ഒറ്റവരിക്കല്ല്

ഒറ്റവരിക്കല്ലിൽ തീർത്തൊരു
മറയാണിന്നു നിനക്കഭയം.....
ആത്തണലിൽ ചേർത്തുനിറച്ചൊരു
കനവാണിന്നു നിനക്കു സ്വരം...

പുതുമുറ്റം പാകിമിനുക്കിയ
പൂക്കല്ലല്ലിതു പൂനിറയാൻ....
പുതുപുത്തൻ വേദിനിറഞ്ഞൊരു
നാട്യവുമല്ലിതു ഭംഗിക്കായ്...

ഈക്കല്ലിൽ നിണവുമണിഞ്ഞൊരു
ചേലുടയാടച്ചുവരുണ്ട്....
ഈക്കല്ലിൽ നൊമ്പരമേറ്റവ-
രങ്കം വെട്ടിയ പാടുണ്ട്....

ഈക്കല്ലിൽ നെഞ്ചുപിളർന്ന
വിലാപത്തിൻ കടലാഴങ്ങൾ...
ഈക്കല്ലിൽ ഓർമ്മകളൂറ്റം
കൊണ്ടു നടന്നൊരു തലമുറയും...

ഈക്കല്ലിൽ ത്യാഗത്തിൻ
രഥചക്രമുരുട്ടിയ കഥയുണ്ട്....
ഈക്കല്ലിൽ പുഴയും പാടവും
ഓർത്തുകൊതിച്ചൊരു പാട്ടുണ്ട്...

കഥകൾക്കും കഥയുടെ പിറകിൽ
കഥ തേടുന്നൊരു കഥയുണ്ട്...
************************************

2) നിലപാടിൻ തറ
--------------------------®

പുതുപുത്തൻ ശാസ്ത്രങ്ങൾക്കീ-
ഒറ്റവരിക്കല്ലപശകുനം....
നിലപാടിൻ തറയിൽമെഴുകിയ -
ശരിയെ നോക്കി പരിഹാസം...

ഈക്കല്ലിൻ സുഷിരത്തിൽ ചില -
മായകൾ കാട്ടി മയക്കുമ്പോൾ
ചായുന്നൊരു തളിരില വിശ്വ-
പൊരുളറിയാതെ ചിരിക്കുന്നു...

ഓർക്കുക നീ തിരികെ മടങ്ങി
വരുന്നൊരു നേരം ചാരത്തായ്...
കാരണമീ നിലപാടിൻ തറ
കാലം കാത്ത മഹാ സാക്ഷി....

അർദ്ധശതങ്ങൾക്കപ്പുറമാ-
ത്തലതിരിയും നിന്റെ പ്രതീക്ഷകളും...
അന്നേരം നിലപാടിൻ തറയിൽ
നീ വന്നേത്തമിടുമ്പോൾ ഞാൻ...

ഒറ്റവരിക്കല്ലെന്നൊരു പേരിൽ
സ്ഫടികം തീർത്ത ശിലാഫലകം
നിറയും മൗനം കണ്ണിൽ മൂടിയ
നനവും ചൂടിയിരിക്കുമ്പോൾ..നീ..
ഓർക്കുക വീണ്ടും നിലപാടിൻ തറ
കൈവിട്ടോടിയ നിമിഷത്തെ....!

രാജേഷ്.ഡി