മദ്യം ജീവനും ഹാനികരം (നർമ്മ കഥ )
*************************************************
2008 ൽ കോളേജിൽ നിന്ന് രണ്ടു ദിവസത്തെ സ്റ്റഡി ടൂറിനായി മൂലമറ്റത്തേക്കു തിരിച്ചപ്പോൾ പ്രതീക്ഷിച്ചിരുന്നില്ല… അതൊരു ചരിത്ര സംഭവം ആകുമെന്നു....
അഞ്ചാമത്തെ സെമസ്റ്ററിലെ ക്ലാസ് തുടങ്ങിയിട്ടേയുള്ളൂ... ഞങ്ങൾ ടൂറിനു പോകണമെന്നു പറഞ്ഞു ഡിപ്പാർട്മെന്റിൽ ചെന്നപ്പോഴേ ഞങ്ങളെ വിശ്വാസം ഉള്ള നല്ലവരായ ഫാക്കൽറ്റി പറഞ്ഞു....
ഒരു പെണ്ണിന്റെ വീട്ടിൽ നിന്നും, ചെറുക്കന്റെ വീട്ടിൽ നിന്നും നിങ്ങടെ കൂടെ വരാൻ ആർക്കെങ്കിലും പറ്റുമെങ്കിൽ പൊയ്ക്കോ... അല്ലേ പോകണ്ടാന്നു....
നമ്മള് അങ്ങു ബുഷിനെവരെ കാണാൻ മനക്കോട്ട കെട്ടിയ നേരം..... നമ്മള് വെറുതെ ഇരിക്കുവോ.... തപ്പി പിടിച്ചു അവരു പറഞ്ഞ രണ്ടു പേരെ.... മായയുടെ അമ്മയും.. അർജുന്റെ അമ്മയും....
സാറുമ്മാരു നമ്മളോട് മൊട കാണിച്ച കൊണ്ട്, നമ്മള് രണ്ടു ദിവസത്തെ ടൂർ ഒരറിയിപ്പും കൂടാതെ എട്ടു ദിവസം ആക്കി.... ഹും.... നമ്മളോടാ സാറുമ്മാരുടെ കളി.....
നേരെ വിട്ടു മുല്ലപെരിയാർ, വയനാട്, കൊടൈക്കനാൽ, ഊട്ടി, മൈസൂർ, ബാംഗ്ലൂർ ലാൽ ബാഗ്, വൃന്ദാവൻ അങ്ങനെ കുറെ സ്ഥലങ്ങള്... ഒന്നും ശരിക്കും പ്ലാൻ ചെയ്യാൻ പറ്റാഞ്ഞ കൊണ്ട് കുറെ കറങ്ങി....
അങ്ങനെ തിരികെ വരുന്ന വഴി തമിഴ്നാടിന്റെ ഏതോ ഒരു ഭാഗത്തു മുന്തിരിപ്പടം കണ്ടു വണ്ടി നിർത്തി.... അവിടെ ചോദിച്ചപ്പോൾ ഒരു പെട്ടി മുന്തിരിങ്ങാക്കു പതിനഞ്ചു രൂപാ.....
അള്ളാ... നമ്മളപ്പം തന്നെ രണ്ടു പെട്ടി അങ്ങു വാങ്ങി..... അതും വാങ്ങി വണ്ടിയിൽ കയറുമ്പോൾ ഒരൊറ്റ ചിന്തയെ ഉള്ളാരുന്നു മുന്തിരിങ്ങാ വൈൻ.... മൂന്നാലു പെട്ടി കൂടി വാങ്ങി നാട്ടിൽ ചെന്നു മറിച്ചു വിറ്റാലോ എന്ന പ്ലാനും ഇല്ലാഴിയില്ലാരുന്നു...
കൂട്ടത്തിൽ അച്ചായൻ ആയിട്ടു ഞാൻ മാത്രേ ഉള്ളാരുന്നതു കൊണ്ട് ക്ലാസ്സിലെ കുടിയന്മാരെല്ലാം എന്നെ ചട്ടം കെട്ടി...... വൈൻ കൊണ്ട് വന്നില്ലേ നിന്നെ ഞങ്ങളു പഞ്ഞിക്കിടുമെന്നു...
ചോര തിളപ്പിന്റെ പ്രായം... പോരാത്തതിനു കോളേജിൽ വെച്ച് ചില വിദ്വാന്മാർ പട്ടചാരായത്തിന്റെയും, വാറ്റിന്റേം ഒക്കെ കഥ പറഞ്ഞത് അന്നേരം ഞാൻ ഓർത്തു... പെട്ടെന്നു തന്നെ നമ്മുടെ ഉള്ളിലെ കലാകാരൻ ഉണർന്നു.... പോരാത്തതിനു നമ്മളൊരു കുട്ടനാട്ടുകാരനും... വാറ്റിന്റേം ചാരായതിന്റെം ഈറ്റില്ലം....
