ഒമ്പത്‌ ബി ബാക്ക് ബെഞ്ചേഴ്സ്

ഒമ്പത്‌ ബി യിൽ, ബാക്‌ബെഞ്ചേഴ്സിലെ ഏറ്റവും നല്ലകുട്ട്യേനു ഈ ഞ്യാൻ.. വർത്താനം പറീണോലെ ലിസ്റ്റിലും എന്നും ഞമ്മക്കെന്നെ ഒന്നാം സ്ഥാനം.

അർദ്ധവാർഷികപരീക്ഷ നടക്കണ സമയം.വിഷയം മാത്‍സ് .. തുണ്ടുപേപ്പറൊന്നും ഇല്ലേലും ഉള്ളപോലെ ഒരഭിനയണ്ട്.മാഷ് വന്നോക്കി ചെക്ക്‌ചെയ്ത് നിരപരാധിത്വം ബോധ്യമായാ കിട്ടണ ഒരാത്മനിർവൃതി.... ഹോ!!അതൊന്ന് വേറെതന്നേണ്. അതിനുംവേണ്ടി ഓസ്കർ അവാർഡിനുള്ള അഭിനയം കാഴ്ചവെക്ക്‌ണ എടീലാണ് ബാക്കികൂടെ വന്ന് മാഷ് പോക്കറ്റിൽ കയ്യിട്ടത്. പോക്കറ്റിൽ ഉണ്ടായിരുന്ന കോമ്പസ് കയ്യിൽ കുത്തികേറി ആ അവാർഡ് മാഷങ്ങ്ട് സ്വന്തമാക്കി. മ്മൾ ബാക്ക്ബെഞ്ചേഴ്‌സ് ഇൻസ്ട്രുമെന്റ് ബോക്സ് കൊണ്ടുവരുന്നത് അന്നും ഇന്നും ഷെയിം കേടല്ലേ?
എന്തായാലും ആ സംഭവത്തോടെ,ഇന്റെ സ്റ്റാറ്റസ് "അദ്ധ്യാപകനെ കോമ്പസോണ്ട് കുത്തിയോൻ" എന്നായി .

പരൂഷയിലെ അതിഭീകര മാർക്കുചോർച്ചയും ഈ സംഭവവും ഒക്കെക്കൂടെ മ്മളെ ഒമ്പത് ജിയിലേക്ക് പറിച്ച് നാട്ടി.

അവിട്ന്നാണ് തുരപ്പൻ നാസറിനെ പരിചയപ്പെടുന്നത്..ക്‌ളാസ്സിലെ രണ്ടാംവർഷ 'വിരുത'വിദ്യാർത്ഥി.

ദിവസവും വെള്ളതുണീം ഏതെങ്കിലും കള്ളിഷർട്ടും വേഷം.(യൂണി ഫോമിലൊന്നും ബല്യേ കാര്യല്ല)ക്ലാസ്സ് കട്ട് ചെയ്ത് സിനിമക്ക് പോയ അന്നുമുതലാണ് ഞങ്ങ ആൽമാത്ര സൂർത്തുക്കൾ ആയത്.

അവനില്ലാത്ത ഒരീസം ഉച്ചക്ക്,അതി കഠിനമായ സങ്കടത്തോടെ ഭക്ഷണം കഴിക്കുവായിരുന്ന ഞാൻ .. പെട്ടെന്നാണ് മതിലിന് മോളീൽ രണ്ട് കണ്ണുകൾ കണ്ടത് . തൊരപ്പനാണെന്ന് മനസ്സിലാക്കി ഞാൻ ചെന്നു.

" എടാ ഇന്ന് ലാസ്‌റ്റ് പിരീഡ് പി റ്റി യല്ലേ.. അതിന് മുമ്പുള്ള ആശ ടീച്ചർ ലീവിലും.. ഇജ്ജ് വാ മ്മക്ക് സിനിമക്കോക"

ഇല്ലാന്ന് 'പലവട്ടം' പറഞ്ഞിട്ടും അവൻ സമ്മയ്ച്ചില്ല.. തീയേറ്ററിൽ എത്തീപ്പോഴാണ് ഓന്റെ അമിത സ്നേഹത്തിന്റെ ഗുട്ടൻസ് പിടികിട്ടിയത്.. ഓന്റെട്ത്ത് ഒരുറുപ്പിയെന്റെ കൊറവുണ്ട്..

