:: നൊങ്ക് :: (കഥ )

:: നൊങ്ക് :: (കഥ )
---------=-----------=--------=-----------=-------------------------- തെങ്കാശി ബസ് സ്റ്റാൻഡിൽ എത്തുമ്പോൾ രാവിലെ ആറ് മണി കഴിഞ്ഞിരുന്നു.മലയിടുക്കുകളെ തഴുകിയെത്തുന്ന കാറ്റിന് പിച്ചിപ്പൂവിന്റെ സുഗന്ധമായിരുന്നു .
സ്റ്റാൻഡിൽ നിരനിരയായി തമിഴന്റെ ബസുകൾ .അതിലേക്ക് കൊട്ടയും വട്ടിയും പിള്ളേരുമൊക്കെയായി തള്ളിക്കയറുന്ന തമിഴ് മക്കൾ .ഇടയിൽ ഒരു കേരളാ ബസും കണ്ടു .ഡ്രൈവർ ചായകുടിക്കാൻ പോയിരിക്കുവാണെന്ന് തോന്നുന്നു .

പ്രഭാതമാണെങ്കിലും നല്ല ചൂടുണ്ട് .ബസ് സ്റാൻഡിനരികിലായി ചായപ്പീടികകൾ.ചെറിയ ഗ്ലാസിൽ അരഭാഗം മാത്രം വരുന്ന,എരുമപ്പാൽ ചേർത്ത് കടുപ്പത്തിലുണ്ടാക്കുന്ന ചായ,നല്ല രസമാണ് കുടിക്കാൻ .

"പൂ ..പിച്ചിപ്പൂ ..മല്ലിപ്പൂ ...പൂ ..പൂവേ ..ശാർ ..പൂ വേണുമാ .." ശബ്ദം കേട്ട് തിരിഞ്ഞുനോക്കിയപ്പോൾ ,തലമുഴുവൻ പിച്ചിപ്പൂ ചൂടിയ 55 വയസോളം വരുന്ന ഒരു സ്ത്രീ ,കയ്യിൽ പൂക്കൊട്ടയുമായി നിൽക്കുന്നു .കൊട്ടക്കുള്ളിൽ പലതരത്തിലുള്ള പൂക്കൾ .പൂമാലയും ഉണ്ട് .എന്നോട് തന്നെയാണോ ചോദിച്ചതെന്നുള്ള സംശയത്തിൽ ഞാൻ തിരിഞ്ഞുനോക്കി .

"ഉങ്കളുക്കിട്ടെ താൻ നാൻ കേട്ടത് ..വേറെ യാരുമേയല്ല..'' എന്റെ സംശയം കണ്ടിട്ട് അവർ പറഞ്ഞു ." അമ്മാ ..എനക്ക് എതുക്ക് പൂ ...എങ്കിട്ടെ പെൺകൾ യാരുമേ ഇല്ലയെ ..'' ഞാൻ ചിരിച്ചുകൊണ്ട് ചോദിച്ചു ."പെൺകൾ ഇരുന്താൽ മട്ടും പൂ വയ്ക്കലാമ ..യറുക്കും വയ്ക്കലാം ..സറീ ..വിട്ടിടുങ്കോ ..'' അവർ തിരിഞ്ഞു നടന്നു .

സ്റ്റാൻഡിനുള്ളിൽ ആകെ തിരക്കാണ് .ആൾക്കാർ കലപിലാ സംസാരിച്ചുകൊണ്ട് അങ്ങോട്ടുമിങ്ങോട്ടും പോകുന്നു .

"സാർ ..ഇങ്കേയിരുന്ത് ..അംബാസമുദ്രം പോകറുതുക്ക്‌ ബസ് കിടക്കുമാ .." ബസ് സ്റ്റാൻഡിലെ കൗണ്ടറിൽ പോയി ചോദിച്ചു .കറുത്ത് തടിച്ച ഒരു തമിഴൻ കൗണ്ടറിനുള്ളിൽ ഇരിക്കുന്നു .
" ഇറുക്ക് ..ഏള് മണിയാക്കും " അയാൾ പറഞ്ഞപ്പോൾ ഞാൻ വാച്ചിൽ നോക്കി.ഇനിയും അരമണിക്കൂർ ഉണ്ട് .

