വൈകിയെത്തിയ ഗർഭം !

വൈകിയെത്തിയ ഗർഭം !
****************************

"ഡാാ ....നിന്റപ്പച്ചനും അമ്മച്ചിയും കൊള്ളാലോ ..ഈ വയസ്സ് കാലത്ത് ഇതെന്തോന്നിന്റെ കേടാ "

ജോലി കഴിഞ്ഞു കണാരേട്ടന്റെ കടയിൽ നിന്നൊരു ചായ കുടിചിറങ്ങുമ്പോഴാ ആന്റണിചായന്റെ വക ..

"എന്തെ ഇച്ഛയാ..അവരെന്തു ചെയ്തൂന്നാ "

"ഏയ് ഒന്നുല്ലാ ...."

ഒരു ആക്കിയ ചിരി ചിരിച്ചോണ്ട് ആന്റണിച്ചായൻ കടയിലോട്ട് കയറി പോയി ..ഫോണെടുത്ത് റോസ്സിക്കു വിളിച്ചപ്പോഴേക്കും ഒരു പൊട്ടി തെറിയായിരുന്നു ..

"ദേ ..മനുഷ്യാ ഈ വയസ്സ് കാലത്തു നിങ്ങടപ്പച്ചനും അമ്മച്ചിക്കും എന്നതാ സൂക്കേട്‌ ..മനുഷ്യന്മാരെ സുയിപ്പാക്കാൻ "

"എന്നതാടീ ...ഒന്നു തെളിയിച്ചു പറാന്നേയ് .."

"ഒന്നു വേഗം വീട്ടിലോട്ടു വാ പറയാം "

അപ്പച്ചനും അമ്മച്ചിയും ചെയ്തെതെന്തെന്ന് മാത്രം ആരും മിണ്ട്ണില്ല്യാ ..ന്നാലും എന്നതാണാവോ രണ്ടാളും കൂടി ചെയ്തു വെച്ചേക്കണത് .

ഓരോന്നാലോചിച്ചു ബൈക്ക് വേഗം പറത്തി വീട്ടിനു മുന്പിലെത്തിയപ്പോഴേക്കും റോസി കലിതുള്ളി വാതിൽതുറന്നോടി വന്നു .

"എന്നതാടി റോസി ന്റെ അമ്മച്ചിക്കും അപ്പച്ചനും ."

"വിശേഷം ണ്ട് ..നിങ്ങടമ്മച്ചിക്ക് ..അതെന്നേ "

"എന്ത് വിശേഷം ..ന്റെ ഇച്ഛയായാ അമ്മച്ചി ഗർഭിണി ആണെന്ന് "

"ആഹാ ...ന്നിട്ട് അപ്പച്ചനും അമ്മച്ചിയും എന്ത്യേടി "

"അകത്തൊണ്ട് ...ഇനിപ്പോ എങ്ങനെ മറ്റുള്ളോരുടെ മുഖത്ത് നോക്കാ ..ആകെ നാണക്കേടായി "
റോസിയുടെ വാക്കുകൾക്ക് ചെവികൊടുക്കാതെ അമൽ വേഗം അകത്തേക്ക് കയറി അപ്പച്ഛന്റേം അമ്മച്ചീടേം മുറിയിലേക്ക് ചെന്നു ..തല കുനിച്ചിരിക്കുന്ന അപ്പച്ചനും ..ഒരമ്മയാൻ പോകുന്ന തിളക്കവുമായി അമ്മച്ചി അടുത്തും

"അപ്പച്ചാ ...ഇതെന്തൊന്നിരിപ്പാ ..ഒരച്ഛനാവാൻ പോണ ഉഷാറൊന്നുല്ലല്ലോ "

"മോനേ ..അത് ..ന്റെ കുട്ടിക്കൊരു പോരായ്മ ആയല്ലേ "