കീശീൽണ്ടായ്‌ന പത്തുറുപ്പ്യ കൊട്ത്ത് ടിക്കറ്റെടുത്ത് വരാൻ പറഞ്ഞു,. ഞാൻ തീയേറ്ററിന്റ വാതില്‌ക്കെ പോയി നിന്നു. ഉമ്മ സഞ്ചയ്കയിൽ അടക്കാൻ തര്ണ കാശ് കൃത്യമായി ഞാൻ ഇവിടെയാണ് നിക്ഷേപിച്ചിരുന്നത്. അവിടുണ്ടായിരുന്ന സെക്യൂരിറ്റിക്കാരനോട് സംസാരിച്ചു കൊണ്ട് നിക്കുമ്പോ..പോക്കറ്റിൽ ടിക്കറ്റും രണ്ടുകയ്യിൽ ഐസ് ക്രീമുമായി അതാ വരുന്നു തൊരപ്പൻ ..

"ഐസ്ക്രീം വാങ്ങാൻ അനക്കെവിടുന്നാടാ പൈസ?" ദേഷ്യത്തോടെ ഞാൻ.

32 പല്ലും കാട്ടി അവൻ

" അന്റെ പൈസീം കൊണ്ട് വാങ്ങി "

അതെനിക്ക് തീരെ പുട്ചിലാ. അപ്പൊത്തന്നെ ഇന്റെ രണ്ട്‌ കൈകൊണ്ടു അവൻ്റെ കഴുത്തിന്റെ അളവെടുത്തു . അതവനുണ്ടോ പുടിക്കണ്? ഐസ് ക്രീം അവിടെയിട്ട് ഓനെന്റെ കോളറിന്റെ ലെവലങ്ങട്‌ ശരിയാക്കി.സെക്യൂരിറ്റിക്കാരന് ഇതുരണ്ടും പുട്ച്ചില്ല. കാഴ്ചക്കാരെ നിരാശപ്പെടുത്തി അടിക്ക് സുല്ലിട്ടു.രണ്ടാളും രണ്ടു ഭാഗത്തിരുന്ന് സിനിമ കണ്ടു.

അടുത്തദിവസം ക്ലാസ്സ്‌ടീച്ചർ വന്നതേ ഒരുചൂരലും കൊണ്ട് .. കണ്ണുരുട്ടി ഇന്നോട്,

"നീ ഇവിടെവാ ... ഇന്നലെ ഉച്ചക്ക് ശേഷം ഞാൻ വന്നപ്പോ നീ എവിടെയായിരുന്നു ?"

"ടീച്ചറെ..അത് "..... എന്നു പറഞ്ഞപ്പോഴേക്കും ബാക്കിൽ നിന്ന് തൊരപ്പൻ,

" ഓൻ സിന്മക്കു പോയതാ .. ഇന്നലെ ആസ്പത്രീ പോയപ്പോ ഓൻ അവിടെ കയറണത് ഞാൻ കണ്ടു ."

പറഞ്ഞു തീർന്നപ്പോഴേക്കും ചൂരൽ തൊടമ്മേക്കൂടെ പാഞ്ഞു . നിമിഷങ്ങൾക്കകം രണ്ടു മെട്രോ പാതന്റെ നിർമ്മാണം ഇന്റെ തൊടമ്മേൽ പൂർത്തിയായി ..

തൊരപ്പനെ അങ്ങനെ വിട്ടാ പറ്റോ?? "ടീച്ചറെ.. ഞാൻ മാത്രല്ല ഓനും ണ്ടായ്ന്നു ഇന്റൊപ്പം "

"കള്ളി വെളിച്ചത്തായപ്പോ അവനെയും തല്ലുവാങ്ങിക്കുന്നോടാ" എന്നും പറഞ് ആ അടിയും ഞമ്മക്കെന്നെ . ഇതുകണ്ട് ക്ലാസ്സിൽ കൂട്ടച്ചിരി ഉയർന്നു.(കൊലച്ചിരി) നമ്മ നാണം കെട്ടു(അത്ണ്ടായിട്ടല്ല.ന്നാലും) ...

