നാല്പതുകളിലെ സ്ത്രീകൾ ഏറ്റവും സുന്ദരികളായതിന്റെ രഹസ്യം നിങ്ങൾക്കറിയാമോ? നാല്പതുകളിലെത്തുമ്പോളാണ് അവളൊരു ദീർഘനിശ്വാസംവിട്ട് ചുറ്റുമുള്ള ലോകം സ്വന്തം കണ്ണുകൾകൊണ്ടൊന്നു നോക്കിക്കാണുക! ഒക്കത്തും മടിയിലും കൈവിരൽത്തുമ്പിലും തൂങ്ങിയിരുന്ന കുട്ടികൾ രണ്ടു കാലിൽ നിൽക്കുന്നതവൾക്ക്‌ കാണാൻ കഴിയുക; വീട്ടുകാരുടെ ഇഷ്ടത്തിനനുസരിച്ചു ചിട്ടപ്പെടുത്തിയ അടുക്കളയിൽ അവളുടെ രുചിക്കൂട്ടുകൾ അവളാദ്യമായി തിരയുക! കുടുംബത്തിന്റെ നിലവിളക്കാണെന്നു പറഞ്ഞ് മൂലയിലേക്കു മാറ്റിവച്ച അവളുടെ വിലയും നിലയും അവൾ തിരിച്ചറിയുക; സ്നേഹത്തിന്റെ അർത്ഥവും സന്തോഷത്തിന്റെ അതിരും സ്വാതന്ത്ര്യത്തിന്റെ അതിർത്തിയും സഹനത്തിന്റെ ആഴവും അവൾ ധരിച്ചു വച്ചതല്ലായിരുന്നെന്ന് കാലം അവളെ പഠിപ്പിക്കുക! അപ്പോളാണ് അവൾ നഷ്ടപ്പെട്ടുപോയ തന്റെ വ്യക്തിത്വത്തെ കണ്ടുമുട്ടാൻ നിലക്കണ്ണാടിയിൽ ചെന്നൊന്നു നോക്കുക. കറുത്ത ചുരുൾമുടികൾക്കുള്ളിൽക്കൂടെ വെളുത്തനരകൾ പായുന്നതു കാണുമ്പോൾ അവളുടെ നെഞ്ചിലൊരു കൊള്ളിയാൻ പടപടേന്നു മിന്നുക! അവളെക്കാൾ മുമ്പേ നടക്കുന്ന തന്റെ വയറിനെയവൾ പരമാവധി ഉള്ളിലേക്ക് വലിച്ചു ശ്വസിച്ച് ശാസിച്ചൊതുക്കുക. പിന്നെയൊരു പിടച്ചിലാണ്. നൊമ്പരങ്ങളിൽ നിന്നും പിന്നെയൊരു കുതറലാണ്. ബന്ധനങ്ങളിൽ നിന്നും പിന്നെയൊരു ഉയിർത്തെഴുന്നേൽപ്പാണ്; അവളിലെ അവളിൽ നിന്നും. ദാ, ഇത്രയും പോരേ കൂട്ടരെ? നാല്പതുകളിലെ സ്ത്രീകൾക്ക് വീണ്ടും അതീവ സുന്ദരികളാവാൻ!
Written by Lipi Jestin
Hi Lipi..Good words. A friend of mine send this to me. We are part of a team for a news portal called cnewslive.com Would you mind if I publish this with your name?
ReplyDeletePlease contact me on sony.manoj@hotmail.com if you are OK yo contributes
ReplyDelete