നല്ലെഴുത്ത്

The biggest ever archive in Malayalam Literature. 2.5 crores pageviews, 14000+ creations, 2000+authors and adding on....

New Books

Post Top Ad

Your Ad Spot

സിനിമ

 


സിനിമകൾ കാണുവാൻ ഒട്ടും തന്നെ താല്പര്യമില്ലാത്ത വ്യക്തിയാണ് എൻ്റെ ഭർത്താവ്. ഒരിക്കൽ ഞാനതിനു കാരണമന്വേഷിച്ചപ്പോൾ അദ്ദേഹം പറഞ്ഞത് സവർണ്ണമേധാവിത്വത്തിൻ്റെ കുത്തകയാണ് മലയാള സിനിമയെന്നും സവർണ്ണ വാലുകളില്ലാത്ത ഏതെങ്കിലും നായക കഥാപാത്രങ്ങളുള്ള സിനിമ ചൂണ്ടി കാണിക്കുവാൻ കഴിയുമോ എന്നുമാണ്. അത്തരം നെറികേടുകൾക്കു നീക്കിവയ്ക്കുവാൻ എൻ്റെ കൈയ്യിൽ സമയമില്ല. അന്നാണ് ഞാനും അങ്ങനെയൊരു കാര്യം ചിന്തിച്ചറിയുന്നത്. അദ്ദേഹം പറഞ്ഞത് പൂർണ്ണമായും ശരിയാണ്. ആ നിലപാടിനോട് എനിക്ക് അഭിമാനവും ബഹുമാനവും തോന്നി. അന്നു മുതൽ എൻ്റെ സമയത്തിനും ഞാൻ വിലയിട്ടു. സമയം നേരുള്ളവയ്ക്കുവേണ്ടി ചെലവഴിക്കുവാനുള്ളതാണ്.

മലയാള സിനിമയിലെ ഈ ജാതീയത മറ്റു ലോക ഭാഷാ സിനിമകളിലൊന്നും ഞാൻ കണ്ടിട്ടില്ല. അവരൊക്കെ സിനിമയെടുക്കുന്നത് മനുഷ്യൻ്റെ മനുഷ്യത്വമുള്ള കഥകൾ പറയുവാനാണ്. ഞാൻ കണ്ട ലോക സിനിമകളിലൊക്കെ മനുഷ്യനെയെ എനിക്കു കാണുവാൻ കഴിഞ്ഞുള്ളൂ. ജീവിതം എത്ര നിസ്സാരമെന്നും മഹത്തരമെന്നും കാട്ടിത്തന്നത് ഇറാനിയൻ സിനിമകളാണ്. പ്രണയം എത്ര മനോഹരമെന്ന് കാട്ടിത്തന്നത് ട്വിലൈറ്റ് സാഗാ സീരീസുകളാണ്, ജീവിതത്തിൻ്റെ ദൈന്യതയും ക്രൂരതയും കാട്ടിത്തന്നത് കൊറിയൻ സിനിമകളാണ്, ആകസ്മികതകൾക്കും സങ്കല്പങ്ങൾക്കും നിറമേകിയത് ഹോളിവുഡ് സിനിമകളാണ്. മലയാള സിനിമ ഇന്നും ജാതിപേരിൽ നിന്നു പോലും ഊരി മാറിയിട്ടില്ല എന്നത് എത്ര ലജ്ജാവഹമാണ്. അതിജീവിക്കുവാൻ ശ്രമിക്കുന്ന അപൂർവ്വം സിനിമകളെ പ്രേക്ഷകർ തന്നെ തോല്പിച്ചു കളയും. ഏതെങ്കിലും അന്താരാഷ്ട്ര മേളകളിലും, സംസ്ഥാന ദേശീയ അവാർഡുകളിലും മാത്രം അവർക്ക് അംഗീകാരം കിട്ടും. അതും ജൂറികളിൽ ഉള്ളവർ മാന്യമായ തീരുമാനമെടുക്കുവാൻ കഴിവും നട്ടെല്ലും ഉള്ളവരാണെങ്കിൽ മാത്രം.

