കരാട്ടെ ജാൻസി

"ജാൻസീ എടി ജാൻസിയേ..ഈ പെണ്ണിതെവിടെ പോയി കിടക്കുവാ?"
സിസിലിയേടത്തി ഒച്ചയെടുത്തു വിളിച്ചു.

"എന്നാത്തിനാ അമ്മച്ചി ഇങ്ങനെ തൊണ്ടകീറി വിളിക്കുന്നേ ഞാനീ തോട്ടത്തിൽ തന്നെയുണ്ട്."

നിവർന്നുനിന്നവൾ സിസിലിയേടത്തിയെ നോക്കി ചോദിച്ചു.

"ആ ബെസ്റ്റ് പെണ്ണുകാണാൻ വരുന്നവർക്കു മുന്നിൽ നിൽക്കാൻ പറ്റിയ കോലം തന്നെ"
ചെളി പുരണ്ട അവളുടെ പാവാടയിൽ നോക്കി സിസിലിയേടത്തി പറഞ്ഞു.

"എടി പെണ്ണേ നീ വേഗം പോയി കുളിച്ചേച്ചും വാ.സമയം 9 മണിയായി.പത്തുമണിക്ക് അവരിങ്ങെത്തും."

"ഓ ഒൻപതല്ലേ ആയുളളൂ കുറച്ചു കൂടി കഴിയട്ടെ.ഞാനീ പറിച്ചു നട്ട ചെടിക്ക് കുറച്ചു വെളളം ഒഴിക്കട്ടെ.ഈ അമ്മച്ചീടെ പാട് കണ്ടാ തോന്നും അമ്പ്പെരുന്നാള് വരുവാണെന്ന്."

"നിനക്ക് അതല്ല അതിലപ്പുറോം തോന്നും,കാരണം നിൻെറ പ്രായം അതാ.മൂന്നു പെൺമക്കളുളള ഒരമ്മയുടെ വേവലാതി അറിയണേ എൻെറ മോളും പെറണം.അന്നു നിനക്ക് മനസ്സിലാവും അമ്മച്ചീടെ വിഷമം."

"എൻെറ പൊന്നേ ഞാനൊന്നും പറഞ്ഞില്ലേ.എന്തേലും പറഞ്ഞാ അപ്പൊ തുടങ്ങും പ്രസവിച്ച കണക്കു പറയാൻ.എല്ലാ അമ്മച്ചിമാരും ഇങ്ങനെയാണോ എന്തോ"

ചിരിച്ചു കൊണ്ട് അത്രയും പറഞ്ഞു സിസിലിയേടത്തിടെ കവിളിൽ നുളളി അവൾ.
"അപ്പോ ഞാൻ കുളിച്ചേച്ചും വരാട്ടൊ എൻെറ സിസിലിക്കൊച്ചേ."

അവൾ പോകുന്നതും നോക്കി സിസിലിയേടത്തി ആത്മഗതം നടത്തി ഇതു നടക്കണേ എൻെറ പുണ്യാളാ..

"എടി ജാൻവിയേ,ജിൻസി എവിടെ?"

"അവളു അപ്പൻെറ അടുത്തുണ്ട് എന്നാത്തിനാ അമ്മച്ചി?

"ഒന്നൂല്യ രണ്ടാളും വല്യപ്പൻെറ വീട്ടിലേക്ക് ചെല്ല്,േചച്ചിയെ പെണ്ണു കണ്ടു പോയിട്ട് വന്നാ മതി."

"അപ്പോ ഞങ്ങൾക്ക് കാണണ്ടേ ചേട്ടനെ?"

"എന്നാത്തിനാ?കെട്ടാൻ പോകുന്നവൾ കണ്ടു ഇഷ്ടപ്പെട്ടാ മതി.മൂന്നെണ്ണവും ഒരുപോലെ വളർന്നു നിൽക്കുവാ.കാണാൻ വന്ന പയ്യൻ അവസാനം നിങ്ങളെ കണ്ടിഷ്ടപ്പെട്ടാ ശരിയാവില്ല.രണ്ടും കൂടി ഇപ്പൊ തന്നെ പൊയ്ക്കോ.പോകുമ്പോ അപ്പനോട് കുറച്ചു പഴവും ബിസ്കറ്റും വാങ്ങിയേച്ചും വെക്കം വീട്ടിലോട്ട് വരാൻ പറ."

