പാഴ്‌വേലകൾ

By: മുരളീകൃഷ്ണൻ

എന്തിനായ്പ്പാഴ്‌വേല ചെയ്യുന്നു ഞാനിന്നി
തെത്ര ചിന്തിക്കുന്നിതെന്നുമെന്നും!
എന്നിട്ടുമെന്നിട്ടുമിന്നും തുടരുന്നു
ചിന്തയില്ലാത്തൊരീപ്പാഴ്‌വേലകൾ

കാലേയെഴുന്നേൽപ്പതെന്തിനാവോ!
കട്ടനടിപ്പതുമെന്തിനാവോ!
കലചക്രം പോലെ കാലങ്ങളായി ഞാൻ
കാലാരി നാമം ജപിപ്പതെന്തേ!

ചിക്കിച്ചികഞ്ഞെന്നുമെന്തിനായിങ്ങനെ
പത്രവൃത്താന്തമായ്‌ പേൻ നോക്കിടൂ.
ചുക്കിച്ചുളിഞ്ഞങ്ങു ചത്തുമല്യ്ക്കുന്ന
ചരമകോളങ്ങളിൽ ചാരി നിൽപ്പൂ!

പെട്ടിവയറുള്ള പള്ളകളൊക്കവേ
കുത്തിക്കയറ്റുന്നു പുട്ടുകുറ്റി.
പിന്നെയതെല്ലമിറക്കുന്നു പുട്ടുപോൽ
കാലത്തൊഴിയും തിരുവയറായ്‌.

നട്ടു വളർത്തും ചെടിയ്ക്കിടെ നിന്നു ഞാൻ
കിള്ളിപ്പറിക്കും കളകളാകെ,
ആരും വിളിക്കാതെയുണ്ണുവാനെത്തുന്ന
ആർക്കുമേ വേണ്ടാ നികൃഷ്ടജീവി!

പാലം പണിയുന്നു വീഥി കറുപ്പിച്ചു
ചീറിപ്പറക്കുന്ന വണ്ടി മണ്ടി!
കുണ്ടും കുഴികളായ്‌ വണ്ടി മറിക്കുവാൻ
എന്തിനാവോയിത്ര കീലുരുക്കി!

ലക്ഷ്യമണുവിട തെറ്റാതെ ബോമ്പുകൾ
വർഷിക്കുവാനെത്ര സാങ്കേതികം!
പൊട്ടിത്തെറിക്കുന്ന കുഞ്ഞിൻ തലമണ്ട
പൊട്ടിക്കുവാനെന്തു പാഴ്‌വേലകൾ!

എണ്ണ്യാലൊടുങ്ങാത്ത പാഴ്‌വേലയാകവേ
എണ്ണിപ്പറയുന്ന പാഴ്‌വേലയും,
എന്തിനായിങ്ങനെയിന്നു ഞാൻ ചെയ്യുന്നു
ചെന്നു പതിക്കാൻ ചവറ്റുകുട്ട!