ഓമൽക്കിനാവ്

ഓമൽക്കിനാവ്

ഓമൽക്കിനാവായ് ഇന്നും മനസ്സിൽ,
ഓമലേ മിഴിവോടെ നിൻറെ രൂപം.
ഓമലേ ചേലുള്ള നിൻറെ രൂപം.

ഒരുകുടക്കീഴിൽ കഥകൾ പറഞ്ഞ്,
ഒരുമിച്ച് നമ്മൾ നടന്നൊരാനാളിൽ,
ഒരു മയിൽപ്പീലിയെൻ പുസ്തകത്താളിൽ,
ഒളിപ്പിച്ച് കൊഞ്ചി കുണുങ്ങി നിന്ന രൂപം.
ഓമലേ ചേലുള്ള നിൻറെ രൂപം.

ഓംകാരപ്പൊരുളിൻറെ തിരുനടയിൽ,
ഓംകാര മന്ത്രങ്ങൾ ഒരുവിട്ട് നിന്നപ്പോൾ,
ഒറ്റക്കൽ മണ്ഡപത്തിന്നരികെ നിന്ന്,
ഒളികണ്ണാൽ നോക്കി നിന്ന നിൻ രൂപം.
ഓമലേ ചേലുള്ള നിൻറെ രൂപം.

ഓണനിലാവത്ത് ചാരത്ത് വന്നു നിൻ,
ഓമനപ്പൂമുഖം എൻ മാറിൽ മറച്ച് ,
ഒരു നൂറു സ്വ പ്നങ്ങൾ പങ്കിട്ട് തന്നിട്ട് ,
ഓടിയകന്ന നിൻറെ രൂപം
ഓമലേ ചേലുള്ള നിൻറെ രൂപം.

രാധാ ജയചന്ദ്രൻ,വൈക്കം
09.04.2017