വരുന്നുവോ നീ

നിഴലുകൾ വിരിയുമീ ധനുമാസരാത്രിയിൽ
കതിരുകാണാൻ വരുന്നുവോ നീ...

പച്ചവിരിപ്പിട്ട പാടത്തിനുച്ചിയിൽ
തിങ്കൾ ചിരിപ്പതു കണ്ടീടുവാൻ

ഇടവരമ്പിലൂടൊന്നു നിൻ കൈപിടിച്ചി-
രവൊഴിയുവോളം നടന്നീടുവാൻ

തണുത്തോരുകാറ്റിൻ ഇൗരടി കേട്ടങ്ങ്
പ്രണയത്തുടിപ്പാലലിഞ്ഞു തീരാൻ

വിജനമാമേകാന്തരാവിലായ് നിൻ സ്വര-
മൊരുമാത്രകേട്ടങ്ങ് കുളിരിലാവാൻ

കരളുതുടിക്കുന്നു പെണ്ണേ നിൻ പാദ-
ത്തരികളിലുണരുന്ന നാമ്പുകാണാൻ

കൊലുസ്സിന്റെ കൊഞ്ചലിൽ ചീവീടുപാടും
ഗാനങ്ങളൊന്നങ്ങലിഞ്ഞു പോകാൻ

സ്മൃതിയൊന്നു മതിയീ ശിഷ്ടജീവന്ന്
ഒാരത്തുകൂടങ്ങൊഴുകി നീങ്ങാൻ

സ്മൃതിയതുമതിയിനിയുള്ള കാലമീ
ജീവിതക്കനലിന്ന് കുളിരേകുവാൻ
_________________________
രമേഷ് കേശവത്ത്...