ആണുങ്ങൾ കരയാറുണ്ടോ

ആണുങ്ങൾ കരയാറില്ല പക്ഷെ
ആണുങ്ങൾ കരയാറുണ്ട്
പഞ്ചാര കട്ട് തിന്നപ്പോ
കാലിനേറ്റ തിണർപ്പൂതി
അച്ഛനാണ് പറഞ്ഞത്
ആൺകുട്ടികൾ കരയാറില്ലടാ

പഞ്ചാര പാത്രം പിന്നെയും മോഷ്ടിക്കപ്പെട്ടു
പൂച്ചട്ടിയും അങ്ങേലെ മാവും
മൂട് കീറുന്ന നിക്കറും പൊട്ടുന്ന ബട്ടൻസും
കണക്ക് മാഷിന്റെ കൂട്ടിക്കുറയ്ക്കലും
തിണർപ്പുകൾ ഏറെ ആയിരുന്നു
അപ്പോഴും കരഞ്ഞില്ല
ആൺകുട്ടികൾ കരയാറില്ലത്രേ

പ്രിയമെന്ന് ചൊല്ലിയ പെണ്ണ്
നെഞ്ച് കലക്കി കടന്ന് പോയി
യൗവനം കലങ്ങിൻ ചോട്ടിലെ
ബദാംങ്കകളെണ്ണി ജോലി നേടി
 അപ്പോഴും പറഞ്ഞു
ആൺകുട്ടികൾ കരയാറില്ല
വിളക്കിചേർത്ത പൗരുഷം ഒഴുകി പോയാലോ
ദുർബലനെന്ന് പേരെടുത്താലോ
കണ്ണീർ കയങ്ങളെല്ലാം
ഹൃദയത്തിന്റെ പുലിമുട്ടുകളിൽ
തട്ടി തോറ്റ് മടങ്ങി

ഇന്ന് പെങ്ങളുടെ വിവാഹം
നിലക്കാത്ത കണ്ണുനീരാൽ
പെണ്ണ് നെഞ്ചോടൊട്ടിക്കരഞ്ഞു
അയ്യേ എന്റെുട്ടി എന്തിനാ കരയണെ
നിന്റെ കുട്ടിക്കുറുമ്പുകൾക്കീയേട്ടനെ
തല്ല് കൊള്ളിച്ചേനോ

എന്റെ മാമ്പഴപ്പൂളുകൾ കട്ടെടുത്തോടിയേനോ
ഈറൻ മുടിയിറ്റിച്ച് എന്റുറക്കം കളയുന്നെനോ
ഏട്ടന്റെ പനിയല്ലേ എനിക്ക് പകർന്നോട്ടെയെന്ന്
ചൊല്ലി കെട്ടിപ്പിടിച്ചെനിക്ക്
അമ്മച്ചൂട് പകർന്നെനോ
നീ കഴിക്കാതെ ഈ ഏട്ടൻ കഴിക്കില്ലാന്ന്
വാശികൾ ചൊന്നതിനോ

കൈകൾ കൊണ്ട് മുഖമുയർത്തി
കണ്ണിലേക്ക് നോക്കി
ഞാൻ ഇറങ്ങട്ടെ ഏട്ടാ....
അണപൊട്ടി ഒഴുകുന്നുണ്ട്
അവളുടെ കണ്ണും എന്റെയുളളും
എന്റെ പൊന്ന് മോളെ
നിനക്ക് വേണ്ടിയെങ്കിലുമീ-
യേട്ടനൊന്ന് കരഞ്ഞോട്ടേടീ

കൈത്തണ്ട ഞെക്കി കണ്മഷി പടർത്തി
അവളീ പടിയിറങ്ങുന്നു
തോളിൽ തട്ടി ചേർത്ത് വെച്ച്
ചങ്ങാതിയും പറഞ്ഞു
മച്ചാനെ നമ്മളാണുങ്ങൾ കരയാറില്ലടാ

ഒഴുകിവന്ന ലാവ അകത്തേക്കിറക്കി
നെഞ്ചുപൊട്ടുമാറ് ഏറ്റു ചൊല്ലി
അതേ ഞങ്ങൾ ആണുങ്ങൾ കരയാറില്ല
പക്ഷെ ഞങ്ങൾ ആണുങ്ങൾ കരയാറുണ്ട്....

By Vimal vava