"ഏട്ടാ.. എനിക്ക് ഈ കല്യാണം വേണ്ട.. ഇനി എങ്കിലും അച്ഛനോട് ഒന്ന് സൂചിപ്പിക്കണം... "
"ഞാൻ ഇന്ന് അച്ഛനോട് സംസാരിക്കാം.. ഉറപ്പ്.."
"ഞാൻ എത്ര ദിവസമായി പറയുന്നു എന്നിട്ട് ഇതുവരെ ഒന്ന് പറഞ്ഞോ അച്ഛനോട്.."
"എല്ലാറ്റിനും മടിയാണ്.. "
"ഇന്ന് അച്ഛനോട് ഞാൻ സംസാരിക്കും ഉറപ്പായിട്ടും..നീ പേടിക്കേണ്ട.."
"കണ്ണ് നിറച്ച് അവളെന്റെ തോളിൽ കിടന്നു.. ഞാൻ അവളുടെ തോളിൽ തട്ടി ആശ്വസിപ്പിച്ചു..."
"ഡാ" ..പുറകിൽ നിന്നും ഒരു വിളി കേട്ടാണ് ഞാൻ നോക്കിയത്..
മൂന്ന് പേരുണ്ട്... അതിലെ ഒരുവൻ ചോദിച്ചു.. "എന്താടാ ഇവിടെ പണി..."
"ചേട്ടാ സംസാരിച്ചിരിക്കുകയാണ് ഞാൻ മറുപടി കൊടുത്തു... "
"നിനക്ക് ഈ പാർക്കിൽ ആളൊഴിഞ്ഞ സ്ഥലത്തിരുന്നു തന്നേ ഇരുന്നു സംസാരിക്കണം അല്ലേ...!!"
"സംസാരിക്കുക ആളൊഴിഞ്ഞ സ്ഥലത്ത് ഇരുന്നു തന്നെയല്ലേ ചേട്ടാ..."
"അല്ലാതെ സിനിമ തിയേറ്ററിൽ പറ്റുമോ...!!"
"രണ്ടിനും കൂടി ഒരു റൂം വാടകക്ക് എടുത്ത് സംസാരിക്കാമായിരുന്നല്ലോ അതല്ലേ നല്ലത്.."
"ചേട്ടൻ സംസാരിക്കാൻ വീട് വാടകക്കെടുക്കാറാണോ പതിവ്...?? "ഞാനും വിട്ടു കൊടുത്തില്ല..
"അവളുടെ കണ്ണ് നിറഞ്ഞു.. വേണ് ചേട്ടാ...നമുക്ക് പോകാം.. വെറുതേ എന്തിനാ.."
"നീ അവിടെ നിൽക്ക് ഇവർക്ക് എന്തിന്റെ കേടാണ്.. എനിക്കൊന്ന് അറിയണം..."
വാഗ്വാദം കൂടിയപ്പോൾ ആളുകൾ കൂടി.. എല്ലാവരും ഞങ്ങളെ നോക്കി മുറുമുറുത്തു.. ചിലരുടെ ക്യാമറ ഞങ്ങളുടെ മുഖങ്ങൾ ഒപ്പിയെടുത്തു...
"ഇത് എന്തോ മറ്റേ കേസ് ആണ്.. വളർത്തു ദോഷം അല്ലാതെ എന്ത് പറയാനാ.. രണ്ടിനെയും കണ്ടാൽ തന്നെ ഒരു കള്ള ലക്ഷണമുണ്ട്.. ന്യൂ ജനറേഷൻ ആണ് പോലും ന്യൂ ജനറേഷൻ..." പലരും ഞങ്ങളെ കേൾപ്പിച്ചു പറഞ്ഞു.. ചിലർ മനസ്സിൽ മുറുമുറുത്തു...
ചിലർ തല്ലാൻ വന്നു തല്ലാൻ വന്നവരെ എല്ലാം ഞാനും ഉന്തി മാറ്റി.. ചെറുതായി ഉന്തും തള്ളും നടന്നു.. കൂടി നിന്നവരിൽ ആരോ പറഞ്ഞു പോലീസ് വരട്ടെ.. പോലീസ് വന്നാൽ ഇവിടെ ഞങ്ങളെ തൂക്കി കൊല്ലും എന്ന രീതിയിൽ കൂടിനിന്നിരുന്നവർ ഞങ്ങളെ നോക്കി പിറുപിറുത്തു...
പോലീസ് വന്നു.. "എന്താടാ ഇവിടെ "..സബ് ഇൻസ്പെക്ടർ വന്ന് എന്നോട് കാര്യം തിരക്കി.. ഞാൻ എല്ലാം വിശദമായി പറഞ്ഞു..
