പിറക്കാത്ത മക്കളോട്

പിറക്കാത്ത മക്കളോട്

ഇനിയും പിറക്കാത്ത ജന്മങ്ങളെ നിങ്ങൾ
ഇനിയും പിറക്കാതിരിക്കുക ഈ മണ്ണിൽ

ഒരു കൊച്ചു വീട്ടിൽ പിറന്നതാണെങ്കിലും
കുന്നോളം സ്വപ്നമതു മനവിൽ കണ്ടു

ഒരു സ്വപ്ന വള്ളി പടർത്തി എന്നമ്മ
ആ കിനാവള്ളിയിൽ ഞാൻ കയറി മെല്ലെ

ഉന്നതിയാശിച്ചവർക്കതു നൽകാൻ
കടമ്പകൾ പലതും കടന്നെത്തി ഞാൻ

രാക്ഷസ കിങ്കരാന്മാരെന്നെ ഒരു മുഴം
കയർ കുരുക്കിനാൽ കൊന്നൊടുക്കി.

തെറ്റുകൾ ചെയ്യാതെ, ആശകൾ ബാക്കിയായി
മനമില്ലാ മനമോടെ യാത്രയായി

ഇനിയും പിറക്കാത്ത ജന്മങ്ങളെ നിങ്ങൾ
ഇനിയും പിറക്കാതിരിക്കുക ഈ മണ്ണിൽ

തായതൻ കണ്ണുനീർ കാണാതിരിക്കുവാൻ
മക്കളായി ഈ മണ്ണിൽ പിറക്കാതിരിക്കുക

നീതി നേടുവാനായി കേണപേക്ഷിക്കും മുഖം
കാണാതിരിക്കുക ഒരു വേള നിങ്ങളും

നിരത്തിലൂടെ വലിച്ചിഴയ്ക്കും രംഗമതു
കാണാതിരിക്കട്ടെ, മക്കളാം നമ്മളും

ഇനിയെത്ര അമ്മമാർ ഈ ദുരിതക്കയത്തിൽ, മക്കൾക്കായി
അശ്രു ബാഷ്പം ഒഴുക്കണം ഇനി വരും നാളിലും

ഇനിയും പിറക്കാത്ത ജന്മങ്ങളെ നിങ്ങൾ
ഇനിയും പിറക്കാതിരിക്കുക ഈ മണ്ണിൽ

സുമേഷ് കൗസ്തുഭം