നേരെ ചായക്കടയിലേക്ക് നടന്നു "അണ്ണൈ .ഒറു ടീ കൊടുങ്കോ .."
ചായക്കടക്കാരൻ ഒരു ചായയെടുത്തു തന്നു .അത് കുടിച്ചു തീരാറായപ്പോഴേക്കും അംബാസമുദ്രത്തിലേക്കുള്ള ബസ് വന്നു .

കട്ടബൊമ്മൻ ട്രാൻസ്‌പോർട് കോർപറേഷൻ വക ബസ് .കേരളത്തിലെ ടുറിസ്റ് ബസുകളെപ്പോലെ ജനാലകൾ മുഴുവൻ കറുത്ത ചില്ലിട്ട ബസ് .ബസിന് പുറകുവശം നന്നായി ഡിസൈൻ ചെയ്തിരിക്കുന്നു .

ചായഗ്ലാസ്സും പൈസയും തട്ടിപ്പുറത്ത് വച്ചിട്ട് ബസിന് നേർക്കോടി.അംബാസമുദ്രത്തിൽ പച്ചക്കറികൃഷി ചെയ്യുന്ന സുഹൃത്തിനെ കാണാനാണ് ഈ പോക്ക് .പറ്റിയാൽ അവന്റെ കൃഷിയിടത്തിന് സമീപത്തായി കുറച്ച് സ്ഥലം വാങ്ങാനും പദ്ധതിയുണ്ട് .

ബസിൽ കയറാൻ നല്ല തിരക്കുണ്ടായിരുന്നു .വല്ലവിധേനയും ഉള്ളിൽ കയറിപ്പറ്റി.രണ്ടുപേർക്കിരിക്കാവുന്ന ഒരു സീറ്റിലിരുന്നു .

"ജ്ഞാനപ്പളത്തെ പിളിന്ത് .."പഴയ ഏതോ തമിഴ് സിനിമയിലെ പാട്ട് വെളിയിലെ ഏതോ ചായക്കടയിൽ നിന്നും ഒഴുകിയെത്തുന്നു .

"തമ്പി ..കൊഞ്ചം തള്ളി ഉക്കാര് .." ശബ്ദം കേട്ട് തിരിഞ്ഞു നോക്കിയപ്പോൾ ഒരു കറുത്തുതടിച്ച തമിഴ് സ്ത്രീ.അൻപത് വയസോളം കാണും .നീലനിറത്തിലുള്ള ഒരു ചേലചുറ്റി ,തലമുടി നിറയെ മുല്ലപ്പൂ ചൂടിയിരിക്കുന്നു.കയ്യിൽ,രണ്ടുമൂന്ന് തുണിസഞ്ചി നിറയെ സാധനങ്ങളും.കൂടെ പത്തുവയസോളം പ്രായമുള്ള മെലിഞ്ഞ ഒരു പെൺകുട്ടിയും .മകളാണെന്ന് തോന്നുന്നു .ഞാൻ ജനാലക്കരികിലേക്ക് നീങ്ങിയിരുന്നു ." ഇന്ന് കൊഞ്ചം തള്ളുങ്കോ .." അവർ വീണ്ടും പറഞ്ഞു .ഞാൻ വീണ്ടും നീങ്ങി .

അവർ രണ്ടുപേരും കൂടി എന്റെ അടുത്തിരുന്നു .കയ്യിലിരുന്ന തുണിസഞ്ചികൾ ചിലത് ഓവർഹെഡ് കാരിയറിൽ വച്ചു .

