ഭൂമിക്ക് സ്വന്തം

പൊൻപുലരിയിൽ വിടരും മലരേ
മഞ്ഞു വീണിടും നിൻ വദനത്തെ
ചുംബനത്താൽ മിനുക്കിടാനായി
വന്നിടുന്നല്ലോ അർക്കരശ്മികൾ

അമ്മതൻ കയ്യിലാടിക്കളിച്ചീടും
നിന്നെ സ്നേഹത്താൽ താരാട്ടുപാടുവാൻ
നിൻ ദളങ്ങളെ പുല്കീടുവാനായി
വന്നിടുന്നല്ലോ തെന്നലാം തോഴനും

നിന്റെ നെഞ്ചിൽ നിറഞ്ഞൊഴുകുമീ
അമൃതമൊന്നു നുകർന്നിടാനായി
വർണ്ണ വർണ്ണ ചിറകുകൾ വീശി
വന്നിടുന്നല്ലോ ശലഭമാം തോഴികൾ

നിന്നുടെ ശോഭയാർന്നൊരീ മേനിയെ
മെല്ലെ മെല്ലെ കുളിരണിയിക്കുവാൻ
കൈക്കുടന്നയിൽ തെളിനീരുമായി
വന്നിടുമല്ലോ വർഷമേഘങ്ങളും

നിന്നെ ഒന്ന് കൈകളിലാക്കുവാൻ
മുത്തി മുത്തി ചുവപ്പിക്കുവാൻ
കുഞ്ഞിളം കൈകളും നീട്ടി
വന്നിടുന്നല്ലോ സുന്ദരിപ്പെണ്ണവൾ

നിന്റെ കാല് തളരുന്ന വേളയിൽ
അമ്മ നിന്നെ അടർത്തി മാറ്റുന്നു
എന്റെ മാറിലേക്കെത്തുന്ന നിന്നെ
ഞാനുടൻ നെഞ്ചോട് ചേർത്തീടാം

💕💕💕💕💕💕💕💕💕💕💕

മഞ്ജു അഭിനേഷ്