അലിഗഢ് ഡയറി /30

ഒരു നാളും നിരൂപിതമല്ലേ എന്നൊരു പദമുണ്ട് നളചരിതം രണ്ടാം ദിവസത്തിൽ. ദമയന്തിയെ കാട്ടിൽ ഉപേക്ഷിക്കുന്നതിന് മുൻപ് കലിബാധിതനായ നളന്റെ ആത്മഗതമാണ് ഈ പദത്തിന്റെ ഉള്ളടക്കം.. കലാമണ്ഡലം ഹൈദരലി ആത്മ സ്പർശത്തോടെ പാടിയ ഒരു പദം കൂടിയാണിത്

ഞാനും ഒരിക്കലും കരുതിയതല്ല ഇങ്ങനെയൊരു പഠന കാലം.. എന്നാലും എത്രയോ അനുഭവങ്ങൾ അത് രണ്ടു വർഷം കൊണ്ടെനിക്ക് നേടിത്തന്നു

ചമ്പൽ ഗ്രാമങ്ങൾ മധ്യ പ്രദേശിന്റെ വനസ്ഥലിയാണ്.മൺകൂനകൾക്കിടയിലൂടെ നിഗൂഢതയൊളിപ്പിച്ച വഴികൾ.. കുതിരപ്പുറത്തേറി വരുന്ന കൊള്ളക്കാർ.. അവരുടെ കാട്ടുനീതികൾ. എന്നാലും അവരെ ഒറ്റിക്കൊടുക്കാത്ത ഗ്രാമീണർ.കെ.എൽ മോഹനവർമ്മയുടെ ചംബൽ എന്ന നോവൽ ഓർമ്മ വരുന്നു..
ഫുലൻ ദേവിയും, പുത്ലീബായിയും മാൻ സിംഗും അവിടെ കുതിരക്കുളമ്പടികളിൽ ചരിത്രമെഴുതിയവർ.. മൺകുന്നുകളല്ലാതെ കുറ്റിക്കാടുകളല്ലാതെ ചംബൽക്കാടുകൾ വേറൊന്നുമില്ല.. ബേഹഡുകൾ എന്നാണ് ഈ കൊച്ചുമൺകൂനകൾ അറിയപ്പെടുക..

തമിഴകത്തിന്റെ സാപ്പിട്ടാച്ചാ എന്ന ചോദ്യം, വിജയവാഡയിലെ കൃഷ്ണാ നദിയുടെ പാലം, ഓറഞ്ചു മണക്കുന്ന നാഗ്പൂർ; ഗ്വാളിയർ 'ഇറ്റാർ സി, ഝാൻസി ആഗ്ര ഡൽഹി കോട്ടകൾ, വൃന്ദാവന മഥുര, കൽക്കത്ത, വാരണാസി, ഗയ കാഴ്ച്ചപ്പട്ടികയിൽ കോർക്കാൻ ഇനിയുമെത്രയെത്ര ഓർമ്മപ്പൂക്കൾ..

അലിഗഡ് തന്ന ഒരു പിടി ഓർമ്മകൾ.. 1987-89 കാലം ഒരിക്കൽ കൂടി ഈ എഴുത്തിലൂടെ തിരിച്ചുപിടിച്ചു.. രണ്ട് വർഷത്തിന് ഇത്രയും പറയാനുണ്ടെങ്കിൽ ഒരു ജീവിതകാലത്തിന് എത്ര പറയാനുണ്ടാകും!!

ഈ ഡയറി തൽക്കാലം അവസാനിപ്പിക്കുന്നു.. അലിഗഢ് ഒന്നുകൂടി പറയാതെ പറയുന്നു.. എഴുത്... വീണ്ടും വീണ്ടുമെഴുത്.. അടച്ചു വെച്ച ഓർമ്മപ്പൊത്തിലെ കിളിയൊച്ചകൾ വീണ്ടും പുറം ലോകത്തെ കേൾപ്പിക്ക്.. നന്ദി അലിഗഢ്.. എന്റെ എഴുത്താണിയും എഴുത്തോലയും തിരികെ തന്നതിന്.. പോയ കാലങ്ങളുടെ ബാക്കി ഓർമ്മകളെ തേടി എന്റെ ചൂട്ട് ഞാൻ കത്തിക്കട്ടെ.. വീണ്ടും എഴുതാനുള്ള ജീവിതത്തെ ആ വെട്ടത്തിൽ ഒന്നുകൂടി വീശിക്കാണട്ടേ..

വായിച്ചവർക്കെല്ലാം നന്ദി
വായിക്കാനിരിക്കുന്നവർക്കും
ഭൂതായനങ്ങളുടെ വാതായനങ്ങൾ ഇനിയും തുറക്കാനുണ്ട്.. വീണ്ടും കാണാം🙏🙏🙏🙏🙏

*****""********************

സുരേഷ് നടുവത്ത്

**************************