അനാവശ്യമായ താരാരാധനകളെയും, ഫാൻസ് അസോസിയേഷനുകളെയും, മനുഷ്യത്വമില്ലാത്ത സിനിമകളെയും ഞാനിഷ്ടപ്പെടുന്നില്ല എന്നു പറയുവാനുള്ള അവകാശം എനിക്കുണ്ട്. ഇഷ്ടമില്ലാത്തിടത്ത് അഭിപ്രയം പറയണം എന്ന് തോന്നിയിട്ടുമില്ല. പക്ഷെ ഇന്നതു തോന്നുന്നു. കാരണം ഒറ്റ വ്യക്തി മാത്രം. നിലപാടുകൾകൊണ്ടും, ആശയങ്ങൾ കൊണ്ടും, അഭിനയ മികവുകൊണ്ടും, പോരാട്ടങ്ങൾ കൊണ്ടും, നട്ടെല്ലുണ്ടെന്നും അത് നിവർന്നതാണെന്നും, അങ്ങനെ തന്നെ തുടരുമെന്നും കാണിച്ചു തന്ന ഒരേയൊരു സിനിമ താരം. പാർവ്വതി തിരുവോത്ത്. അവർക്കൊപ്പം നിൽക്കുവാൻ വേണ്ടി ഞാനെഴുതുന്നു. നന്ദി പാർവ്വതി... മനുഷ്യത്വം കാണിച്ചതിന്, രാജാവ് നഗ്നനാണെന്ന് വിളിച്ചു പറഞ്ഞതിന്, ഉറച്ച ആശയങ്ങൾക്ക്, പേടിയില്ലായ്മയ്ക്ക്, പോരാടാനുള്ള ഊർജ്ജത്തിന്, തെറ്റ് തെറ്റെന്ന് പറയുവാനുള്ള ആർജ്ജവത്തിന്, ഐക്യധാർഢ്യം പാർവ്വതി.... നിങ്ങൾ ഒരു മുന്നേറ്റമാണ് സമാനതകളില്ലാത്ത പോരാട്ട വീര്യത്തിൻ്റെ അടയാളം.

സിനിമാ ലോകം വേറെയാണെന്നും, അവർക്ക് അവരുടേതായ ജീവിത രീതി ഉണ്ടെന്നും മറ്റൊന്നും അവരെ ബാധിക്കാറില്ലെന്നും പറയുന്നവരുണ്ട്. ആരാണ് അവർക്ക് ഈ അപ്രമാദിത്തം കല്പിച്ചു കൊടുത്തിരിക്കുന്നത്....? സാധാരണക്കാരായ പ്രേക്ഷകർ ഉണ്ടാക്കിക്കൊടുത്ത ലോകം മാത്രമാണത്. അവർ വിചാരിച്ചാൽ തകർക്കാവുന്നതും. പക്ഷെ വിചാരിക്കുന്നില്ല എന്നിടത്താണ് അനാവശ്യമായ മേൽക്കോയ്മ അവർ നേടിയെടുക്കുന്നത്.

കൂടെയുണ്ടായിരുന്ന
ഒരു പെൺകുട്ടിക്ക് നേരിടേണ്ടി വന്ന കൊടും അപമാനത്തിന് യാതൊരു വിലയും കല്പിക്കാത്ത ഒരു സിനിമാ സംഘടന... അതിനാണെങ്കിൽ അമ്മയെന്നു പേരും. അപമാനിക്കപ്പെട്ട മകൾക്കൊപ്പം നിൽക്കാതെ, അവൾക്കു വേണ്ടി വാദിക്കാതെ, അവൾക്കു നീതി കണ്ടെത്താതെ, അവളെ വീണ്ടും വീണ്ടും അപമാനിക്കുന്ന, വേട്ടയാടുന്ന പേരിനു വിലയില്ലാത്ത സംഘടന.