ഈ സംഭവത്തോടെ ഇന്നിലെ പ്രതികാരദാഹി ഉറക്കമുണർന്നു.

ഉറങ്ങുമ്പഴും,ഉണ്ണുമ്പഴുംഒക്കെ എങ്ങനേലും ക്ലാസ്സിൽ
അവനീം നാണം കെടുത്തണം എന്ന ചിന്തയായിരുന്നു. നാല് ദിവസത്തിന് ശേഷം അതിനൊരു അവസരം ഒത്ത് വന്നു.

ക്ലാസ്സിന്റെ ബാക്കിൽ, ഒരു ഭാഗത്തെ രണ്ട് കാലുപോയ ഒരു ഡെസ്‌കിന്റെ
മുകളിൽ കയറി താഴേക്ക് ഉതിർന്നിറങ്ങുന്നത് ഓന്റെ ഹോബ്യാണ്.

അന്ന് ക്ലാസ്സിൽ ആളില്ലാത്ത ലാസ്റ്റ് പിരിയഡ്. ഓനും ഓന്റെ ശിങ്കിടികളും ബാക്കിൽ ഉതിർന്നു കൊണ്ടിരിക്കണ്. ഞാനിന്റെ ഒരുസുഹൃത്തിനേം കൂട്ടി ഡെസ്കിന്റെ ഉതിരാൻ തുടങ്ങുന്ന ഭാഗത്ത് ചെന്ന് സംസാരിക്കാൻ തുടങ്ങി. തൊരപ്പൻ ഉതിരാനായി ഡെസ്കിന്റെ മുകളിൽ കേറിയപ്പോ ഓന്റെ മുണ്ടിന്റെ കോന്തല ഭാഗം ഡെസ്കിന്റെ രണ്ട് പലകകൾക്കേടിൽ ക്കൊളുത്തിയിട്ടു. ഇതറിയാതെ താഴെക്കുതിർന്നതും ഉടുതുണി പിന്തുണ പിൻവലിച്ചതും ഒപ്പായ്ര്ന്നു..

പണ്ടേ 'അടിസ്ഥാന' പരമായകാര്യങ്ങളിൽ 'നഗ്‌ന'മായ നിലപാടെടുത്തീന ആളേനു പുള്ളി.

ഒണങ്ങാനിട്ടിരുന്ന കൊടയെട്ക്കാൻ വന്ന സുമയ്യയാണ് ആ ഭീകര കാഴ്ച്ച ആദ്യം കണ്ടത്. ഓൾ അലറിച്ചിരിച്ചത് എല്ലാർടേം ശ്രദ്ധ ക്ഷണിക്കലിന് കാരണായി .

ആൺകുട്ട്യോൾ ആദ്യായി കാണ്ന്ന പോലേം പെൺകുട്ട്യോൾ കണ്ടിട്ടും കാണാത്തപോലേം നിന്നു .

പലരും യാഥാർഥ്യങ്ങൾക്ക്‌ നേരെ മുഖം തിരിച്ചു.

പൂരപ്പറമ്പായ ക്‌ളാസ്സിലേക്ക് അട്ത്ത
ക്ലാസ്സിലെ സത്യൻ മാഷ് വടിയും കൊണ്ട് കയറിവന്ന് അലറി..
"എന്താ ഇവിടെയൊരു ബഹളം ?"

ഡീസെന്റായി ഞമ്മ കാര്യം അവതരിപ്പിക്കുകയും ഇൻക്ക് കിട്ടിയ അതേ പോലോത്തെ മെട്രോ പാത മാഷ് ഓനും പകർന്ന് കൊടുക്കേം ചെയ്തു.

ഇതോടെ സ്കൂളിൽ ഓന്റെ സ്റ്റാറ്റസ് മ്മളേം മുകളിലായി. " പെൺകുട്ടികൾക്ക് ഉമ്മറം കാണിച്ചവൻ".

#SHAHUL