ഞാൻ എന്താണേലും കുടിക്കില്ലാ... പെട്രോളും മണ്ണെണ്ണയും വരെ ഇവന്മാര് അടിക്കും.... എന്നാൽ പിന്നെ ഒരു പരീക്ഷണം അങ്ങു നടത്തിയാലോ.....
'അമ്മ കണ്ടാൽ കാലേ വാരി നിലത്തടിക്കും.... അതുകൊണ്ടു ആദ്യം നമ്മള് ഡീസന്റ് ആയിട്ട് വീട്ടിലെ ചില്ലു കുപ്പികളിലും, ഭരണികളിലും മുന്തിരിങ്ങാ നിറച്ചു, സമാനുപാതത്തിൽ പഞ്ചസാരയും തട്ടി ഓരോ കിഴി ഗോതമ്പും ഇട്ടു അടച്ചു വെച്ചു..... (ബാക്കി ഗുട്ടൻസ് പറഞ്ഞു തരൂല്ല)
എവിടെ.... എനിക്കിരിന്നിട്ടു ഇരുപ്പുറക്കുമോ..... ഞാൻ നേരെ വിട്ടു... നാട്ടിലെ വാറ്റു ഗുരു ഗോപാലേട്ടന്റെ മോൻ എന്റെ ചങ്ങാതി ജിഷ്ണുന്റെ അടുക്കൽ..... അവൻ പറഞ്ഞു അച്ചൻ ചക്കരയും ബാറ്ററിയും ഇട്ടാണ് ഉണ്ടാക്കുന്നതെന്നു....
അപ്പോൾ ഒരു കുപ്പിയിലേക്കുള്ളതായി..... ബാക്കി കുപ്പിയിൽ എന്തു പരീക്ഷണം നടത്തും.....
നാട്ടിലെ അടുത്ത വാറ്റുകാരൻ രാജപ്പൻ ഗുരുവിന്റെ മകൻ സുഭാഷേട്ടനെ കണ്ടു കാര്യം പറഞ്ഞു... മൂപ്പരും ഞാനും തമ്മിൽ നല്ല കമ്പനിയാ.. പക്ഷെ ഈ കാര്യം ആയ കൊണ്ട് എന്നെ രണ്ടു തെറി... നീയും പിഴക്കാൻ തീരുമാനിച്ചോന്നു...
നമ്മളൊരു നമ്പർ ഇട്ടു...... നമുക്ക് എഞ്ചിനീറിങ്ങിൽ ഒരു സെമിനാർ ചെയ്യാനാണ്... എങ്ങനെ ആണ് ഇതുണ്ടാക്കുന്നതെന്നു....
പുള്ളി ആരാ മുതലു... എന്നോടു പറഞ്ഞു തൽക്കാലം നീ വൈൻ ഉണ്ടാക്കുന്ന ട്രിക്ക് പഠിച്ചാ മതി എന്നു... രോഗി ഇച്ഛിച്ചതും വൈദ്യൻ കല്പിച്ചതും വൈൻ....
ആ കാലത്തൊക്കെ വട്ട ചിലവിനു വേണ്ടി കാറ്ററിങ് സർവീസിന് പോകുമ്പോൾ കണ്ടിട്ടുണ്ട് ഒറ്റ ദിവസം കൊണ്ട് വൈൻ ഉണ്ടാക്കുന്ന വിദ്യ...
മുന്തിരിങ്ങ നല്ല പോലെ തിളപ്പിച്ചിട്ടു സമാനുപാതത്തിൽ പഞ്ചസാരയും തട്ടി ഒരു കോട്ടറും പൊട്ടിച്ചൊഴിക്കും.... പിറ്റേന്ന് നല്ല സ്വയമ്പൻ സാധനം...
അങ്ങനെ 'അമ്മ വീട്ടിൽ ഇല്ലാഞ്ഞ നേരം ഞാൻ ഓരോ കുപ്പിയും അഴിച്ചു ഓരോ പരീക്ഷണങ്ങൾ തുടങ്ങി...
ഒന്നിൽ കുറച്ചു ഈസ്റ്... മറ്റൊന്നിൽ ഗ്രാമ്പൂ.... മറ്റൊന്നിൽ കറുവാപട്ട…. മറ്റൊന്നിൽ ജാതിക്കാ….. മറ്റൊന്നിൽ സോഡാ പൊടി-… മറ്റൊന്നിൽ ബാറ്ററി... ബാറ്ററിയുടെ കൂടെ കുറച്ചു ഈസ്റ്റും ഇട്ടു… പോരാത്തതിനു ബാറ്ററി ചുറ്റികക്ക് ഒന്നു തല്ലി ചതച്ചു..
