ഹേ കുഞ്ഞുങ്ങളേ

ഹേ കുഞ്ഞുങ്ങളേ..... നിങ്ങൾ ഭാഗ്യം കെട്ടവർ....

ഹേ വരും തലമുറയിലെ സന്തതികളേ......

ഞാൻ മൻസൂർ മൊയ്ദീൻ 
എറണാകുളം ജില്ല
ഇസ്ലാം മത വിശ്വാസി

ചെറുപ്പം മുതലുള്ള സുഹൃത്തുക്കൾ - സാബു സുകുമാരൻ, പ്രമോദ് പങ്കജാക്ഷൻ, രെജു കുറുപ്പ്, വിജേഷ് വിശ്വനാഥ്, ഡിക്സൻ ആന്റണി, ജലാൽ അലി, ബിജു ശിവജി, സാജൻ കൃഷ്ണപിള്ള

അന്നും ഇന്നും അള്ളാഹുവിനെ മാത്രം ആരാധിക്കുന്നു ഞാൻ

വീട്ടിൻറെ അടുത്തുള്ള ഗ്രൗണ്ടിൽ നവരാത്രി ഉത്സവം നടക്കുമ്പോൾ കൂട്ടുകാരുമൊത്തു മിക്ക ദിനങ്ങളിലും അവിടെ പോയി പങ്കു കൊണ്ട ഞാൻ

വിഷു തലേന്നു സബുവിന്റെ വീട്ടിൽ ഉറങ്ങി, വെളുപ്പിന് ഉണ്ണി കണ്ണനെ കണി കണ്ട ഞാൻ

ക്രിസ്മസ് വരവേല്ക്കാൻ എല്ലാരുടെയും കൂടി പുൽ കൂടുണ്ടാക്കിയവൻ ഞാൻ

സ്നേഹിതരുമായി രവിപുരം കൃഷ്ണന്റെ അമ്പലത്തിൽ പോയ ഞാൻ

വിശുദ്ധ റമളാൻ മാസത്തിൽ കൂട്ടുകാരോടൊത്ത് നോമ്പു തുറന്നിരുന്ന ഞാൻ

കൂട്ടുകാരൻറെ കൂടെ ഞായറാഴ്ച പള്ളിയിൽ പോയി അച്ചന്റെ പ്രസംഗം കേട്ട ഞാൻ

ഉത്സവത്തിനു വളഞ്ഞമ്പലം ദേവി ക്ഷേത്രത്തിൽ രാത്രി മുഴുവൻ കഴിച്ചു കൂട്ടിയ ഞാൻ

പെരുന്നാളിനു ബിരിയാണി വിളമ്പി, എല്ലാരുടെയും കൂടി ഇരുന്നു കഴിച്ചിരുന്ന ഞാൻ

മുതിർന്നപ്പോൾ ഗുരുവായൂർ അമ്പലത്തിൽ പോയി ഉണ്ണി കണ്ണനെ ദർശിച്ച ഞാൻ

അന്നും ഇന്നും അള്ളാഹുവിനെ മാത്രം ആരാധിക്കുന്നു ഞാൻ...

ഞങ്ങളുടെ ഓരോരുത്തരുടേയും കുടുംബങ്ങളിലെ ചടങ്ങുകൾ, കല്യാണങ്ങൾ, മരണം, മയ്യത്ത് അടക്കം ചെയ്യൽ, സഞ്ചയനം തുടങ്ങി എന്തും..... ഒരു ജാതിയുടെയും മതത്തിൻറെയും പേരിലല്ലാതെ പങ്കെടുത്തും, സഹകരിച്ചും സഹായിച്ചും, സങ്കടിച്ചും നിന്ന ഞങ്ങൾ.....

എനിക്ക് എൻറെ വിശ്വാസവും ഭക്തിയും..... മറ്റുള്ളവർക്ക് അവരുടെയും. സ്നേഹത്തിന്റെ നിഴലിൽ, അവർ എൻറെ കൂടെയും, ഞാൻ അവരുടെ കൂടെയും

ഹേ കുഞ്ഞുങ്ങളേ..... നിങ്ങൾ ഭാഗ്യം കെട്ടവർ.

ഹേ വരും തലമുറയിലെ സന്തതികളേ......

നിങ്ങൾക്കാ യോഗം ഇല്ലാതെ പോകുമല്ലോ എന്നോർക്കുമ്പോൾ ലജ്ജിക്കുന്നു ഞാൻ.

സ്നേഹിക്കാനും, പരസ്പരം ബഹുമാനിക്കാനും പഠിപ്പിക്കുന്ന മതങ്ങൾ..... മനുഷ്യ നന്മക്കായി അവതരിച്ച വിശുദ്ധ ഖുർആൻ, ഭഗവത് ഗീത, ബൈബിൾ എന്നിവ നമുക്ക് പകർന്നു തന്ന അറിവും ജ്ഞാനവും എവിടെ? മനുഷ്യരെ മനുഷ്യരായി കാണാതെ ഹിന്ദുവും, മുസ്ലീമും ക്രിസ്തിയാനിയും ആയി നാം കാണുന്നതെന്തേ?

ഹേ കുഞ്ഞുങ്ങളേ..... ഞാനും എൻറെ തലമുറയിൽ ഉള്ളവരും അനുഭവിച്ച സ്നേഹവും സാഹോദര്യവും നിങ്ങള്ക്കും ലഭിക്കട്ടെ എന്ന് പ്രാർഥിക്കുന്നു...

by: 

Manzoor Moideen