അവൻ അനാഥൻ

അവൻ അനാഥൻ
അബദ്ധത്തിൽ രൂപം കൊണ്ടതാവാം
അത് അവൻറെ തെറ്റായിരുന്നില്ല 
പിറന്നത് അച്ഛനില്ലാതെയല്ല
തെരുവിലെത്തിയത് അമ്മയില്ലാഞ്ഞിട്ടല്ല
മാനം കാക്കാൻ ഉപേക്ഷിച്ചതാവാം

തന്തയില്ലാത്തവൻ
തള്ളയില്ലാത്തവൻ
ആരുടെയോ സുഖം തേടിയുള്ള യാത്രയിൽ
അറിയാതെ പിറന്നുപോയത്
അവൻറെ കുറ്റമല്ല

ഭിക്ഷാപാത്രവുമായി നാടുത്തേണ്ടുന്നവൻ
വഴിയോരങ്ങളിൽ
പട്ടിയെയും പൂച്ചയെയും
ചുറ്റുമുള്ള മനുഷ്യരെയും
സ്നേഹിച്ചും വെറുത്തും കഴിയുന്നവൻ
അവരും അനാഥരായിരുന്നു

അമ്പലങ്ങളുടെ മതിലിനുള്ളിലും പുറത്തും
പള്ളികളുടെ മതിലിനുള്ളിലും പുറത്തും
അവൻറെ ഭിക്ഷാപാത്രത്തിൽ
നാണയമെറിഞ്ഞവർക്കിടയിൽ
ഒരുപക്ഷേ
അവൻറെ അച്ഛനുണ്ടായിരിക്കാം
അവൻറെ അമ്മയുണ്ടായിരിക്കാം
പോയ മാനം തെരുവിലുപേക്ഷിച്ച്‌
പുതിയ മാനങ്ങൾ തേടുന്നവർ

കാപട്യങ്ങളുടെ ലോകത്ത്
അവനൊരു പേരുണ്ട്
തന്തയില്ലാത്തവൻ
തള്ളയില്ലാത്തവൻ
തന്തയും തള്ളയുമില്ലാത്തവൻ
ഇവിടത്തെ നിയമപാലകർ
അവനു നൽകിയ മനോഹരമായ പേര്

(ഈ തെരുവുകളിൽ
നഷ്ടപ്പെട്ട മാനങ്ങളുടെ എണ്ണം കൂടിവരുന്നത്
പുരോഗതിയുടെ അടയാളമാവാം)

By: 

Siraj Sarangapani