ഒരുമ്മ....

Anvin George

ഡോ മനുഷ്യാ നിന്നെ ഞാനുണ്ടല്ലോ ""അവളെന്നെ കെട്ടിപ്പിടിച്ചു ഉമ്മ വച്ചു.....

വീട് വെക്കാനുള്ള സ്ഥാനം കണ്ടു ആശാരിയെ വണ്ടിയിൽ കയറ്റി തിരിച്ചു വന്നപ്പോളാണ് അപ്രതീക്ഷിതമായി ഒരുമ്മ....

നേരത്തെ വാങ്ങിച്ച സ്ഥലം വരെ പോകാമെന്നു പറഞ്ഞാണ് അവളെ തറവാട്ടിൽ നിന്നു കൂട്ടിക്കൊണ്ട് വന്നത്...

വീടിനു സ്ഥാനം കാണാൻ ആള് വരുന്നുണ്ട് എന്നൊന്നും പറഞ്ഞില്ല...

വീട് വെക്കണം എന്ന ആഗ്രഹം അവൾക്കായിരുന്നു...

അവള് ഉമ്മ വെച്ച് തിരിഞ്ഞപ്പോൾ മുഖത്തെ പറ്റിയ തുപ്പൽ തുടച്ചു... അതു അവള് കണ്ടു....

"നീ എന്റെ തുപ്പൽ തുടച്ചല്ലേ ""

ഓടി വന്നു ചറപറാ ഉമ്മ...

ഒരു വണ്ടി വന്നു നിന്നതും അവൾ പയ്യെ എന്നിൽ നിന്നും മാറി...

കോൺട്രാക്ടർ ഇറങ്ങി വന്നു...."" എന്താണ്‌ ഭായ്... ഇതൊക്കെ ഇപ്പൊ പുറത്താണോ ""

""അതല്ലേ കോൺട്രാക്ടറു ചേട്ടാ വീട് പെട്ടെന്ന് വെച്ച് തരാൻ പറഞ്ഞത് ""ഒരു ചമ്മലും ഇല്ലാതെ അവൾ പറഞ്ഞു....

""ആയിക്കോട്ടെ"" ആശാരി വരച്ചു തന്നതൊക്കെ നോക്കി കാര്യങ്ങൾ പറഞ്ഞു കോൺട്രാക്ടർ പോയി...

കുറെ നാളത്തെ അധ്വാനത്തിന്റെ ഫലമാണ് ഇന്നു കുറ്റിയടിച്ചു വച്ചിരിക്കുന്നത്..

അനിയൻ കല്യാണം കഴിച്ചപ്പോൾ അവിടുന്ന് മാറണമെന്നു തോന്നി... അവനു ഒരു കുട്ടിയായി...

ഞങ്ങൾക്ക് ആ ഒരു ഭാഗ്യം ദൈവം ഇത് വരെ തന്നില്ല.....

എന്താണ്‌ കുഴപ്പം എന്ന് നോക്കണ്ട എന്നു പറഞ്ഞത് അവളാണ്..
""നമ്മുക്ക് വല്യ പ്രായം ഒന്നുമില്ലല്ലോ ദൈവം തരുന്നേ.. കുറച്ച് കൂടി വെയിറ്റ് ചെയ്യാം ""അവൾ പറഞ്ഞു..

അവൾക്കായിരുന്നു ഏറ്റവും ആഗ്രഹം..... തറവാട്ടിൽ നിന്നും മാറണമെന്നു..

കല്യാണം കഴിഞ്ഞു ആണ് പ്രണയിക്കാൻ പറ്റിയത്....സ്നേഹം മാത്രമുള്ള ഭാര്യ... അവള് ശെരിക്കും കുറുമ്പിയാണ്.. കുട്ടിതരം ആണ് മുഴുവൻ.... അമ്മയ്ക്ക് അതു അത്രയ്ക്ക് പിടിച്ചിട്ടില്ല...

എന്തും തുറന്നു പറയും... അതു തന്നെ പ്രധാന കാരണം

അങ്ങനെ വീട് പണി ആരംഭിച്ചു..... പണികൾ ഒക്കെ തകർത്തു നടക്കുന്നുണ്ട്.....

വീതം കിട്ടിയതും സ്ത്രീധനം കിട്ടിയതും എന്റെ സാലറി സർട്ടിഫിക്കറ്റ് വെച്ച് ലോൺ എടുത്തും ഒക്കെയാണ് ആരംഭിച്ചിരിക്കുന്നത്....

സാധനങ്ങൾ എല്ലാം ആദ്യം തന്നെ അടുപ്പിച്ചു.... ഇടയ്ക്ക് നിന്നു പോയാൽ വലിയ പാടാണ്....

ഞാൻ ലീവ് എടുത്താൽ പണി പാളും...പിന്നെ കോൺട്രാക്ടർ നമ്മുടെ സുഹൃത്തും ആണ്... അതുകൊണ്ട് കാര്യങ്ങളൊക്കെ അവൻ നോക്കിക്കോളും...

വൈകുന്നേരങ്ങളിൽ അവളും ഞാനും ഒരുമിച്ചു പോയി പണിയുടെ പുരോഗതി നോക്കും...

കട്ടള വെപ്പൊക്കെ കഴിഞ്ഞ് പണി മുന്നോട്ട് പോയി....

അങ്ങനെ വാർക്ക കഴിഞ്ഞു.. അവളും ഞാനും അന്ന് മുഴുവൻ അവിടെ ഉണ്ടായിരുന്നു....

വൈകുന്നേരം അവൾ പറഞ്ഞു... ""ഡാ ചേട്ടായി നമ്മൾക്ക് ഒളിച്ചു കളിക്കാം... ""

""പോടീ
വാ പോകാം ""

ഞാൻ വെളിയിൽ ഇറങ്ങി.... അവളെ കാണുന്നില്ല...

""ഡീ വാ കളിക്കല്ലേ ""
ഞാൻ അവളെ നോക്കി അകത്തു ചെന്നു...

"'ഡീ "" ഞാൻ നീട്ടി വിളിച്ചു....

തപ്പി ഞാൻ വീടിന്റെ പുറകിൽ ചെന്നപ്പോൾ ചെന്നപ്പോൾ, അവൾ വീടിന്റെ മുൻപിൽ നിന്നു എന്നെ വിളിച്ചു....

""താനെന്തൊരു പരാജയമാടോ ഇതുവരെ എന്നെ പിടിച്ചില്ലല്ലോ ....ഇന്നത്തെ ഒളിച്ചു കളി കഴിഞ്ഞു വാടാ ചേട്ടായി പോകാം """

അവളിത്രേം പറഞ്ഞത് കൊണ്ട് കുറച്ചു നേരം അവളെ പറ്റിക്കാൻ ആയി ഞാൻ വീടിന്റെ പിന്നിൽ തന്നെ മിണ്ടാതെ ഇരുന്നു....

""എനിക്ക് പേടിയാകുന്നുണ്ട് കേട്ടോ..... വാ ""

അവളുടെ ശബ്ദത്തിൽ ചെറിയ ഭയം ഉണ്ടായിരുന്നു...

ഞാൻ അടുത്തേക്ക് ചെന്നു.... അവളെന്റെ കയ്യിൽ പിടിച്ചു....

""ചേട്ടായി നിനക്ക് തരാൻ ഒരു സാധനം എന്റെ കയ്യിലുണ്ട്.... വേണോ ""
അവൾ ചോദിച്ചു..

""എന്താ താ ""ഞാൻ കൈ നീട്ടി..

അവൾ നിലത്തിരുന്നു...

ഒരു ബീഡി എന്റെ നേരെ നീട്ടി.... ""ബീഡി ഉണ്ടോ ചേട്ടായി ഒരു തീപ്പെട്ടി എടുക്കാൻ... ""

""ഇവിടെ വാടി.... ""
അവളെ വലിച്ചെഴുന്നേപ്പിച്ചു....

"'എനിക്ക് ബീഡി വലിക്കണം"" അവൾ ചിണുങ്ങി...

അതു വാങ്ങി ഞാൻ വലിച്ചെറിഞ്ഞു...

പണിക്കു വന്ന ഏതോ ബംഗാളി മറന്നു വെച്ച് പോയതാണ് ആ ബീഡി..

പോയ വഴിക്ക് അവളെന്റെ പുറത്തു ഇടിച്ചു....

""ദുഷ്ടാ ബീഡി വലിക്കാൻ സമ്മതിച്ചില്ലല്ലോ... "

വളരെ അടുത്ത ആൾക്കാരെ ഒക്കെ വിളിച്ചു സമയത്തു തന്നെ കയറിതാമസം നടത്തി

കേറി താമസം കഴിഞ്ഞു പിറ്റേന്ന് ഞാൻ ഓഫീസിലേക്ക് പോകാൻ ഇറങ്ങിയതും അവൾ പിന്നിലേക്ക് വിളിച്ചു...

""എന്തേ ""'
ഞാൻ ചോദിച്ചു

""ഉമ്മ വേണ്ടേ"" എന്നു ചോദിച്ചതും അവൾ തല കറങ്ങി വീണു... ഓടി ചെന്നു ഓട്ടോ വിളിച്ചു ഹോസ്പിറ്റലിൽ പോയി...

ഇന്നു വീട് വച്ചിട്ട് ഒരു വർഷം ആകുന്നു...
അന്ന് അവൾ തല കറങ്ങി വീണതിന്റെ റിസൾട്ട്‌ ഇന്നു എന്റെ മടിയിൽ ഇരിക്കുന്നുണ്ട്.....എന്റെ കാലു ചെറുതായിട്ട് അവൾ നനച്ചു...