നീല യൂണിഫോമിട്ട കണ്ടക്ടർ നീട്ടി വിസിലടിച്ചപ്പോൾ ബസ് മുന്നോട്ട് നീങ്ങി.ഞാൻ പുറത്തെ കാഴ്ചകളിൽ ലയിച്ചു.
പച്ചക്കറിത്തോട്ടങ്ങളും നെൽപ്പാടങ്ങളും പിന്നിലാക്കി ബസ് മുന്നോട്ട് കുതിച്ചു .

റോഡിനിരുവശവും വലിയ പുളിമരങ്ങളും വാകമരങ്ങളും ,വേപ്പുമരങ്ങളും കൊണ്ട് നിറഞ്ഞിരുന്നു .നല്ല തണൽ തരുന്ന മരങ്ങൾ .വാകമരങ്ങൾ മിക്കതും പൂത്തുലഞ്ഞുനിൽക്കുന്നു .ഗ്ലാസിന്റെ വിടവിലൂടെ ബസിനുള്ളിലേക്ക് തള്ളിക്കയറുന്ന വരണ്ട കാറ്റ് .

"ഇന്താങ്കെ ..ഇത് ശാപ്പിടുങ്കോ .." നോക്കിയപ്പോൾ കയ്യിലെ പാത്രത്തിൽ ഇന്നും തോട് കളഞ്ഞ രണ്ട് പനനൊങ്ക് എന്റെ നേരെ അവർ നീട്ടുന്നു .അവരുടെ കയ്യിലുടെ പനനൊങ്കിന്റെ ചാറൊഴുകുന്നു ."വാങ്കി ശാപ്പിടുങ്കോ ..നല്ലാ മൂള വരും .." അവർ ചിരിച്ചുകൊണ്ട് എന്റെ നേരെ വീണ്ടും നീട്ടി .ഞാൻ അവരുടെ മുഖത്തേക്ക് നോക്കികൊണ്ട് ,മടിച്ചു മടിച്ച് അത് വാങ്ങി .നോക്കിയപ്പോൾ കുട്ടിയുടെ കയ്യിലും നൊങ്ക് .അവളത് തിന്നാൻ തുടങ്ങിയിരിക്കുന്നു .അതിന്റെ ചാർ അവളുടെ ഉടുപ്പിലും മുഖത്തുമെല്ലാം പറ്റിയിട്ടുണ്ട് .

ഞാനെന്റെ കയ്യിലുള്ള നൊങ്ക് കഴിക്കാൻ തുടങ്ങി.അവർ കയ്യിലുള്ള സഞ്ചിയിൽ നിന്നും ഒരു പനയോലക്കുമ്പിൾ എടുത്ത് ,അതിലേക്ക് കയ്യിലുള്ള പ്ലാസ്റ്റിക് കുപ്പിയിൽ നിന്നും ഒരു ദ്രാവകം പകർന്ന് എന്റെ നേരെ നീട്ടി ."ശാപ്പിടുങ്കോ ,ഇത് വന്ത് പാനി ..പനയിൽ ഇരുന്ത് കിടക്കിറത് ..കുടിക്കറുതുക്ക്‌ സൂപ്പർ .." ഞാനത് വാങ്ങിക്കുടിച്ചു .നല്ല രുചി .കരിക്കുവെള്ളം പോലെ .

"നീങ്കെ എങ്കെ പോറേൻ ..അംബാസമുദ്രമാ ..നാങ്കള് 'ഒട്ടൻഛത്രം' പോറേ.."
അവര് ചോദിച്ചപ്പോൾ ഞാൻ അതെയെന്ന് തലയാട്ടി."അങ്കെയെന്ന ..ഏതാവത് വ്യാപാരം വച്ചിരുക്കാ .." അവർ വീണ്ടും ചോദിച്ചു ."ഇല്ലൈ .അങ്കെ എൻ ഫ്രണ്ട് ഇരുക്ക് " ഞാൻ പറഞ്ഞു .

