കാണാക്കയങ്ങള്‍...

By: Umesh Krishnan ( Umesh Kottarathil)

മേരിയേ....എടീ മേരിയേ..... ഇത്തിരി വെള്ളം ഇങ്ങെടുത്തേ,ദാഹിച്ചിട്ട് വയ്യ
ദാ ഇപ്പം തരാം ഇച്ചായാ..

നിങ്ങള് പോയ കാര്യം എന്തായി,പൈസ കിട്ടിയോ,അതോ....

ഞാന്‍ അന്നേരെ നിന്നോടു പറഞ്ഞതല്ലേ,ഇതൊന്നും നമ്മളെകൊണ്ട് കൂട്ടിയാ കൂടുന്നതല്ലാന്ന്..

എന്ന് പറഞ്ഞാ എങ്ങനാ ഇച്ചായാ ആകെ ഒന്നല്ലേ ഉള്ളു നമുക്ക്,അതും എത്ര പ്രാര്‍ത്ഥനയുടെ ഫലമാ,അവനെ പഠിപ്പിച്ച് ഒരു നിലയില്‍ എത്തിയ്കാന്‍ സാധിച്ചില്ലേല് നമ്മള് അപ്പനും അമ്മയും ആണെന്ന് പറഞ്ഞിട്ടെന്താ.....

ഉം..,ഞാന്‍ വര്‍ക്കിയോട് കാശ് ചോദിച്ചപ്പോ അവന്‍റേം അവന്‍റെ പെമ്പ്രന്നോത്തീടേം വക
ചോദ്യോം പറച്ചിലും,വകയില്ലാത്തവരൊന്നും ഒന്നിനും എടുത്ത് ചാടരുതെന്നുള്ള ഉപദേശോം.കേട്ടു നില്‍കാതെ എന്തുചെയ്യാനാ,ഉള്ള പവീടും പറമ്പും പണയം വെച്ചിട്ടും ബാക്കിയുള്ളവരോടൊക്കെ കടം വാങ്ങിയും ഇതുവരെ എത്തിച്ചു,ഇനി പരീക്ഷയ്ക് ഇരിയ്കണേല് ഒരു അറുപതിനായിരം രൂപാ കൂടെ അടയ്കണം,നീയെന്നെ സഹായിക്കണമെന്ന് പറഞ്ഞപ്പോ അവന്‍റെ കെട്യോള് പറഞ്ഞ മറുപടി കേട്ട് എന്‍റെ നെഞ്ച് തകര്‍ന്നെടീ...
ഒടുവില്‍ ഞാന്‍ തിരിച്ചിറങ്ങാന്‍ നേരം ആ മിനിമോള് ആരും കാണാതെ അവളുടെ ഒരു മാല കോണ്ടുത്തന്നു,ജോണിച്ചായന്‍റെ പരീക്ഷ മുടക്കണ്ടാ ഇവിടെ ഞാനെന്തെങ്കിലും കള്ളം പറഞ്ഞോളാം,കൊച്ചച്ഛന്‍ വേഗം പൊയ്കോന്ന്...

നമ്മടെ കഷ്ടപ്പാട് ദൈവം കാണുന്നുണ്ടച്ചായാ..അതാ കര്‍ത്താവ് മിനിമോള്‍ടെ രൂപത്തില് വന്നത്...
മോനേ.....ജോണി മോനേ....

എന്തോ...എന്താ അപ്പച്ചാ...
മോനേ പൈസ ശരിയായി...ഇന്നാ പിടിയ്ക്....
നീ എപ്പോഴാ പോകുന്നത്....

വൈകിട്ട് നാലരയ്കുള്ള ബസിന് പോകാമെന്ന് കരുതിയതാ അപ്പച്ചാ..അപ്പോഴാ സണ്ണി വിളിച്ചത്,അവന്‍റെ കൂടെ ബൈക്കില് ചെല്ലാന്‍ പറഞ്ഞു...

മോനെ അത് വേണോ..,അതും ഇത്രയും ദൂരം,അല്ലെങ്കിലെ നാട്ടുകാര് പറയുന്നത് അവന്‍ വലിയ വേഗത്തിലാ വണ്ടിയില്‍ പോകുന്നതെന്നാ....

അപ്പച്ചാ അത് ഞാനവനെ കൊണ്ട് പതുക്കെ ഓടിപ്പിച്ചോളാം,അപ്പച്ചന്‍ പേടിയ്കണ്ടാ....

ഉം ,എന്തായാലും സൂക്ഷിയ്കണേ മോനേ...

ഉം,ശരിയപ്പച്ചാ ഞാന്‍ വേഗം റെഡിയാകട്ടെ....

