പളുങ്ക്പോലൊരു കനവ്

നീ തിരികെ വന്നോരു നാളിലില്ല
ഞാനുമെൻ സ്നേഹവുമെന്നോതുവാൻ
വയ്യാതെ കൊട്ടിയടച്ചോരു വാതിലിൻ
മറവിലുണ്ടൊരു തേങ്ങലാരുമറിയാതെ.

നിൻചിരിയിൽ ഞാനാടിയുലഞ്ഞതും 

നിറകൺചിരിയോടെ വീണടിഞ്ഞതും
നീയറിയാതെ പോകയാണെന്നൊരോർമ്മ-
ച്ചിരാതിലെരിഞ്ഞേറെ നാൾ ഞാനും .

കാത്തിരിപ്പിന്നൊടുക്കം കൊഴിഞ്ഞ
പ്രതീക്ഷയിൽ ഉന്മാദിയാകേണമെനി- 

ക്കുച്ചത്തിലലറേണം മറവിയിൽപ്പോലുമില്ല
നീയെന്നും ഇനിവേണ്ട നിൻതുണയെന്നും.

പിൻവിളി മറന്ന് മരവിച്ച നാവിലൊരു 

സ്നേഹനഷ്ടത്തിൻതീക്കനലൂതിപ്പറത്തി
പോകേണമെനിക്കൊരു വർണ്ണക്കനവിൻ
ബലിതർപ്പണത്തിനായ് ഗംഗയിലേക്ക്....

By: 

Anamika Ann Anu