മറ്റൊന്നിൽ കോട്ടെർ വാങ്ങാൻ ക്യാഷ് ഇല്ലാത്ത കൊണ്ടും, നാട്ടിൽ നല്ല വില ഉള്ളതു കളയണ്ടാ എന്നു വെച്ചും, വീട്ടിൽ വെളിച്ചെണ്ണ ഒഴിച്ച് വെക്കാനാണെന്നു പറഞ്ഞു, കഴിഞ്ഞ ഒരാഴ്ചയായി ലിക്വർ ഷാപ്പിന്റെ പരിസരത്തു നിന്ന് അവസാന തുള്ളികൾ ഉള്ള കുപ്പികൾ ശേഖരിച്ചു... ഒരു ഹാഫ് കോട്ടെർ കിട്ടി.... എല്ലാ ബ്രാൻഡും ഉണ്ട്..... എന്റമ്മോ എന്താ മണം...
രണ്ടു കുപ്പിയിൽ ഒന്നും ചേർക്കാത്ത വൈൻ പ്രത്യേകം അടയാളപ്പെടുത്തി മാറ്റി വെച്ചു.... അതെനിക്കു കുടിക്കാൻ... ചാത്തൻ… ചാത്തന്മാർക്കു...
അങ്ങനെ പരിപാടികൾ എല്ലാം ചെയ്ത ശേഷം നേരെ കോളേജിലേക്ക് വിട്ടു... ചെന്നപ്പോൾ സസ്പെൻഷൻ... ടൂർ നീട്ടി എടുത്തതിനു എല്ലാത്തിനേം പുറത്താക്കി.... വീട്ടിൽ അറിഞ്ഞാൽ കാലും മുട്ടും തല്ലി ഓടിക്കുന്ന കൊണ്ട് അവിടെ തന്നെ നിന്നു....
അപ്പോഴാണ് ജിഷ്ണു എന്നെ വിളിച്ചത് (പിറ്റേ ആഴ്ച).... ഡാ വൈൻ റെഡി ആയോന്ന്..
ഡാ ഇട്ടതല്ലേ ഉള്ളൂ... ഒരു ഇരുപത്തിയൊന്നെങ്കിലും കഴിയാതെ എങ്ങനെയാ എടുക്കുന്നത്....
നീ ഇരുപത്തിയൊന്നു നോക്കി ഇരുന്നോ.... നിന്റെ പതിനാറടിയന്തരം നടത്താം അന്ന്... അതെന്നാടാ......
ഡാ കോപ്പാ അതു പൊട്ടി തെറിക്കും… നീ എത്രേം പെട്ടെന്നു ഒന്നുകിൽ അടി.... അല്ലെ പറമ്പിൽ എവിടേലും കൊണ്ടു വെക്ക്...
അമ്പട പുളുസു… നിനക്കന്നിട്ടു അടിച്ചോണ്ടു പോകാനല്ലേ...
പിന്നെ.... എനിക്കടിക്കാൻ ആണേ എന്റെ വീട്ടിൽ ആവിശ്യത്തിന് സാധനം ഉണ്ട്.... നിനക്കൊന്നും വരണ്ടാ എന്നു വെച്ചിട്ടാ ഞാൻ പറഞ്ഞെ... നീ വേണേ അവിടുന്ന് മാറ്റു.
അള്ളാ.... ആകെ കലിപ്പായി കപൂർ സീനാകുമല്ലോ... ഇപ്പോൾ ആണേ സാധനം ഇരിക്കുന്നത് അമ്മയുടെ കട്ടിലിനടിയിൽ... എന്തേലും പറ്റിയാൽ ആരുമില്ലാ നാട്ടിൽ... ഞാൻ വല്ലാതെ ഭയന്ന് വിറച്ചു...
നേരെ വീട്ടിലോട്ടു വിട്ടു.... ചെന്ന പാടെ പുര പണിയാനായി ഇറക്കി ഇട്ട മണ്ണ് മാറ്റിയിട്ടു, അതിൽ കുഴിച്ചിട്ടു....
അന്ന് രാത്രി ഒരു കിടിലം സൗണ്ട്..... പുരപ്പുറത്തു മണ്ണ് മഴ പെയ്യുന്നപോലെ വീഴുന്നു.... ഞാൻ പുറത്തേക്കു നോക്കി.... ഞാൻ ഇന്നലെ കുഴിച്ചിട്ട കുപ്പി പൊട്ടി തെറിച്ചിരിക്കുന്നു...
'അമ്മ ഒന്നും മിണ്ടുന്നില്ലാ.... ഞാൻ നേരെ പോയി ബാക്കി കുപ്പികൾ തോട്ടിലേക്ക് വലിച്ചെറിഞ്ഞു പൊട്ടിച്ചു.... ഇനി ഇല്ല ഇങ്ങനെ ഒരു പരീക്ഷണത്തിനു.
മദ്യപാനം ആരോഗ്യത്തിനു ഹാനികരം ആണ്... അതുണ്ടാക്കുന്നത് ജീവനും ഹാനികരം ആണെന്ന് അന്നു ഞാൻ തിരിച്ചറിഞ്ഞു... പിന്നീടിന്നു വരെ വീട്ടിൽ വൈൻ ഇട്ടിട്ടില്ല...
ജോബിൻ ജോസഫ് കുളപ്പുരക്കൽ...
No comments
Post a Comment
ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക