡംബരങ്ങൾ?????

ഗോപകുമാർ കൈമൾ