"ആനാൽ നാൻ വന്ത് എൻ പുരുഷനെ പാക്കിറത്തുക്ക് പോറെൻ ...പുരുഷൻ എൻട്രാൽ എൻ പളയ പുരുഷൻ ..ഇവളുടെയ അപ്പാ ... എനക്ക് അളക് കുറവ് എൻര് സൊല്ലി ,എന്നെ ഏമാത്തി ,രണ്ടാമത് വേറെ പൊണ്ണയ് തിരുമണം പണ്ണിയാച്ച് .അഞ്ച് വർഷമാച്ച്..ആനാൽ എനക്ക് എന്ത കവലയും കെടയാത് ..എൻ ഇദയത്തിലെ എനക്ക് എപ്പോതും അവര് താൻ എൻ പുരുഷൻ.ഇപ്പൊ ഇവാൾ വന്ത് അപ്പാവെ പാക്കണം എന്റര് സൊല്ലി ഒരേ സണ്ടയ് ..അതിനാലെ താൻ നാങ്കള് പോകിറത് ..."(ഞാനെന്റെ ഭർത്താവിനെ കാണാനാണ് പോകുന്നത് .എന്നുവച്ചാൽ പഴയഭർത്താവ് ..ഇവളുടെ അച്ഛൻ .അഞ്ച് വർഷം മുൻപ് ,എനിക്ക് സൗന്ദര്യമില്ലെന്ന് പറഞ്ഞ് അയാൾ വേറെ കെട്ടി .എനിക്ക് അതിൽ വിഷമമൊന്നുമില്ല .എന്റെ ഹൃദയത്തിൽ ഇപ്പോഴും അയാൾ തന്നെയാണ് എന്റെ ഭർത്താവ് .അച്ഛനെ കാണണമെന്ന് പറഞ്ഞ് ഇവൾ എന്നും വഴക്കുണ്ടാക്കുന്നു .അതുകൊണ്ടാണ് ഇന്ന് പോകുന്നത് )

അവർ പറഞ്ഞു നിർത്തിയപ്പോൾ അവരുടെ കൺകോണുകളിൽ ചെറിയ നനവുണ്ടായിരുന്നു .
ഞാൻ ഒന്നും പറഞ്ഞില്ല .വെറുതെ വെളിയിലേക്ക് നോക്കിയിരുന്നു .

"ഒട്ടൻഛത്രം ..ഒട്ടൻഛത്രം .." ഒട്ടൻഛത്രം എത്തിയപ്പോൾ കണ്ടക്ടർ നീട്ടി വിസിലടിച്ചു വണ്ടി നിർത്തി ."സരിപ്പാ ..എങ്കെയാവത് പാക്കലാം .." എന്നെ നോക്കിചിരിച്ചിട്ട് ,സഞ്ചികളുമെടുത്ത് ,കുട്ടിയേയും പിടിച്ചുകൊണ്ട് അവർ ഇറങ്ങിപ്പോയി .
കണ്ടക്ടർ വിസിലടിച്ചപ്പോൾ ബസ് വീണ്ടും മുന്നോട്ടെടുത്തു ,അംബാസമുദ്രത്തേക്ക് ...

അംബാസമുദ്രമെത്തി .ആറും തോടും മരങ്ങളും പാടവുമെല്ലാമുള്ള ,കേരളം പോലെ തോന്നിക്കുന്ന മനോഹരമായ ഒരു സ്ഥലം .

ഓട്ടോ പിടിച്ച് സുഹൃത്തിന്റെ ഫാം ഹൗസിലെത്തി .വേലക്കാരൻ കതക് തുറന്നു .കേരളത്തിൽ നിന്നാണെന്ന് പറഞ്ഞപ്പോൾ ,"അയ്യാവ് വന്ത് ഇങ്കെ ഇല്ലൈ ..കോവൈ പോയിരുക്ക് ..രണ്ടുനാൾ ആക്കും തിരുമ്പി വാറതുക്ക്.."
വേലക്കാരൻ പറഞ്ഞു .