ഉം ശരി മോനേ...

-----------------
ജോസേ...ജോസേ.....

അല്ലാ,ആരായിത് ബേബിയോ,എന്താ ബേബീ ഇതുവഴിയൊക്കെ....

നിനക്ക് മനസിലായില്ലിയോടീ മേരീ,ഇതാ നമ്മുടെ ജോണീടെ കൂട്ടുകാരന്‍ സണ്ണിയുടെ അപ്പച്ചനാ....

എന്നതാ ബേബിച്ചായാ ഇ വഴിയ്ക്...

ഞാനേ കുറച്ച് പറമ്പ് വാങ്ങി ,നമ്മടെ മാടന്‍മലയുടെ താഴെ ..അവിടെ കുറച്ച് ഏലം പറിയ്കാറായി നില്‍പുണ്ട്,അതൊന്ന് ജോസിനെ കൊണ്ട് പറിപ്പിയ്കാമല്ലോന്ന് കരുതി...നീയൊന്ന് വേഗം ഒരുങ്ങി വാ ജോസേ....

അതിനെന്താ,ഞാനിതാ വരുന്നു...

---------------------------
ഇതെന്താ ജോസേ നീ ആശുപത്രീലോട്ട് കയറുന്നെ

എന്‍റെ ഒരു സ്നേഹിതന്‍ ഇവിടെ അഡ്മിറ്റാണ്...ഇവിടെ വരെ വന്നതല്ലേ,നമുക്കൊന്ന് കണ്ടിട്ട് പോകാം...നീ വാ...

ബേബിയുടെ കൂടെ നടക്കുമ്പോള്‍ എന്തെന്നില്ലാത്ത ഒരു ഭയം ജോസുകുട്ടിയുടെ ശരീരം തളര്‍ത്തികൊണ്ടേയിരുന്നു....
ഒടുവില്‍ icu ന് മുന്‍പില്‍ ആ നടപ്പ് എത്തി നിന്നപ്പോള്‍ ജോസുകുട്ടിയുടെ മനസ് പൂര്‍ണമായ നടുക്കത്തിലേക്ക് വഴുതി...

ജോണീ...മോനേ ജോണീ...എന്താ മോനേ...നിനക്കെന്ത് പറ്റീ...മോനേ....എന്തേലും പറയ് മോനേ....

Icu ല്‍ നിന്നും പുറത്തേക്കെത്തിയ നിശ്ചലമായ ശരീരത്തെ കെടിപ്പിടിച്ച് അലമുറയിടുന്ന ജോസിന്‍റെ കരച്ചില്‍ കണ്ട് നില്‍കുന്നവര്‍ക്കും സഹിയ്കാനായില്ല......

ഇന്നലെ കോളേജിലേക്ക് പോയ പിള്ളേരാ,നല്ല സ്പീഡില് പോയി പച്ചക്കറിയുമായി വന്ന ലോറിയിലേക്ക് ഇടിയ്കുകയായിരുന്നൂ...ബൈക്ക് ഓടിച്ച പയ്യനും നല്ല പരിയ്കുണ്ട്.....അപകടനില തരണം ചെയ്തെന്നാ പറഞ്ഞുകേട്ടത്...എന്നാലും ഒന്ന് എണീറ്റ് നടക്കണേല് അഞ്ചാറുമാസംമെങ്കിലും എടുക്കും....

അലമുറയിട്ട് കരയുന്നതിനിടയിലും കൂടി നിന്നവര്‍ക്കിടയിലെ സംസാരം ജോസിന്‍റെ കാതില്‍ മുഴങ്ങിക്കൊണ്ടിരുന്നു....

വളരെ നാളത്തെ കാത്തിരിപ്പിനും പ്രാര്‍ത്ഥനയ്കും ശേഷം ഉണ്ടായ മകന്‍..ഉള്ളത് മുഴുവന്‍ പണയം വെച്ചും കടം വാങ്ങിയും രാപകലില്ലാതെ കഷ്ടപ്പെട്ടും ഇത്രയും പഠിപ്പിച്ചൂ,ഇനി ഞാനെന്‍റെ മേരിയോട് ഇതെങ്ങനെ പറയും കര്‍ത്താവേ...
എന്നോടീ ചതി വേണമായിരുന്നോ........

അപ്പോഴും തന്‍റെ മകന്‍റെ ജീവന് ഒരാപത്തും വരുത്തല്ലേയെന്ന് അലമുറയിട്ട് പ്രാര്‍ത്ഥിയ്കുകയായിരുന്നു സണ്ണിയുടെ അമ്മ....