മദ്യപാനം ഹാനികരം

നായ്ക്കൾ നിലാവിന്റെ സൗന്ദര്യം
ആസ്വദിയ്ക്കാറില്ല .
അവനിലാവുനോക്കി ഓരിയിടും
ചിലപ്പോൾ നിർത്താതെ കുരയ്ക്കും .

വളർത്തു പട്ടികൾക്ക്‌ മനസ്സുകളില്ല .
യജമാനന്റെ കാൽച്ചുവട്ടിൽ നക്കി നക്കി ....
ഉമിനീരൊലിപ്പിച്ച് ... ഒടുങ്ങും വരെ .

തെരുവുപട്ടികൾക്ക് സ്വാതന്ത്ര്യമുണ്ട് .
അവ മദ്യപിയ്ക്കാറില്ല ... എങ്കിലും ,
എച്ചിൽക്കൂനകളിൽ നിന്ന്
എച്ചിൽക്കൂനകളിലേക്ക് ...
പാലായനം ചെയ്തു കൊണ്ടിരിയ്ക്കും .
പലതും ഭക്ഷിച്ച് .....

ചക്രങ്ങൾക്കിടയിലൊടുങ്ങിയില്ലെങ്കിൽ
പേ പിടിച്ചു ചത്തില്ലങ്കിൽ
ആരെങ്കിലും .... തല്ലിക്കൊല്ലും.

മദ്യപിയ്ക്കാത്തവരെല്ലാം മഹാന്മാരല്ല .
മദ്യപരുടെ മുന്നിൽ അതഭിനയിച്ചാലും .

പ്രായോഗികതയുടെയും
കാല്പനികതയുടെയും രണ്ടറ്റങ്ങൾ
മുട്ടിയ്ക്കാനാവാതെ ... കാല്പനികതയുടെ
ആഴങ്ങളിലേയ്ക്ക് മുങ്ങിപ്പോവാറുണ്ട് ... ചിലർ .
മദ്യത്തിലൂടെ .

രാസത്വരകങ്ങളുടെ നീർച്ചുഴിയിൽപ്പെട്ട്
പുറത്തുകടക്കാനാവാതെ .

ആട്ടിൻതോലിട്ട ചെന്നായ്ക്കൾ
മദ്യത്തെ ഭയക്കാറുണ്ട് .
തോലുരിഞ്ഞ് ചെന്നായ പുറത്തുചാടും .

ആട്ടിൻകുട്ടികൾ ചെന്നായ്ക്കളായി
മാറാറില്ല ... ലഹരിയിൽ ....
മാറിയതായി തോന്നിയാലും .

മാന്യന്മാർ മദ്യപിയ്ക്കുന്നത്
കരഞ്ഞുകൊണ്ടാണ് ....
അവർക്കെപ്പോഴും
ഇരുളിന്റെ മറവുവേണം .
പകൽ മദ്യത്തെ ചീത്ത വിളിയ്ക്കണം ,
മദ്യപാനികളെ തല്ലിക്കൊല്ലണം .

ചിന്തിയ്ക്കുന്നവനെ കീഴ്പ്പെടുത്താൻ
മദ്യത്തിനാവില്ല .
ആ നീർച്ചുഴിയിൽ നിന്ന് അവൻ
പുറത്തു കടക്കും ... ഒരിയ്ക്കൽ .
കരളെരിത്ത് നാമമാത്രമായില്ലെങ്കിൽ .

മദ്യത്തെയും വ്യഭിചരിയ്ക്കുന്നവരുണ്ട് .
ഒരു സ്നേഹവുമില്ലാത്ത ഭോഗം ...
മദ്യത്തിന്റെ സാമൂഹ്യ പരതയിലേക്ക്
അവൻ വലിച്ചെറിയപ്പെടുന്നു .
മദ്യോന്മേഷം അവന്റെ പ്രാകൃത ചോദനകളെ
തഴുകിയുണർത്തുന്നു .
അവൻ ...
ഒന്നുകിൽ റോഡിലൊടുങ്ങുന്നു ..
അല്ലെങ്കിൽ ..
അഴികളെണ്ണുന്നു .

കടുത്ത മദ്യപാനി ബോധംകെട്ട് ..
ഓടയിൽ കിടക്കുന്നു .....
എല്ലാം നഷ്ടപ്പെട്ട് ..
ആത്മഹത്യയുടെ അഭയം തേടിയില്ലെങ്കിൽ
കരളുവെന്ത് ...........

-....... മദ്യപാനം ഹാനികരം ..........

by- sumod parumala