വന്ധ്യയാക്കപ്പെട്ട ഭൂമി

കുടചൂടി നിന്നൊരാ മാമരങ്ങൾ !
മഴുതിന്നു സർവ്വം നശിച്ചുവെന്നോ.. 
പാർക്കാനിടമില്ല പക്ഷികൾ തൻ,
കൂട്ടനിലവിളി ഉയരുന്നുവോ...
ഭ്രഷ്ടരായ് തീർന്നോരാ പതംഗങ്ങളോ -
തലതല്ലി ജീവനും കളയുന്നുവോ..

കടൽജലം ഭൂമിയെ മൂടുന്നുവോ...
മണലൂറ്റി നദിയെല്ലാം വറ്റിയെന്നോ...
മാലിന്യം പുഴകളിൽ കുന്നുകൂടി,
ജലമില്ല സർവ്വം കളങ്കമെന്നോ...
ശ്വസിക്കാനൊരിറ്റു വായുവില്ല.
ശ്വാസം നിലച്ചങ്ങു വീഴുന്നുവോ...

കാടില്ല മേടില്ല കാട്ടാറില്ല,
മഴയില്ല പുഴയില്ല മലയുമില്ല,
പട്ടുപൂഞ്ചേല പറിച്ചെടുത്തു -
നിന്നെ നഗ്നയായ് തീർത്തവർ മക്കളെന്നോ
ജനനി നിൻ കണ്ണിൽ നിന്നൊഴുകിടുന്ന
കണ്ണുനീർ നോവിൻ രുധിരമെന്നോ ..

വിപിനങ്ങൾ വെട്ടി വെളുപ്പിച്ചപ്പോൾ,
അർക്കനു കോപം വന്നുവെന്നോ...
നിൻ മാറിടം പൊള്ളി പുകച്ചിടുന്നോ...
ക്ഷിതിയതു ചെത്തി മിനുക്കി മർത്യാ.. -
നീ പണിയുവത് നിൻ കുഴിമാടമെന്നോ..

By: Dhanyajijesh