പുഴയൊഴുകും വഴി .

പുഴ ഒഴുകിക്കൊണ്ടേയിരിയ്ക്കുന്നു .
ഒഴുകാതെയിരുന്നാൽ പുഴ പുഴയാവില്ല .
പുഴസമൃദ്ധിയിൽ പുഴയ്ക്കുപങ്കില്ല .
അവമഴക്കാറുക്കളെ സ്വപ്നംകണ്ടൊഴുകുന്നു .

തീരത്ത് ,ഓരോ തളിരിലും
പുഴഹൃദയം തുടിയ്ക്കുന്നു .
പുഴയിലൂടെപൂക്കൾ ഒഴുകിവരാറുണ്ട്.
അകലെയകലെ നിന്നൊഴുകിയെത്തി
തൊട്ടുമുന്നിൽ തടഞ്ഞു നിന്ന്
അകലെയകലേക്കൊഴുകി മറയുന്നു .
പുഴയുടെഗതിയിൽ ,കാറ്റിന്റെ കനിവിൽ .

പൂക്കളേത്തേടി പുഴയിലേക്കിറങ്ങരുത് .
അവ നിങ്ങൾക്കുവേണ്ടി നിന്നുതരില്ല.
പുഴയുടെവഴിയിൽ നിന്ന്
അവയ്ക്ക് പിന്തിരിയാനാവില്ല .
നനഞ്ഞ് കുഴഞ്ഞ് ശ്വാസംമുട്ടി
നിങ്ങൾക്ക് പിന്തിരിയേണ്ടി വന്നേയ്ക്കാം .

കൈപ്പിടിയിലൊതുങ്ങിയാൽ പൂവ്
നോവു പൂത്ത് പിടയും .
പുഴയുടെ പാതകളെ ,അതിഷ്ടപ്പെടുന്നു .
പൂക്കൾ അവയുടെ വഴികളിലൊഴുകട്ടെ.

പുഴകളിലൂടെ ശവങ്ങളൊഴുകാറുണ്ട് .
അത് ശവങ്ങളുടെ വിധിയാണ് .
പുഴമനസ്സിൽ മീനുകളുടെയുത്സവം.
ചീർത്ത് വീർത്തമനസ്സുകളിൽ
അസൂയപ്പുഴകളൊതുക്കി ,
മീനുകളുടെയുത്സവം കണ്ടുനിൽക്കാറുണ്ട്
പുഴക്കരയിൽ .... കുറുക്കന്മാർ .

പുഴയൊഴുകുകയാണ് ..
ഒഴുകിക്കൊണ്ടേയൊഴുകുകയാണ് .

by: Sumod parumala