തലപ്പത്തിരിക്കുന്നവർക്കു നാവില്ലേ എന്നു ചോദിക്കുവാനിവിടെ ഫാൻസ് അസോസിയേഷൻകാരില്ല. തങ്ങളുടെ വീട്ടിലൊരു പെൺകുട്ടിയാണ് അപമാനിക്കപ്പെട്ടതെങ്കിൽ എന്ന് ഇവരെയൊക്കെ ആരാധിക്കുന്നവർ ഒരു നിമിഷം ചിന്തിച്ചിരുന്നുവെങ്കിൽ താഴെ വീഴാനേയുള്ളൂ ഇവരുടെയൊക്കെ സിംഹാസനങ്ങൾ. ഇവ രുടെയൊക്കെ സവർണ്ണ വാഴ്‌ചയ്ക്കെതിരെ പോരാടേണ്ടി വന്ന മഹാ നടൻ തിലകനു പ്രണാമം. തോറ്റുപോയെങ്കിലും അവസാന ശ്വാസം വരെയും പോരാടി. അതു തന്നെ ചങ്കൂറ്റം. കൂടെയുള്ള ഒരു പെണ്ണിൻ്റെ മാനം തെരുവിലിട്ടു ചവുട്ടിയരച്ചതിനു കൂട്ടുനിൽക്കുന്ന, തരം പോലെ കൂറുമാറുന്ന നടീനടന്മാർ. ഇവരൊക്കെ എന്തു സാമൂഹ്യ സേവനം നടത്തിയാലെന്താ....? ആവശ്യമുള്ളിടത്തെല്ലാം നാവെടുത്ത് കീശയിലിട്ടു വെള്ളിത്തിരയിൽ മറ്റാരോ എഴുതിക്കൊടുത്ത വാക്കെടുത്ത് വിളമ്പി വിപ്ളവം സൃഷ്ടിക്കുന്നവർ... അവർ ഈ തരം താണ പ്രവർത്തിയിലൂടെ എന്ന് സന്ദേശമാണ് തങ്ങളുടെ ആരാധകർക്ക് കൈമാറുന്നത്....?

വരാൻ പോകുന്ന സിനിമയിൽ ആ പെൺകുട്ടിക്ക് ഒരു വേഷമുണ്ടാകുമോ എന്നു ചോദിച്ചവരോട് അവൾ മരിച്ചു പോയ കഥാപാത്രമല്ലേ എന്നു പറഞ്ഞ അമ്മയുടെ സെക്രട്ടറി പറയാതെ പറഞ്ഞത് ഇതാണ്. അവൾ ഞങ്ങൾക്കെല്ലാം മരിച്ചു പോയി. അതാണല്ലോ അന്നു കൂടെ നിന്ന പല നടിമാരും ഇന്നു കൂറുമാറി എതിർ ചേരിയിലായത്. തങ്ങളുടെ നിലവാരം ഇത്രേയുള്ളു എന്നു പറയുന്ന ഇവരോടൊക്കെ, നിങ്ങൾ ഇത്രേയുള്ളോ എന്നു തിരിച്ചു ചോദിക്കുവാനുള്ള ആർജ്ജവമെങ്കിലും പൈസ കൊടുത്ത് ഇവരെയൊക്കെ സൂപ്പർ സ്റ്റാർ പദവിയിൽ കാത്തു സൂക്ഷിക്കുവാൻ ക്യൂ നിൽക്കുന്നവർ കാണിക്കണം. സാധാരണക്കാരേ.... നിങ്ങൾ വിയർപ്പൊഴുക്കി ഉണ്ടാക്കിയ പൈസ ചെലവഴിച്ചു നിങ്ങൾ ഉണ്ടാക്കിക്കൊടുത്തതാണ് ഇവർക്കൊക്കെ ഈ പദവി, ഈ സിംഹാസനം. അവരാരും തനിയെ അവിടെ കയറി ഇരുന്നവരല്ല. ഇരുത്താൻ അറിയാമെങ്കിൽ ഇവരെയൊക്കെ വലിച്ചു താഴെയിടുവാനും നിങ്ങൾക്കു കഴിയണം.

ഇവിടെയിപ്പോൾ നട്ടെല്ലുള്ള, കരളുറപ്പുള്ള, ഭയമില്ലാത്ത, ഒറ്റ വ്യക്തിയേയുള്ളൂ. അവരുടെ പേര് പാർവ്വതി തിരുവോത്ത് എന്നാണ്. അഭിമാനം നീയൊരു പെണ്ണായി ഇത്ര ചങ്കുറപ്പോടെ പിറന്നതിൽ. നിനക്കൊപ്പം.... നിൻ്റെ നിലപാടുകൾക്കൊപ്പം.... ശരികൾക്കൊപ്പം.... നിൻ്റെ ചിന്താശേഷിക്കൊപ്പം.... അക്ഷരങ്ങൾ നിനക്കു പകർന്നു തന്ന ബോധത്തിനൊപ്പം...
ഭയമില്ലായ്മയ്ക്കൊപ്പം...


Jismi Pramod

No comments:

Post a Comment

ഈ രചന വായിച്ചതിനു നന്ദി - താങ്കളുടെ വിലയേറിയ അഭിപ്രായം രചയിതാവിനെ അറിയിക്കുക

Post Top Ad

Your Ad Spot