ഞാൻ അപ്പോൾത്തന്നെ ,അതേ ഓട്ടോയിൽ തിരികെ ബസ് സ്റ്റാൻഡിലേക്ക് വിട്ടു.ഭാഗ്യം,ഞാൻ അംബാസമുദ്രത്തിലേക്ക് വന്ന ബസ് തിരികെപ്പോയിരുന്നില്ല.തെങ്കാശിയിലേക്ക് ടിക്കറ്റ് എടുത്തു .

ബസിൽ തിരക്ക് നന്നേ കുറവായിരുന്നു .

"എൻ അന്പുക്കും അൻപാന,ഉയിര്ക്കും ഉയിരാന സെന്തമിൾനാട്ടിൻ മക്കളേ ..ഇന്ത മാവട്ടത്തിൽ ......." ബസ് സ്റ്റാൻഡിന് പുറത്ത് ഏതോ രാഷ്ട്രീയക്കാരന്റെ പ്രസംഗം നടക്കുന്നു .

ബസ് മുന്നോട്ട് നീങ്ങി കുറച്ചു കഴിഞ്ഞപ്പോൾ ,യാത്രാക്ഷീണം കൊണ്ട് ഞാൻ ഉറക്കത്തിലേക്ക് വഴുതിവീണു .ബസിന്റെ സഡൻബ്രേക്കും,ആൾക്കാരുടെ ഉച്ചത്തിലുള്ള സംസാരവും ,ആരുടെയോ ഉറക്കെയുള്ള നിലവിളിയും കേട്ടാണ് ഞാൻ ഉറക്കത്തിൽനിന്നും ഞെട്ടിയുണർന്നത് .ബസിന് വെളിയിൽ സാമാന്യം നല്ലൊരു ആൾക്കൂട്ടവും അതിനുള്ളിൽനിന്നും ഒരു സ്ത്രീയുടെ ദയനീയമായ കരച്ചിലും കേട്ടു .

ഞാൻ നോക്കിയിട്ടും എന്താണ് സംഭവമെന്ന് മനസിലായില്ല .അപ്പോഴേക്കും ബസ് മുന്നോട്ടെടുത്തുകഴിഞ്ഞിരുന്നു .ഞാൻ സീറ്റിൽ നിന്നും എഴുന്നേറ്റ് പുറത്തെ ആൾക്കൂട്ടത്തിനുള്ളിലേക്ക് നോക്കി .അവിടെ .... വെറും നിലത്ത് കുത്തിയിരിക്കുന്ന,അങ്ങോട്ട് പോയപ്പോൾ എന്റെ സീറ്റിലിരുന്ന തമിഴ് സ്ത്രീ .അവരുടെ മടിയിൽ ചോരയിൽ കുളിച്ച് അവരുടെ മകൾ ,ആ മെലിഞ്ഞ പെൺകുട്ടി നിശ്ചലമായി കിടക്കുന്നു .ആ സ്ത്രീ കൈകൾ രണ്ടും തലയിൽ വച്ച് ഉറക്കെ നിലവിളിക്കുന്നു.

ഞാൻ കണ്ടക്ടറോട് വണ്ടി നിറുത്താൻ ആവശ്യപ്പെട്ടു ." സാർ ..ഇത് വന്ത് ലിമിറ്റഡ് സ്റ്റാപ് ബസ് ..അങ്കെയും ഇങ്കെയും എല്ലാം നിപ്പാട്ടമുടിയാത് .." കണ്ടക്ടർ പറഞ്ഞിട്ട് വിസിൽ നീട്ടിയടിച്ചു.ബസ് വീണ്ടും മുന്നോട്ട് കുതിച്ചുതുടങ്ങി .
***** ***** *****
നൊങ്ക് : പനങ്കായയുടെ, കരിക്ക് പോലുള്ള ഇളം കായ്.

ബിനുകല്ലറക്കൽ .