ഒരു മറുപടിക്കവിത: വിഷയം: ലൈക്ക്

ലൈക്കുകൾ ലൈക്കുകൾ സർവ്വത്ര
കിട്ടാനൊന്നുമേയില്ലത്ര
അപ്പുറം പോസ്റ്റിൽ കണ്ടത്രെ
ഇപ്പുറം പോസ്റ്റിൽ കണ്ടത്രെ
എന്നുടെ പോസ്റ്റിൽ ഇല്ലത്രെ .

ലൈക്കുകളെനിക്കിനി തന്നില്ലാകിൽ
വെട്ടും നിന്നുടെ പേരത്രേ
പോസ്റ്റിന്നടിയിൽ കുറിച്ചില്ലെങ്കിൽ
"ബ്ലോക്കും നിന്നെ" പറഞ്ഞത്രേ .

"ഇൻബോക്സ''തിലൊരു മെസ്സേജ് വന്നു
പരാതി,പരിഭവ ,മരിശം പൂണ്ടു
എന്തട മർക്കട ശുoഭാ,ശുനകാ
തന്നീടാത്തതെന്തേ,യൊരു ലൈക്ക്

ടാഗുകൾ ,മെൻഷൻ,ഭീഷണി ,പുഞ്ചിരി
ലൈക്കുകൾ കിട്ടാൻ പലവിധമാർഗ്ഗം.
ലൈക്കുകളിനിയും തന്നില്ലെങ്കിൽ
പുരകളതഗ്നിക്കിരയാക്കീടും ..

പിന്നൊരു കൂട്ടർ,കവനം ചെയ്‌വോർ
സ്വയമായയ്യോ ലൈക്ക് ചെയ്യുന്നു
ഇദ്ധരയിലിങ്ങനെ ലൈക്കുകൾ തെണ്ടാൻ
അൽപ്പവുമില്ലാ മാനക്കേട് .

ലൈക്കില്ലെന്നൊരു കാരണം ചൊല്ലി
തൂലികപോലുമെറിഞ്ഞൊരു വങ്കൻ
പൊന്നുവിതയ്ക്കും താളുകളെല്ലാം
ചീന്തിയെറിഞ്ഞാ,മന്ദശിരോമണി .

ലൈക്കില്ലേലും, കമന്റില്ലേലും
എന്നുടെ അക്ഷരം സ്വർണ്ണനിറം
എന്നും പുതിയൊരു താളതിലൊന്നിൽ,
പകർന്നുവയ്ക്കും പുതുവർണ്ണങ്ങൾ

ഹന്ത ! ഇതെന്തൊരു കഷ്ടം
ലൈക്കില്ലെങ്കിൽ കരഞ്ഞീടാമോ !
ലൈക്കില്ലേലും ടാഗില്ലേലും
തുടരുക നിങ്ങൾ തന്നുടെ കർമ്മം

Binu Kallarackal