പ്രണയത്തിന്റെ തിരമാലകൾ

അകലാൻ ആഗ്രഹിച്ചില്ല..എന്നിട്ടും നീയകന്നു പോയി..കനൽ പോലെ എന്റെ മോഹങ്ങൾ കൂട്ടിവെച്ച് കാത്തിരുന്നു...ഒരിക്കൽ നിന്റെ തിരിച്ചു വരവിനായി.....ഓരോ രാത്രികളിലും എന്റെ തലയിണ നനഞ്ഞു ...കണ്ണീരു വീണ്....കാത്തിരിപ്പായിരുന്നു..പ്രതീക്ഷയില്ലാത്ത കാത്തിരുപ്പ്...വാഗ്ദാനമൊന്നും നൽകിയിരുന്നില്ല...ഒന്നറിയാമായിരുന്നു...എന്നിൽ നിന്ന് നിന്നിലേയ്ക്കുള്ള വാതിൽ നീ അടച്ചു ....പക്ഷെ നിന്നിൽ നിന്നും എന്നിലേയ്ക്കുള്ള വാതിൽ ഞാനറിയാതെ നീ തുറന്നിട്ടു....എന്റെ ഓർമ്മകളെ നീ നുള്ളിക്കളഞ്ഞിരുന്നില്ല. എന്ന് ഞാൻ വിശ്വസിക്കട്ടെ. .....അതുപോലെ നിന്റെ ഓർമ്മകളെ ഞാനും ഒരിക്കലും കളയില്ല...നിശ്ശബ്ദമായാണ് ഞാൻ നിന്നെ പ്രണയിച്ചത്....നിന്നിൽ നിന്നും ഒന്നുമാഗ്രഹിക്കാതെ.... യാത്ര പോലും പറയാതെ നീ പോയത് എന്റെ നെഞ്ചിലെ പ്രണയത്തിൽ ചവിട്ടിയാണ്..നീ എനിക്ക് സമ്മാനിച്ചത് ..അല്ലെങ്കിൽ ഞാൻ നിനക്കായ് കരുതിയത് കറ പുരളാത്ത പ്രണയമായിരുന്നു...നിന്റെ ചിന്തകളിൽ, നിന്നിൽ ഏറ്റത് പുഴുക്കുത്താണെങ്കിലും അവയെ ഞാനെന്റെ നെഞ്ചോട് ചേർത്ത് പൂക്കളായി പ്രണയത്തിന്റെ ചുവന്ന വസന്തമായി സ്വീകരിക്കുമായിരുന്നു....ഇന്ന് ഞാൻ നിന്റെ ഓർമ്മകളുടെ തടവറയിലാണ്..
...
............ഈ തടവറ എനിക്ക് പ്രപഞ്ചത്തിലെ മനോഹരമായ സൗധമാണ് ..അതിൽ നിറയെ നിന്റെ ഓർമ്മകൾ തീർത്ത വജ്രത്തിളക്കമാർന്ന പൂക്കളുണ്ട്....പറഞ്ഞിട്ടും സാധിക്കാനാവാതെ പോയ എന്റെ കുഞ്ഞു മോഹങ്ങൾ ചിത്രശലഭങ്ങളായി സ്വർണ്ണ ചിറകുകൾ വീശി ഈ സൗധത്തിനുള്ളിലൂടെ പറക്കുന്നുണ്ട്.....നിന്റെ കൈ പിടിക്കാനാശിച്ചു ഞാൻ എത്രയോ വട്ടം നിന്നരികിലെത്തി,ഒപ്പം നടന്നിട്ടുമെന്റെ നീട്ടിയ കൈവിരൽ നീ കാണാതെ പോയി....നിന്റെ മൗനത്തിനുള്ളിൽ നീയൊളിപ്പിച്ച വേദനകൾ ഞാൻ എന്റേതായി സൂക്ഷിച്ചിരുന്നു..നിന്റെ വേർപാടിൽ ഞാൻ കുറിച്ച അക്ഷരങ്ങളിലൂടെ ഞാനെന്നെ തോൽപ്പിച്ചു
. പ്രണയമോ വിരഹവേദനയോ തിരസ്കരണമോ അർത്ഥമെന്നറിയാതെ വാക്കുകൾ എനിക്ക് മുന്നിൽ കീഴടങ്ങി....ഒന്നറിയാമെനിക്ക് അകലമിട്ട നിന്റെ മനസ്സിൽ സ്നേഹത്തിന്റെ കടലുണ്ട്.....നിറഞ്ഞിട്ടും കവിഞ്ഞൊഴുകാൻ മടിക്കുന്ന കടൽ.....ഓളങ്ങൾ തീർത്ത് നിന്റെയുള്ളിൽ തുടങ്ങി നിന്റെയുള്ളിൽ അലറിവിളിച്ച് ഒതുങ്ങുന്ന കടൽ.....
നീയമർത്തിയ പ്രണയത്തിന്റെ തിരമാലകൾ ഓളം വെട്ടുന്ന കടൽ.......എത്ര ദൂരമോടിയാലും എന്റെ സ്നേഹം വിളിക്കുമ്പോൾ തിരിയെ ഒഴുകിയെത്താനാവില്ല നിനക്ക്.....അതിനാണൊരു കരയായി കാത്തു കിടന്നതും....ഇനി ഒഴുകാം നിനക്ക് ദിക്കു മാറി എത്ര ദൂരം വേണമെങ്കിലും......നിന്റെ കാൽപ്പാട് തേടി ഞാനും....... യുഗങ്ങളോളം നിന്നെ പ്രണയിക്കാൻ...