"ഇല്ല്യപ്പച്ചാ ...എന്തൊക്കെ ഈ പറയ്ണ് ..നിക്ക് സന്തോഷം മാത്രേ ഒള്ളൂ ..അച്ഛനോ അമ്മയോ ആരെന്നറിയാതെ അനാഥാലയത്തിൽ കഴിഞ്ഞിരുന്നെനെ എല്ലാം കൊണ്ടു സമ്പന്നമാക്കി എന്നെ ഇതുവരെ എത്തിച്ചത് നിങ്ങൾ രണ്ടാളുമാ ..അന്ന് എന്നേം കൊണ്ട് ഈ വീട്ടിലേക്ക് കയറി വരുമ്പോ നിങ്ങടെ മുഖത്ത് ഞാൻ കണ്ട സന്തോഷം ..എന്നിട്ടിപ്പോ സ്വന്തം ചോരയിലൊരു കുഞ്ഞു വരാൻ പോവാന്ന് അറിഞ്ഞിട്ട് തല കുനിച്ചിരിക്ക്യാ "

"അത് .റോസി മോൾ ഏതാണ്ടൊക്കെ പറഞ്ഞു വന്നേച്ചു പോയി മോനേ ..ഇതിപ്പോ വേണ്ടാന്ന് വെക്കാ ഞങ്ങൾ "

"അപ്പച്ചാ ..എന്താ ഇത് ..ഓളെന്തെലൊക്കെ പറഞ്ഞെന്നു വെച്ചു കർത്താവ്‌ തന്ന ഭാഗ്യം വേണ്ടെന്ന് വെക്കാനോ ..പൊറുക്കുകേല അങ്ങേര് ഒരിക്കലും ..നിക്ക് സന്തോഷേ ഒള്ളു അപ്പച്ചാ ഒരു കൂട പിറപ്പൂകൂടി വരുന്നതിൽ ..ഞാനുണ്ടാകും കൂടെ എന്തിനും ..ഇല്ലേൽ അതൊരു നെറി കേടായ് പോവും "

മറുത്തൊന്നും പറയാൻ നിക്കാണ്ട് പുറത്തേക്കിറങ്ങിയതും റോസ്സി അതാ മുൻപിൽ .

"ഇച്ഛായാ ന്നോട് പൊർക്കണം ..പഴയതൊന്നും ഓർത്തെടുക്കാണ്ടയാ ഞാൻ "

തല താഴ്ത്തി നിക്കണ അവളെ നെഞ്ചോട് ചേർത്തു പിടിച്ചു നെറ്റിയിലൊരുമ്മയു കൊടുത്തു

"റോസ്സി ..അപ്പച്ചനും അമ്മച്ചിക്കും ണ്ടാവില്ലേ സ്വന്തം ചോരയിലൊരു കുഞ്ഞിനെ താലോലിക്കാനും ആഗ്രഹം ..കർത്താവായിട്ട് ഇപ്പോഴെങ്കിലും ആ ആഗ്രഹം നടത്തി കൊടുത്തൂലോ..അതിന് നമ്മളായിട്ടെന്തിനാടോ എതിര് നിക്ക്ണ് "..

അമലിനെ തട്ടിമാറ്റി ..അവൾ അമ്മച്ചിയുടെ അടുത്തേക്ക് നീങ്ങി ..

"അമ്മച്ചിയേ ..എന്തേലും ആവിശ്യം ണ്ടെങ്കിൽ പറയാൻ മടിക്കണ്ടാട്ടൊ ..നേരത്തെ പറഞ്ഞതൊന്നും ന്റമ്മച്ചി മനസ്സിൽ വെച്ചേക്കണ്ട .".

വൈകിയെത്തിയ അഥിതിയേ സ്വീകരിക്കാൻ ആ കുടുംബം സന്തോഷത്തോടെ ഒരുങ്ങി കഴിഞ്ഞിരുന്നു ..

(ഒരു നേർക്കാഴ്ചയിലേക്ക് തൂലിക ചലിപ്പിക്കാൻ കഴിഞ്ഞതിൽ അതീവ സന്തോഷം തോന്നുന്നു ..കഥയും കഥയും കഥാപാത്രങ്ങളും ജീവനുള്ളത് തന്നെയാണ് )

____________________
ഫർസാന .വി