അമ്മയെക്കുറിച്ചെഴുതണമെനിക്ക്

അമ്മയെക്കുറിച്ചെഴുതണമെനിക്ക്
ശ്രമിക്കുന്നു ഞാൻ......പക്ഷെ !

ആ മിഴി സാഗരത്തിൽ നിന്നലതല്ലിയാർത്തുവരും തിരകളെ ഏത് കൈകളാൽ കോരിയെടുക്കും
ഞാൻ !

ആ മുഖത്തു നിന്നുദിച്ചുയരും ആയിരം വർണ്ണ ഭാവങ്ങളെ ഏത് മഷിത്തണ്ടിനാൽ ഒപ്പിയെടുക്കും ഞാൻ !

ആ ചുണ്ടിൽ നിന്നർഗ്ഗളമായൊഴുകും പാൽ ചന്ദ്രികയെ ഏത് പാത്രത്തിൽ ഊറ്റിയെടുക്കും ഞാൻ !

ആ നാവിൽ നിന്നുതിരും ചെറു മുത്തുകൾ
ഏത് ചെപ്പിൽ ചേർത്തുവെക്കും ഞാൻ !

ആ കണ്ഠത്തിൽ കുരുങ്ങിക്കിടക്കും ഗദ്ഗദങ്ങളെ
ഏത് ഭാഷയിൽ മാറ്റിയെഴുതും ഞാൻ !

ആ ഇടനെഞ്ചിലെ മിടിപ്പുകൾ അളന്നെടുക്കാൻ
ഏത് മാപനി തേടും ഞാൻ !

ഉറക്കമില്ലാ രാവുകളിലാനിനവിൽ കൂട്ടിനായെത്തും സ്വപ്നങ്ങളെ ഏത് ചുവരിൽ വരച്ചെടുക്കും ഞാൻ !

ഇല്ല.....എനിക്കാവില്ല..

സ്വർഗ്ഗ കവാടത്തിലേക്കെന്നെ കൂട്ടുമാ പാദങ്ങളെ
തളച്ചിടാനെൻറെയീ വിലകെട്ട വാക്കുകളിൽ !
 **********
ഹാരിസ് കോയ്യോട്