സുപ്രഭാതം

By: Siraj Sarangapani

ഉണരൂ
യാത്ര തുടരാം

പോകുവാനുണ്ടിനി ഏറെ ദൂരം
തടയുവാൻ നിൽക്കുന്ന
വിഷമുള്ള പട്ടിയെ
കൊല്ലാതെ പോവുന്നതെങ്ങനെ നാം
വെറുതെ കുരയ്ക്കുന്ന
ചാവാലിപ്പട്ടിയെ
കണ്ടില്ലയെന്നു നടിച്ചു പോവാം

പുഞ്ചിരിച്ചീടുന്ന പൂവുകൾക്കൊക്കെയും
പുഞ്ചിരിയൊന്നു കൊടുത്തു പോവാം
തിരിയെ നടക്കുവാനാവാത്ത യാത്രയിൽ
തണലായ പ്രകൃതിയെ
മനസ്സിൽ വയ്ക്കാം
തുണയായ മർത്യരെ
മനസ്സിൽ വയ്ക്കാം
ഓർമ്മ തൻ ചെപ്പിലെ മധുരങ്ങളത്രയും
പാഥേയമായി കരുതി വയ്ക്കാം