രണ്ടു പെൺമക്കളും നടന്നുപോകുന്നത് ഒരു നെടുവീർപ്പോടെ അവർ നോക്കിനിന്നു.

* * * * * * *
"ഇതാണ് പയ്യൻ,മറ്റേത് ഇവൻെറ ചങ്ങായിമാരാ." കയ്യിലൊരു പഴമെടുത്ത് കൊണ്ട് ബ്രോക്കർ സുകു പറഞ്ഞു.
"എന്താ മോൻ്റെ പേര്?

"ഡേവീസ് വീട്ടിൽ അമ്മച്ചി, ചേട്ടൻ,ചേടത്തി,രണ്ടു മക്കൾ.എനിക്ക് ടെെലിൻ്റെ പണിയാണ്."
ഒന്നും ചോദിക്കാതെ തന്നെ അവൻ അത്രയും കാര്യങ്ങൾ പറഞ്ഞു.

"നിങ്ങളു പെൺകുട്ടിയെ വിളിക്കെൻ്റെ ചേടത്തിയേ,അവരു തമ്മിൽ കണ്ടു സംസാരിക്കട്ടെ." ബ്രോക്കർ ധൃതി വെച്ചു.

ജാൻസി അവർക്കു മുന്നിലേക്ക് വന്നു.ഡേവീസ് അവളോടു പേരു ചോദിച്ചു.അവനു വേറെ ഒന്നും അറിയാനില്ലായിരുന്നു.എല്ലാം ബ്രോക്കർ പറഞ്ഞിരുന്നു.വിവരം വെെകുന്നേരം അറിയിക്കാം എന്നു പറഞ്ഞു അവർ പോയി.
വെെകീട്ടു തന്നെ അവർക്കിഷ്ടപ്പെട്ടെന്നും,ബാക്കി കാര്യങ്ങൾ തീരുമാനിക്കാം എന്നും അറിയിച്ചു.

അങ്ങനെ മംഗളമായി തന്നെ മിന്നുകെട്ട് നടന്നൂ അവൾ ആ വീട്ടിലേക്ക് മരുമകളായി കടന്നു വന്നു.ഡേവീസിനൊപ്പം ജീവിക്കാൻ തുടങ്ങിയപ്പോഴാണ് അയാളുടെ മദ്യപാനത്തിൻെറ വിവരം അവൾ അറിഞ്ഞത്.കുടിച്ചു വന്നാൽ അന്നു പിന്നെ തെറിപ്പാട്ടും അടിയുമാണ്.

അവളൊന്നും അപ്പനെയും അമ്മച്ചിയെയും അറിയിച്ചില്ല.ദോഷം പറയരുതല്ലോ കുടിക്കാത്ത ദിവസം അവനവളെ സ്നേഹം കൊണ്ട് വീർപ്പുമുട്ടിക്കും.പക്ഷേ കുടിക്കാത്ത ദിവസം കുറവാണെന്നു മാത്രം അവൾ പഠിച്ചപണി പതിനെട്ടും നോക്കി പക്ഷേ അവൻെറ ശീലം മാറ്റിയെടുക്കാൻ കഴിഞ്ഞില്ല.

മിന്നുകെട്ട് കഴിഞ്ഞു മാസം ആറു കഴിഞ്ഞു ജാൻസിക്ക് വിശേഷമുണ്ട്.ആ വിവരം ഡേവീസിനെ അറിയിക്കാൻ അവൾ അവൻെറ വരവും നോക്കിയിരുന്നു.

പതിവുപോലെ നാലുകാലിൽ തന്നെ അവൾക്ക് വല്ലാതെ സങ്കടം വന്നു. ഒന്നും മിണ്ടാതെ അവൾ അകത്തോട്ടു കയറി.അവളെ ചീത്തവിളിച്ചുകൊണ്ട് അവൻ അകത്തോട്ടു കയറി.

"ഇച്ചായാ നമുക്കൊരു കുഞ്ഞു പിറക്കാൻ പോകുവാ.ഇനിയെങ്കിലും ഈ കുടിയൊന്നു കുറയ്ക്കണം.നമ്മുടെ കുഞ്ഞിനെ ഓർത്തെങ്കിലും"

അവളതു പറഞ്ഞു കഴിഞ്ഞില്ല അപ്പോഴേക്കും അവളുടെ അടിവയർ ലക്ഷ്യമാക്കി അവൻെറ കാലുകൾ ഉയർന്നു."അവളുടൊരു കുഞ്ഞ്."

അവൾ ശരവേഗത്തിൽ ഒഴിഞ്ഞുമാറി അവനു നേരെ തിരിഞ്ഞ് രണ്ടു കയ്യും ചേർത്ത് അവൻെറ ഇരു ചെകിടും ചേർത്തടച്ച് ഒന്നു പൊട്ടിച്ചു.ഒരു നിമിഷം തൻെറ ചെവിയിലൂടെ ട്രയിൻ ഓടുന്നതായും,ജാൻസി നക്ഷത്രകൂട്ടങ്ങൾക്കിടയിൽ നിൽക്കുന്നതും അവൻ കണ്ടു.

രാവിലെ ജാൻസി ഡേവീസിന് ചായ കൊണ്ടു വരുമ്പോൾ അവൻ ഉണർന്നിരുന്നു.

"ഇന്നലെ നടന്നത് വല്ലതും ഇച്ചായന് ഓർമ്മയുണ്ടോ?"
മറുപടി പറയാതെ അവൻ തല കുമ്പിട്ടിരുന്നു.

"ഇച്ചായാ ഏതൊരു പെണ്ണിനെപ്പോലെയും എനിക്കുമുണ്ടായിരുന്നു കുഞ്ഞു കുഞ്ഞു സ്വപ്നങ്ങൾ.ഒരുപെണ്ണിൻെറ കഴുത്തിൽ താലി വീഴുന്ന നേരം അവൾ കാണുന്ന സ്വപ്നമുണ്ട്,ഒരു കുഞ്ഞിനെ എൻെറ ആ സ്വപ്നത്തിനു നേരെയാ ഇന്നലെ നിങ്ങളീ കാലുപൊക്കിയത്.അതു നശിപ്പിക്കാൻ ഞാൻ സമ്മതിക്കില്ല. ഇന്നലെ ഇവിടെ നടന്നത് നമ്മൾ മാത്രമേ അറിഞ്ഞിട്ടുളളൂ.ഇനിയും ഇതു തുടരാനാണ് ഭാവമെങ്കിൽ അതു നടക്കില്ല."

നിങ്ങൾ കുടിച്ചോ പക്ഷേ ഇങ്ങനെ നശിക്കുന്നതെന്തിനാ?അവൾ കണ്ണുനീരോടെ ചോദിച്ചു കൊണ്ട് മുറിവിട്ടു പുറത്തേക്ക് പോയി.

സ്വന്തം കുഞ്ഞിനെ കൊല്ലാൻ നോക്കിയ മഹാപാപി,അവന് സ്വയം വെറുപ്പ് തോന്നി. ഒരു കടുകുമണിയോളം ചെറുതായ പോലെ തോന്നി.

ഇന്നു ജാൻസിയുടെ ഡെലിവറിയാണ്.ഒരു വെരുകിനെപ്പോലെ അവൻ അങ്ങോട്ടും ഇങ്ങോട്ടും നടന്നു.പ്രാർത്ഥനയോടെ.

ജാൻസിടെ കൂടെ ആരാ വന്നിരിക്കുന്നെ.

അവൻ വേഗം സിസ്റ്റിനടുത്തേക്ക് ചെന്നു.

ജാൻസി പ്രസവിച്ചു,പെൺകുഞ്ഞാ.അവൻ കയ്യിലേക്ക് ആ കുഞ്ഞിനെ ഏറ്റു വാങ്ങി.അവൻെറ കണ്ണുനീർതുളളികൾ ആ കുഞ്ഞു പാദത്തിൽ ഇറ്റു വീണപ്പോൾ കുഞ്ഞ് ചുണ്ടു പിളർത്തി കരയാൻ ആരംഭിച്ചു.അവനത് നിർവൃതിയോടെ നോക്കി നിന്നു.

മിനിമണിയൻ.