കർണ്ണൻ പുനർജ്ജനിക്കുന്നു

ദിവ്യഗർഭം പേറുന്ന കുന്തിമാർ
നൊന്തുപെറ്റ കുരുന്നുകൾ
ചുണ്ടുവരണ്ട് കരയുമ്പോൾ
ചുരത്താൻ മടിക്കും മനസ്സുകൾ

വാടകക്കുടിശ്ശികയിലൊറ്റ രൂപ
കുറഞ്ഞതിൽ,
വായിട്ടലയ്ക്കുന്നു
വാശി പിടിക്കുന്നു

പത്തു മാസം ചുമന്ന കുഞ്ഞിനെ
മുത്തം കൊടുക്കാൻ മറന്നവർ
പത്തുലക്ഷകരാറിലൊഴിയുന്നു

വാടകയ്ക്കുണ്ട് ഗർഭപാത്രങ്ങൾ
വില പറഞ്ഞുറപ്പിക്കുക!

പേറ്റുനോവറിയാതെ അമ്മയാകാൻ
സുന്ദര മേനിയുടയാതെ,
സുന്ദരിയായ് ലോകരെ കാട്ടുവാൻ
ജന്മം പ്രദർശന വസ്തുവാക്കി
വെറുതെ ജനിച്ച് മരിക്കുവാൻ

കർണ്ണൻ പുനർജ്ജനിക്കുന്നു
അമ്മ തൻ ചൂടറിയാതെ,
മുലപ്പാലിന്റെ മാധുര്യമറിയാതെ

മാത്യത്വം വിലപേശുമമ്മമാരെ
മാതാവിനെ തിരയുന്നുണ്ടവനിന്നും

ഗോപകുമാർ കൈമൾ