"ഇവരെ ആരാണ് ആദ്യം കണ്ടത് ?" സബ്ഇൻസ്പെക്ടർ ചോദിച്ചു
പുലിമുരുകനിൽ ഒരു പുലിയെ വേലെറിഞ്ഞു വീഴ്ത്തി നമ്മുടെ ലാലേട്ടൻ വരുന്നത് പോലെ സ്ലോ മോഷനിൽ വരുന്ന മൂന്ന് ലാലേട്ടന്മാരെ ഞാനവിടെ കണ്ടു..
"ഞങ്ങളാണ് സാറെ" അതിലെ തന്റേടം കൂടിയ ഒരു ലാലേട്ടൻ പറഞ്ഞു...
"ഇവിടേക്ക് മാറി നിൽക്കെടാ..." സബ് ഇൻസ്പെക്ടർ അവരോട് പറഞ്ഞു..
"ഒരു ആണും പെണ്ണും കൂടെ ഇരുന്നാൽ അവിഹിതമാണെന്നു കരുതുന്നത് തെറ്റാണ്.. അങ്ങനെ കരുതുന്നവരുടെ മനസ്സിൽ ആകും അത്തരത്തിൽ ഉള്ള ചിന്തകൾ ..."
"അയ്യോ സാറേ ഇവൾ ഇവന്റെ തോളിൽ കിടക്കുന്നത് ഞാൻ കണ്ടു.." മൂന്ന് പേരിൽ തന്റേടം കൂടിയ മറ്റൊരു ലാലേട്ടൻ പറഞ്ഞു..
"പെങ്ങൾ ആങ്ങളയുടെ തോളിൽ കിടന്നാൽ എന്താണ് കുഴപ്പം" സബ് ഇൻസ്പെക്ടർ ദേഷ്യത്തോടെ ചോദിച്ചു...
കൂടി നിന്ന ജനക്കൂട്ടത്തോട് ഞാൻ പറഞ്ഞു "സദാചാരക്കാരെ കുരിശിൽ തറയ്ക്കരുത് ..ഇതെന്റെ പെങ്ങളാണ് "
കൂടിനിന്നവർ പലരും പിരിഞ്ഞു പോയി.. ചിലർ സിനിമയുടെ ക്ലൈമാക്സ് മോശമായിപ്പോയ രീതിയിൽ എന്തോ പിറുപിറുത്തു നടന്നു നീങ്ങി.. ചിലരുടെ മുഖത്തു ഞങ്ങളെ തൂക്കി കൊല്ലാത്തതിൽ വിഷമം നിഴലിച്ചുനിൽക്കുന്നു... ചിലർ വന്നു ആശ്വസിപ്പിച്ചു.. അറിയാതെ പറ്റിയത് അല്ലേ പോട്ടെ എന്ന്...
സദാചാരക്കാരിൽ കുറച്ചു തന്റേടം കുറഞ്ഞ മോഹൻലാൽ എന്നോട് വന്നു സോറി പറഞ്ഞു അറിയാതെ പറ്റിപ്പോയതാണ് എന്ന്..തൻേറടികൾ പുച്ചഭാവത്തിൽ ഞങ്ങളെ നോക്കി... ആ നോട്ടത്തിൽ ഇത് പിഴച്ചു അടുത്തത് ഒരിക്കലും പിഴക്കില്ല എന്ന ധ്വനി ഉള്ളതായി എനിക്ക് തോന്നി..
ഞാൻ അവരുടെ അടുത്തു പോയി പറഞ്ഞു "അഹങ്കരിക്കേണ്ട.. ഞാൻ മാനനഷ്ടത്തിന് കേസ് കൊടുത്തിട്ടുണ്ട്.. കുറച്ചു ദിവസം ഉള്ളിൽ കിടക്കാം.. തെളിവ് ഉള്ള കേസ് ഒന്നും തള്ളില്ല.. ഇവിടെ കൂടി നിന്നിരുന്ന എല്ലാവരും ഇത് മൊബൈലിൽ പകർത്തിയിട്ടുണ്ട്.. വൈകാതെ വാട്സ് ആപ്പിലും ഫേസ് ബുക്കിലും വൈറൽ ആകും.."
സബ് ഇൻസ്പെക്ടർ സാറിനോട് നന്ദി പറഞ്ഞു ഞാൻ തിരിച്ചു പോന്നു.. ബൈക്കിൽ കയറുമ്പോൾ എന്നോട് ചേർന്നിരുന്നു തോളിൽ കൈ വയ്ക്കാറുള്ള അനിയത്തി ഒരു അകലത്തിലിരുന്നു ബൈക്കിന്റെ പിറകിൽ പിടിക്കുന്നതായി തോന്നി...
Sajith_Vasudevan(ഉണ്ണി...)
No comments:
Post a Comment
ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക