ഒരു ഫെയ്ക്കത്തി.....(കഥ‐രണ്ടാം ഭാഗം)

ഓറഞ്ചിന് പച്ചയടിച്ച കളറിംഗ് ടെക്സ്റ്റ് ബുക്ക് യദുവിന് തിരികെ കൊടുത്തിട്ട് പൊട്ടിചിരിച്ച് കൊണ്ട് രൂപശ്രീ കിച്ചനിലേയ്ക്ക് പോയി.
ഇന്നിനി കളറടിച്ചത് മതി, മക്കള് പോയിരുന്ന് കാർട്ടൂൺ കണ്ടോ,വരുൺ യദുവിനോട് പറഞ്ഞു.
അവൻ പഴയത് പോലെ തലയാട്ടി,ബുക്കും മടക്കി സ്കൂൾ ബാഗിൽ വച്ച് ടി.വി ചാനൽ മാറ്റി കൊണ്ടിരുന്നു,കാർട്ടൂൺ വരുന്നത് വരെ.
വരുൺ ചായകുടിച്ച് ലഡുവും കഴിച്ച് കൊണ്ടിരുന്നപ്പോൾ,മെസഞ്ചറിൽ
വൃന്ദയുടെ പുതിയ മെസേജ് ബ്ലിങ്ക് ചെയ്തു,വരുൺ കയ്യിലെ ലഡു പ്ലെയ്റ്റിൽ വച്ചിട്ട്, മെസേജ് റൗണ്ട് മാക്സിമൈസ് ചെയ്തു.

പ്രൊഫൈൽ പിക്ചറിൽ സുന്ദരനാണല്ലൊ വരുൺ,വൃന്ദയുടെ മെസേജ് വായിച്ച- വരുൺ,നീട്ടി വിളിച്ചു,
കിച്ചനിലേയ്ക്ക്,രൂപേ.....

ഇനിയിപ്പൊ,എന്താ വേണ്ടെ,ഞാനിവിടെ കുറച്ച് തിരയ്ക്കിലാ,വരുൺ,രൂപശ്രി അടുക്കളയിൽ നിന്ന് ഉച്ചത്തിൽ പറഞ്ഞു.

രോഗി ഇച്ഛിച്ചതും ഡോ.കൽപിച്ചതും ചാറ്റിംഗ്,രൂപയിപ്പൊ വരില്ലാന്ന് ഉറപ്പായി,സമാധാനമായി ചാറ്റ്
ചെയ്യാം,വൃന്ദയുമായി,വരുൺ മനസ്സിൽ പറഞ്ഞു...

താൻ സുന്ദരനാണെന്ന്, "ഭാര്യ ഇതുവരെ പറയാത്ത,ആ സത്യം",തുറന്ന് പറഞ്ഞ വൃന്ദയുടെ മെസേജ് ഒരാവർത്തി കൂടെ വായിച്ച വരുണിന് ആ മെസേജിന് താൻ കഴിച്ച് കൊണ്ടിരുന്ന ലഡുവിനേയ്ക്കാൾ മധുരമുള്ളതായി തോന്നി.
എന്നിട്ട് വൃന്ദയുടെ ആ മെസേജിന് റിപ്ലെ അടിച്ചു,വരുൺ...ഏറെക്കുറെ,എന്ന് പറഞ്ഞിട്ട്...
അതു കണ്ടതും ഉടനെ വൃന്ദയുടെ അടുത്ത മെസേജ്,വരുൺ കട്ടപ്പനയിലെ ഋതിക് റോഷൻ കണ്ടുവല്ലെ... ഉം,വൃന്ദയും നേരത്തെ കണ്ടല്ലെ,വരുൺ,വൃന്ദയ്ക്ക് മെസേജ് ചെയ്തു...
വരുൺ എന്താ ചെയ്യണെ,വൃന്ദയുടെ അടുത്ത മെസേജ്.ഞാൻ ചായ കുടിച്ച് ലഡുവും കഴിച്ച്
കൊണ്ടിരിയ്ക്കുകയാ,വരുൺ മറുപടി അയച്ചു..
ജോലി എന്താണെന്നാ,ഞാൻ ഉദ്ദേശിച്ചെ,വരുണേ.
ആണോ,എഞ്ചിനിയറാ,വരുൺ തിരുത്തി..

എന്നാലും,നല്ല ഹ്യൂമർസെൻസുണ്ടല്ലൊ, വരുണിന്,ശരിയാണൊ...? ഏറെക്കുറെ ശരിയാ,വീണ്ടും വരുൺ അടിച്ചു മൊബൈലിന്റെ കീ പാഡിൽ...

വൃന്ദയും സുന്ദരിയാട്ടൊ,പ്രൊഫൈൽ പിക്ചറിൽ,ശരിയ്ക്ക് വൃന്ദയുടെ പിക്ചർ തന്നെയാണൊ,അതോ കടമെടുത്തതോ...? സെലിബ്രിറ്റീസിന്റെയും കാണാൻ നല്ല ചന്തമുള്ള ഹൂറികളെ പോലെയുള്ള തരുണീമണികളുടേയും ഫോട്ടൊ അടിച്ച് മാറ്റി പ്രൊഫൈൽ പിക്ചറാക്കുന്ന ഒരു കലാപരിപാടി മുഖപുസ്തകത്തിൽ തകൃതിയായി നടക്കുന്നത് കൊണ്ട്,ചോദിച്ചതാട്ടൊ, വരുൺ ഒന്ന് നീട്ടിയടിച്ചു...

അപ്പൊ എന്റെ പിക്ചർ ഡ്യൂപ്ലിയാണെന്നാണൊ,വരുണിന്റെ കണ്ടു പിടുത്തം,വൃന്ദ വരുണിന്റെ സംശയനിവാരണത്തിനായി ഇട്ട് കൊടുത്തു...
ഏറെക്കുറെ ബോധ്യായട്ടൊ,വരുൺ റിപ്ലൈ കൊടുത്തു...
എന്താ ബോധ്യായെ,വൃന്ദയ്ക്ക് വിടാൻ ഉദ്ദേശമില്ല...പിക്ചർ വൃന്ദയുടെ
യല്ലാന്ന്,വരുൺ അടിച്ചു,എന്നിട്ട് തുടർന്നെഴുതി,ഞാൻ തമാശ പറഞ്ഞതാട്ടൊ,വൃന്ദയെയും പൊഫൈൽ പിക്ചറിനെയും എനിയ്ക്ക് വിശ്വാസാട്ടൊ....

വരുണിനെ ഭാര്യയ്ക്ക് വല്യ
ഇഷ്ടായിരിക്കുമല്ലെ,ഇഷ്ടം പോലെ തമാശ കേൾക്കാല്ലൊ,ദിവസവും, വൃന്ദയുടെ അടുത്ത മെസേജ്...
ഏറെക്കുറെ,വരുൺ സമ്മതിച്ചു,

എന്നിട്ട് തുടർന്നെഴുതി,അതിന്റെ പേരിൽ ഒരിയ്ക്കൽ എനിക്കവൾ വാണിംഗ് തന്നിട്ട് വക്കീൽ നോട്ടീസയക്കുമെന്ന് പറഞ്ഞു..

അതെന്തിനാ,വരുൺ...?
അതോ ഒരിയ്ക്കൽ കിച്ചനിൽ വച്ച് ഞാൻ തമാശ പറഞ്ഞ്,അവൾ ചിരിച്ച് കൊണ്ട് നിന്നപ്പോഴേക്കും,സ്റ്റൗവിൽ വച്ചിരുന്ന പാൽ ചായ തിളച്ച് പോയി സ്റ്റൗവും ചീത്തയായി അവൾക്ക് പണി കിട്ടി...

പിന്നൊരിയക്കൽ ബാത്ത് റൂമിൽ വാഷിം മെഷീനിൽ വാഷ് ചെയ്യാൻ സോപ്പ് പൊടിയും മുഷിഞ്ഞ ഡ്രസ്സുകളും ഇട്ട് വെള്ളത്തിന്റെ ടാപ്പ് ഓപ്പണായി കിടന്നപ്പോൾ,ഒരു അത്യാവശ്യ കാര്യം പറയാനുണ്ടെന്ന് പറഞ്ഞ്,ഞാൻ രൂപയെ പുറത്തേയ്ക്ക് വിളിച്ച് പറഞ്ഞ തമാശ കേട്ട്,അവളും കൂടെ ഞാനും ഒരു കമ്പനിയ്ക്ക് ചിരിച്ച് കൊണ്ട് നിന്നപ്പോൾ വാഷിംഗ് മെഷീനിൽ വെള്ളം നിറഞ്ഞ് പുറത്തേയ്ക്ക് ഒഴുകി,ബാത്ത് റൂം നിറയെ സോപ്പ് വെള്ളമായി...

അന്നാണ് രൂപ എനിയ്ക്ക് വാണിംഗ് തന്നത്,ഭാര്യാ പീഡനത്തിന് എനിയ്ക്ക് വക്കീൽ നോട്ടിസ് അയച്ചിട്ട് മോനെയും കൊണ്ട് അവളുടെ വീട്ടിൽ പോയി നിക്കുമെന്ന് പറഞ്ഞു...
രൂപ ശരിയ്ക്കും അങ്ങിനെ ചെയ്യോ,വരുൺ,വൃന്ദ ആകാംക്ഷന നിറഞ്ഞ മെസേജ്...
അവളുടെ ചേട്ടൻ പ്രവീൺ അഡ്വ.ആണ് ആ ബലത്തിൽ കാച്ചണതാ ആ ഭീഷണഎയൊക്കെ...
എന്നിട്ട് വരുൺ എന്ത് പറഞ്ഞു,വന്ദയുടെ ആകാംക്ഷ അവസാനിയ്ക്കുന്നില്ല.
അവളുടെ ചേട്ടൻ എനിയ്ക്ക് വിളിച്ചപ്പോ,ഞാനൊരു സൂചന കൊടുത്തു.

ആഹാ കൊള്ളാല്ലൊ,എന്നിട്ട്,വൃന്ദയ്ക്ക് കേൾക്കാൻ വല്ല്യ ആവേശമായി....

ചേട്ടൻ പറഞ്ഞു,വരുൺ പിടിച്ച് നിക്കണം,എന്തൊക്കെ സംഭവിച്ചാലും രൂപയെ വീട്ടിലേയ്ക്ക് വരാതെ നോക്കണമെന്ന്,പറഞ്ഞു....
എന്നിട്ട് അതിന് പ്രത്യുപകൂരമെന്നോണം,അടുത്ത ദിവസം ഓഫീസിൽ വന്ന് എനിയ്ക്ക് പുതിയൊരു ഐ ഫോൺ തന്നു,ഏതോ ക്ലയന്റിന്റെ പക്കൽ നിന്ന് കാശ് മുടക്കില്ലാതെ അടിച്ച് മാറ്റിയതാവാനെ തരമുള്ളൂ...
അത് കൊണ്ട് ഞാൻ,വേണ്ടായിരുന്നൂട്ടൊ,എന്ന് പറഞ്ഞിട്ട് ഐ ഫോൺ സന്തോഷത്തോടെ,സ്നേഹപൂർവ്വം കൈ നീട്ടി സ്വീകരിച്ചു...

അതെന്തിനാ ഐ ഫോൺ മേടിച്ച് തന്നെ,വരുൺ..? അതോ,രൂപ അവിടെ ചെന്ന് നിന്നാൽ അളിയന്റെ ഭാര്യ പിള്ളേരേം കൊണ്ട് അവരുടെ വീട്ടിലേയ്ക്ക് പോകൂമെന്ന്,പറഞ്ഞ്,
അളിയന് ഒരു വാണിംഗ് കൊടൂത്തു,ഏട്ടത്തി,വക്കീൽ നോട്ടീസ് ഇല്ലാതെ തന്നെ...

എന്നിട്ട് ഭാര്യ അറിഞ്ഞോ,മൊബൈൽ തന്ന കാര്യം, വൃന്ദയുടെ ചോദ്യ രൂപത്തിലുള്ള മെസേജ് തുടർന്നു.
ഇല്ല മൊബൈൽ ഓഫീസിൽ എടുത്ത് വച്ച്,രണ്ട് ദിവസം കഴിഞ്ഞ് വന്ന രൂപയുടെ ബർത്ത്ഡേയ്ക്ക് എന്റെ സർപ്രൈസ് ഗിഫ്റ്റായി പ്രസന്റ് കൊടുത്തു,രൂപയ്ക്ക്,
അവളുടെ ഏട്ടൻ തന്ന ആ ഐ ഫോൺ...

രൂപയ്ക്ക് വല്യ സന്തോഷായി കാണുമല്ലെ,വൃന്ദ ആകാംക്ഷ നിലനിർത്തി ചോദിച്ചു...
ഉം,ഏറെക്കുറെ സന്തോഷായി രൂപയ്ക്ക്...

ആ സന്തോഷത്തിൽ,ബർത്ത് ഡേയ്ക്ക് അവൾക്കിഷ്ടപ്പെട്ട അടപ്രഥമൻ ഉണ്ടായ്ക്കാതെ എനിയ്ക്കിഷ്ടപ്പെട്ട ഗോതമ്പ് പായസമുണ്ടാക്കി തന്നു അവൾ...
എന്നിട്ടും സന്തോഷം തീരാഞ്ഞിട്ട് രാത്രി ബെഡ്റൂമിൽ വച്ച്,ആ ഐ ഫോൺ എനിയ്ക്ക് തിരിച്ച് തന്നിട്ട് രൂപ പറഞ്ഞു, ഇത് വരുൺ യൂസ് ചെയതോളു,ഓഫീസിൽ പോകുന്നതല്ലേ എന്ന്...

എന്നിട്ട് വരുൺ തിരിച്ച് മേടിച്ചോ ഐ ഫോൺ...
വൃന്ദ വീണ്ടും മെസേജിട്ടു...

ഞാൻ തോറ്റ് പോയി വൃന്ദേ,അവളുടെ സ്നേഹത്തിന് മുമ്പിൽ,മൊബൈൽ മേടിച്ചിട്ട്,രൂപയ്ക്ക് ഒരു ഉമ്മ കൊടുത്തു ഞാൻ,അതിന് പകരമായി...
അപ്പോൾ രൂപ പറഞ്ഞു,വരുൺ ഇനിയും തമാശ പറഞ്ഞോട്ടൊ,ഞാൻ വക്കീൽ നോട്ടീസ് അയക്കില്ലാന്ന്...

എന്നിട്ട് വരുൺ ആ മൊബൈൽ എന്ത് ചെയ്തു,വൃന്ദയുടെ ചോദ്യം മെസേജായി പ്രത്യക്ഷപ്പെട്ടു...
ആ മൊബൈലിൽ ആണല്ലൊ ഞാനിപ്പോൾ വൃന്ദയുമായി ചാറ്റി കൊണ്ടിരിയ്ക്കുന്നത്,വരുൺ തിരിച്ചടിച്ചു,മെസേജിൽ...

വരുൺ ആള് കൊള്ളാല്ലൊ,വൃന്ദയുടെ അടുത്ത മെസേജും ഒരു ഇമേജിയും പ്രത്യക്ഷപ്പെട്ടു....
ഏറെക്കുറെ,എന്ന് വരുണതിന് മറുപടി ടൈപ്പ് ചെയ്തു....(തുടരും)

ഹാഷിം മാടശ്ശേരി,കുന്നുകര ആലുവ