ഇന്നലെ

ഇന്നലെ ഒരു പുസ്തകം പടിയിറങ്ങിപ്പോയി.
നാനാർത്ഥങ്ങൾ 
മനസ്സിലാകത്തത് കൊണ്ട്.

ഇന്നലെ ഒരു മുദ്രാവാക്യം
ഉടന്തടി ചാടി.
കൊല്ലാകൊല സഹിക്കാൻ കഴിയാത്തത് കൊണ്ട്.

ഇന്നലെ ഒരാദർശം
ആത്മഹത്യ ചെയ്തു.
ദുർവ്യാഖ്യാനങ്ങൾ
പരിധി വിട്ടത് കൊണ്ട്.

ഇന്നലെ ഒരു ചുമരേഴുത്ത്
സ്വയംമാഞ്ഞ് പോയി.
പിറകിൽ നിന്ന് വായിച്ചു
തുടങ്ങിയത് കൊണ്ട്.

ഇന്നലെ സകല അഗ്നിയും
മഞ്ഞായിത്തണുത്തുതുടങ്ങി.
സ്വയംഎരിഞ്ഞടങ്ങാൻ
ത്രാണി ഇല്ലാതായത് കൊണ്ട്.

ഇന്നലെ ഒരു വഴിവിളക്ക്
കരിന്തിരികത്തി.
എണ്ണ ഊറ്റിയവർക്ക്
വഴികാട്ടാനാകാത്തത് കൊണ്ട്.

ഇന്നലെ ഒരു രക്തസാക്ഷി
ആദ്യമായി കണ്ണിർ വാർത്തു.
വൃഥാവിലായ ജന്മമോർത്തല്ല
പാഴായ പിൻമുറയെഓർത്ത്.
.......................
രാമചന്ദ്രൻ മൊറാഴ-22/04/2017